Dual Panel1Ri se’reang allo, anjo Dina, ana’ bainena Yakub battu ri Lea, mangei ri siapa area baine tu Kanaan.
2Ri wattunna nicini’ Dina ri Sikhem, iamintu ana’na Hemor tu Hewi, a’jari karaenga ri anjo daeraya, nalariammi Sikhem anjo tuloloa, nampa napassa nagau’ sala.
3Mingka sanna’mi ero’na ri Dina, sa’genna tu’guru’ pangngai ri ia. Nausahaimi sollanna ero’ todong anjo tuloloa ri kalenna.
4Nakanamo Sikhem ri manggena, "Kupalaki nakiusahai anggappai anjo tuloloa untu’ inakke. Erokka’ ambuntingi."
5Nalangngere’mi Yakub angkanaya le’baki nija’dalli ana’na. Mingka lanri sitabangi nia’ ngaseng ana’na ri paranga angkalawaki olo’-olo’na, takkulleami gio’ lalang tenanapa nammotere’ ke’nanga.
6Battumi Hemor, manggena Sikhem mae ri Yakub, ero’ angngagangi a’bicara.
7Sitabang le’baki anjo wattua nia’mi sikamma ana’na Yakub ammotere’ battu ri paranga. Nalangngere’na ke’nanga anjo apa le’baka kajariang, ta’bangkami ke’nanga siagang sanna’ ngasemmi larrona. Nasaba’ lanri nagau’ salana Sikhem anjo Dina, nahinami sikontu tu Israel.
8Nakanamo Hemor ri Yakub, "Anakku Sikhem eroki ri ana’nu. Kupalaki nanukellai anakku a’bunting siagang ia.
9Umba nipare’ passitujuang angkana bansanu siagang bansana ikambe assileo’mi sibuntingi.
10Jari akkulle ngaseng mako ammantang siagang ikambe anrinni ri pa’rasanganga, ri tampa’ nungaia. Akkulle mako bebasa’ a’danggang siagang ammallaki pa’barang-barangngang."
11Nampa nakana Sikhem ri manggena Dina siagang sikamma sari’battanna, "Kitarimami anne pappalakku. Manna apa kipala’ lakusareki’ punna erokki’.
12Kipau mami hadia apa kikaeroki, siagang kitantukammi siapa bulaeng sunranna. Lakusareki’ apa kipalaka, assala’ kikellaija’ a’bunting siagang anjo tuloloa."
13Lanri le’ba’namo nagau’ sala Dina, andi’na ke’nanga, a’balle-ballemi sikamma ana’na Yakub mae ri Sikhem siagang Hemor, manggena.
14Nakanamo ke’nanga ri anjo tau ruaya, "Siri’-siriki ikambe angkellai andi’na ikambe a’bunting siagang tau tenaya nassunna’.
15Iapa nasituju ikambe ri pappala’nu punna akkulle nugaukang anne se’rea passala’, iamintu: Ikau ngaseng akkulleko sangkamma ikambe, iamintu sikontu bura’nea musti nisunnaki.
16Le’bappi anjo nampa akkulle nasitujui ikambe ero’nu ri passala’na anjo a’bunting sicampuruka. Lammantammi ikambe ri tangnga-tangnganu ngaseng siagang a’jari maki’ se’re bansa.
17Mingka punna taerokako antarimai anne pappala’na ikambe, siagang teako nisunna’, lanaallei ikambe ammotere’ anjo bainea nampa a’lampa."
18Napikkiriki Hemor siagang Sikhem angkana siratangi anjo apa napalaka ke’nanga.
19Sadiami Sikhem untu’ anggaukangi anjo pappala’na ke’nanga lanri ero’na ri Dina. Ri sikontuna kaluargana, iaminjo Sikhem kaminang nipilangngeri kananna.
20Nampa a’lampamo Hemor siagang Sikhem ri tampa’ pa’rappunganga ri pakke’bu’ lompona kotaya. Nampa napabattu mae ri sikontu tuniaka ri anjo kotaya angkana,
21"Anjo tu Israel aganta. Jari lappassammi ke’nanga ammantang ke’nanga ri anne pa’rasanganga siagang ikatte kammayatompa nabebasa’ a’lampa kere-keremae situru’ pangngainna. Anne pa’rasanganga angganna’ tonji luara’na untu’ ke’nanga. Akkulleki’ a’bunting siagang tulolonna ke’nanga, kammayatompa ia ke’nanga akkulle tongi a’bunting siagang tulolonta.
22Mingka iapa naero’ ke’nanga ammantang ri tangnga-tangngata siagang a’jari se’re bansa siagang ikatte punna nigaukang anne: sikontu tu bura’nea ri katte musti nisunna’ ngasengi sangkamma ke’nanga.
23Sallang sikamma olo’-olo’na ke’nanga siagang sikontu barang-baranna a’jari katte ngaseng pata. Jari umbamo nanisitujui anjo pappala’na ke’nanga sollanna ammantang ke’nanga siagang ikatte."
24Sikontu anjo tummantanga ri anjo kotaya situjumi ri anjo pappala’na Hemor siagang Sikhem. Nampa nisunna’mo sikontu bura’ne lompoamo ri anjo kotaya.
25Tallungallo ri le’ba’na, ilalang ri pa’risi’na ngaseng ija sikontu tu bura’nea lanri le’ba’na nisunna’, rua ana’na Yakub, iamintu daenna Dina, niarenga Simeon siagang Lewi, angngallemi pa’dang. Nampa accokko-cokko antama ri kotaya. Nampa nabuno ngaseng sikontu tu bura’nea anjoreng,
26kammayatompa Hemor siagang Sikhem. Nampa naalle ke’nanga Dina battu ri balla’na Sikhem, nampa a’lampa ke’nanga.
27Le’baki nagaukang anjo pammunoanga ke’nanga, battu tommi ana’na Yakub maraenganga anrampasaki barang-baranna taua ri anjo kotaya, a’jari pa’balasa’ lanri le’ba’na nigau’ sala andi’na ke’nanga.
28Naallemi ke’nanga sikamma bembea, gimbalaka, sapia, keledaia, siagang sikontu apa-apa niaka ilalang ri kotaya siagang ri paranga.
29Naalle ngasemmi ke’nanga sikontu barang-barang niaka anggaranna, natahammi sikontu bai’-bainea siagang ana’-anaka, kammayatompa narampasa’ ngasemmi sikontu bonena balla’ niaka ri anjo kotaya.
30Nakanamo Yakub ri Simeon siagang Lewi, "Nususai ngasemma’ antu. Kamma-kamma anne inakke nakabirisima’ tu Kanaan, tu Feris kammayatompa sikontu tau niaka anrinni ri pa’rasanganga. Ikatte taunta tena najai. Punna asse’re ngaseng anjo taua angngewa’ siagang ambundukia’, sikontu bija pammanakanta akkulle ngasengi naancuru’."
31Mingka appialimi ke’nanga angkana, "Takkulleai nabalang parekang andi’na ikambe nipare’ sangkamma baine pagau’ sala."