1Untu’ pamimping pakelong. Pammujina Daud. (21-2) O, Batara, ma’rannui karaenga lanri Kisarena kagassingang; ma’reja-rejai lanri Kisarena pammetang!
2(21-3) Kipa’jariammi apa nakaerokia pa’mai’na, na Kisare apa le’baka napala’.
3(21-4) BattuKi’ mange ri ia siagang barakka’ alla’bi-la’bi, naKipipakei songko’ karaeng bulaeng tompo’ ulunna.
4(21-5) Appalaki katallassang, naKisareang, umuru’ mala’bu sa’genna satunggu-tungguna.
5(21-6) Lanri pannulunTa nasanna’mo nipakala’biri’na, Kipa’jari masahoro’ siagang accaya.
6(21-7) Kibarakkaki untu’ situlusu’na; kahaderanTa ampa’jari sanna’ rannuna.
7(21-8) Manrannuangi karaenga mae ri Batara Kaminang Tinggia, tuli amangi lanri tuli nikamaseangi ri Batara.
8(21-9) LaNajakkala’ ngasengi sikontu musunna, laNaallei sikamma tu mangngabirissia ri KalenNa.
9(21-10) Labattui sanrapang pepe’ a’rinra-rinraya untu’ ampossoki ke’nanga. Lanipaccappuki ke’nanga lalang pangngalarroinNa Batara, ri pepe’ appakamutunga.
10(21-11) Tena latassesa battu ri turunganna ke’nanga, lanitumpasa’ ngasengi ke’nanga ri karaenga.
11(21-12) Punna appare’ rancana ke’nanga langngewai karaenga, tala’jariai akkala’ balle-ballena ke’nanga.
12(21-13) Lanapabuccuki ana’ panana, sa’genna a’boko lari ke’nanga.
13(21-14) Mammuji ikambe mae ri Katte o, Batara, lanri lompoNa koasaTa, makkelongi ikambe mammuji ri kaporeanTa.