1Pammujina Daud. Kelong-kelong ri wattunna niresmikang Balla’Na Batara ri Yerusalem. (30-2) Mammujia’ mae ri Katte, o, Batara, saba’ le’ba’ma’ Kipasalama’ siagang tena Kibalang parekanga’ nigorai ri musungku.
2(30-3) Batara Allata’alaku, akkioka’ mae ri Katte appala’ tulung, nampa Kipammollea’ ri garringku.
3(30-4) Kilappassanga’ battu ri lino kamateanga, Kipattallasakka’ battu ri alla’na sikamma tau matea.
4(30-5) Kelongangi lagu pammuji-mujia mae ri Batara, he, umma’Na tamamminraya, siagang appala’ sukkurukko mae ri Kaminang Matangkasaka.
5(30-6) Nasaba’ sinampe’ji larro Batara, kabajikanNa sa’genna sikontu umurutTa. Ri wattu bangngi nakuangngarru’, mingka battui bari’basaka angngerang karannuang.
6(30-7) Ri wattunna amang kukasia’, kukana, "Tena kulanibeta!"
7(30-8) Saba’ baji’ pa’maikKi’ mae ri nakke, o, Batara, Kipa’jaria’ sanrapang moncong kassaka. Mingka ribokoanganna accokkoKi’ battu ri nakke, na kua’jari malla’mo.
8(30-9) Akkioka’ mae ri Katte, o, Batara, ri Kattema’ appala’,
9(30-10) "Apa matu-matungku mae ri Katte punna matea’ siagang naunga’ ri kali’bong kuburuka? Maka lakkullei tu matea mammuji mae ri Katte siagang nakabarrang tamamminraTa?
10(30-11) Kipilangngeria’, o, Batara, siagang Kikamaseang laloa’. O, Batara, Kitulung laloa’!"
11(30-12) Piraungku Kipinrai a’jari a’joge’ rannu, Kiallei si’naku nampa Kisarea’ karannuang lompo.
12(30-13) Jari taerokama’ a’mereki; kukelongangi lagu pammujia mae ri Katte, o Karaeng Allata’alaku, appala’ sukkuru’ sa’genna satunggu-tungguna!