1Untu’ pamimping pakelong. Situru’: Yedutun. Pammujina Asaf. (77-2) Assa’ra lompoa’ akkio’ mae ri Allata’ala; assa’ra lompoa’ akkio’, na napilangngeria’.
2(77-3) Ri wattungku kasukkarrang appala’ doanga’ mae ri Batara; sila’busu’ bangngi tena kulanre ampatarai limangku, mingka taerokai nisaleori pa’maikku.
3(77-4) Punna kuu’rangi Allata’ala, akkunrarenga’, punna kunawa-nawa, pila’ la’bai pa’maikku.
4(77-5) Takkullea’ napatinro Batara punna bangngi, lussaki pa’maikku sa’gengku takkullea akkana.
5(77-6) Kunawa-nawai allo-allo le’ba’ allaloa, kuu’rangi nakunawa-nawa taung-taung a’bokoa.
6(77-7) Ri wattunna bangngi kunawa-nawai, siagang akkuta’nang lalang pa’mai’, angkana,
7(77-8) "Untu’ situlusu’naka Batara antollaka’ siagang tenamo Napassiratanga’?
8(77-9) Maka ammarimi angkamaseangi ikambe? Tenamoka Narupai pole janjinNa?
9(77-10) Nakaluppaimika Allata’ala untu’ angngamaseang? Larroika, sa’genna tenamo pangngamaseanNa?"
10(77-11) Nampa kukanamo, "Iaminne ampa’risi pa’maikku, angkanaya tenamo namakoasa Kaminang Tinggia."
11(77-12) Erokka’ angngu’rangi sikamma panggaukanNa Batara, angngu’rangi sikamma gau’ appakalannasa’Na ri jammang riolo.
12(77-13) Erokka’ angngu’rangi sikamma apa le’baka Kigaukang, nakunawa-nawa sikamma bate pare’ hebatTa.
13(77-14) O, Allata’ala, sikontu panggaukanTa matangkasaki, inaika sallompona Allata’alana ikambe?
14(77-15) IKattemi Allata’ala anggaukangai gau’ appakalannasaka, le’ba’mi Kipa’nyata koasaTa ri alla’na bansa-bansaya.
15(77-16) Lalang kagassinganTa naKipakabebasa’ ummatTa, turunganna Yakub siagang Yusuf.
16(77-17) Punna nicinikKi’, o, Allata’ala, a’jari mallaki je’neka, iye’, manna dapara’ tamparanga annekkere’ todong.
17(77-18) Rammanga appaturungi bosi, a’gamarrungi gunturuka; akkilaki kilaka ri kere-keremae.
18(77-19) A’gamarrungi gunturuka, akkilaki kilaka, ta’goccangi siagang annekkereki buttaya.
19(77-20) A’jappaKi’ mannete bombang, anjappai tamparang, mingka takabateangai bate bangkenTa.
20(77-21) Sanrapang pakalawaki Kirurungangi ummatTa, tete ri Musa siagang Harun.