Dual Panel1Kelong. Pammujina golongan Korah. Untu’ pamimping pakelong. Situru’ lagu: Mahalat Leanot. Kelong pangngajara’ battu ri Heman, tu Ezrahi. (88-2) O, Batara, Allata’ala Tumappasalamakku, ri wattu allo kumakkio’ mae ri Katte, ri wattu bangngi kumandallekang mae ri Katte,
2(88-3) Poro ta’rapi’ lalo pappala’ doangku mae ri Katte, Kipilangngeri laloi pakkiokku.
3(88-4) Nitujua’ ri jai kasusaang; nia’mi ri pakke’buka kamateanga.
4(88-5) Sanrapanga’ tau lanaunga ri kali’bong kuburuka, tau tenayamo kagassinganna.
5(88-6) Nibokoia’ ri alla’na tau matea, sanrapang tunibuno, anra’ba lalang ri kuburuka, sanrapang tau Kikaluppai duduamo, tenayamo naKitulungi.
6(88-7) Kipasambila’ antama’ ri kali’bong kuburuka, ri leang kuburu’ lantanga siagang sassanga.
7(88-8) Battalaka’ nijallakkang ri pangngalarroinTa, ancurukka’ nijallakkang ri larroTa.
8(88-9) Kipakabella ngasengi sikontu passiassengangku battu ri Nakke, Kipa’jari tau appakaringikka’ mae ri ke’nanga. Takkurunga’ siagang takkullea’ assulu’,
9(88-10) a’jari tabajikai paccinikku napakamma ballasa’. Allo-alloa’ makkio’ mae ri Katte, o, Batara, ampatarai limangku appala’ doang.
10(88-11) Apaka untu’ tau matea naKigaukang gau’ appakalannasaka? Maka ambangungi ke’nanga nampa mammuji mae ri Katte?
11(88-12) Apaka lalangi ri kuburuka nikabarrang pangngamaseanTa, siagang tamamminraTa lalang ri tampa’ tau possoka?
12(88-13) Niakka tau angngassengi gau’ appakalannasatTa lalang ri sassanga, yareka kabajikanTa ri pa’rasanganna tau nikaluppaia?
13(88-14) Mingka appalakka’ pannulung, o, Batara, bari’-bari’basaka’ appanai’ pappala’ doangang mae ri Katte.
14(88-15) O Batara, angngapa Kitollaka’? Angngapa Kiallei rupanTa battu ri nakke?
15(88-16) Battu ri ca’diku inji kuballasa’ siagang niodo’ ri kamateang, dodonga’ ampisa’ringi hukkunganTa.
16(88-17) Niancurukka’ ri pangngalarroi lompoTa; possoka’ ri pa’bakka hebatTa mae ri nakke.
17(88-18) Sikabusu’na alloa sanrapangi a’ba pangngalarroinTa angkulilingia’, antammulilia’ battu ri kere-keremae.
18(88-19) Kipakabellai battu ri nakke bela-bela bajikku, sassanga mami angngaganga’.