Dual Panel1Nakana Karaeng Allata’alana Israel, "Cilakako he ikau sikamma pamimping ampanrakiai siagang ampasisa’la’-sa’lakai ummakKu! Ikau ngaseng mustina nuparakai ummakKu, mingka tena nanugaukangi kammaya; nubalang parekangi tassiara’, lari. Kamma-kamma anne laKuhukkungko lanri kaja’dallannu.
2(23:1)
3Mingka sesa-sesanna ummakKu laKupasse’rei battu ri sikamma pa’rasangang tampa’na ke’nanga Kupela’. LaKuerangi ke’nanga ammotere’ mange ri butta passolongang cera’na, siagang jari-jarina ke’nanga lakatambangi jaina.
4LangngangkaKa’ pamimping untu’ amparakai ke’nanga. Tenamo nalamalla’ yareka annekkere’ ummakKu; tenamo manna sitau ke’nanga latappela’. INakke, Batara, anne akkana."
5Nakana Batara, "Lanarapiki sallang wattunna, naKuangka’ sitau karaeng adeleka battu ri jari-jarina Daud. Anjo karaenga lacara’deki batena ammarenta, siagang nagaukangi apa adeleka siagang annabaya ri sikontu pa’rasanganga.
6Punna ammarentai, lasalamaki tu Yehuda, siagang tu Israel lattallasaki siagang amang. Anjo karaenga lanigallaraki ‘Batara Kasalamakkanta’.
7Lanarapiki sallang wattunna, natenamo nalassumpa taua lalang arengKu, Allata’ala mattallasaka, angngerangai umma’ Israel assulu’ battu ri Mesir,
8passangalinna lanri iNakke, Allata’ala mattallasaka, angngerangai umma’ Israel assulu’ battu ri se’reang pa’rasangang ri bageang wara’, siagang battu ri sikontu pa’rasangang maraeng tampa’na ke’nanga le’ba’ Kupasiara’. Lammantangi ke’nanga ri butta passolongang cera’na."
9Iaminne pasangku ri sesena na’bi-na’bia: Ancuruki atingku siagang annekkerekka’. Batara siagang kana matangkasa’Na ampa’jaria’ rapang tau nasa’ring lanri jai duduna anggoro’ kuinung.
10Pa’rasanganta rassi siagang tau tenaya namajarre’ tappa’na mae ri Batara. Ja’dalaki ke’nanga lalang katallassanna siagang napake salai kakoasanna ke’nanga. Lanri pangngalarroinNa Batara, a’jari kalotoroki rukuka ri parang siagang sikontu pa’rasanganga susa ngasengi.
11Nakana Batara, "Na’bia siagang imanga taerokai mannuruki ri Nakke. Ba’lalo Kurapikangi ke’nanga a’gau’ ja’dala’ ri BallakKu.
12Lanri kammana anjo, oloanna ke’nanga la’jari laccuki siagang sassangi, sa’genna tatto’ro ke’nanga na tu’guru’. LappabattuA’ kacilakang mae ri ke’nanga, punna narapi’ wattunna untu’ Kuhukkung ke’nanga. INakke, Batara, anne akkana.
13Kucini’mi dosana sikamma na’bi-na’bina Samaria. A’bicarai ke’nanga lalang arenna Rewata Baal, siagang napasala oloangi Israel, ummakKu.
14Mingka Kuciniki ri Yerusalem na’bi-na’bia nagaukangi la’bi ja’dalaka pole. A’balle-ballei ke’nanga siagang a’gau’ bawangi, kammayatompa naturukiangi taua a’gau’ ja’dala’, sa’genna manna sitau tania’ ero’ toba’. Untu’ iNakke yangasenna anjo ke’nanga ja’dalaki sangkamma pandudu’na Sodom siagang Gomora."
15Nakana Batara Kaminang Koasaya, "LaKusarei anjo sikamma na’bia ri Yerusalem lamung-lamung pai’ untu’ nakanre siagang racung untu’ nainung, lanri passabakkang iaminjo ke’nanga nasikontu taua ri pa’rasanganga tenamo napakalompoA’."
16Mae ri pandudu’na Yerusalem, Nakana Batara Kaminang Koasaya, "Teako pilangngeri kana-kananna sikamma na’bia, tuli ampabattuangko panrannuang kosong bawang. Pikkirang napare’ kalenna bawang ke’nanga anjo napabattua, teai pasangKu.
17Mae ri sikamma tau taeroka ampilangngeri kana-kanangKu, tuli nakana ke’nanga, ‘Lasalamakko.’ Nampa mae ri sikamma tau kapala batua, nakana ke’nanga, ‘Tena nulanggappa bala.’"
18Kukana, "Tena manna sitau battu ri sikamma anjo na’bi-na’bia angngassengi apa takkimbolonga lalang ri pikkiranNa Batara. Tena battu ri ke’nanga le’ba’ allangngereki siagang ampahangi rancana-rancanaNa; tena todong amparhatikangi yareka anjampangi kana-kananNa.
19LarroNa Batara rapangi anging barubu a’jalloka siagang antujui sikamma tau ja’dalaka.
20Talanaungai larroNa lalang tenanapa na’rupa ngaseng sikontu rancanaNa. Ri bokoangallo lanapahang bajiki umma’Na Batara anjo passalaka."
21Nakana Batara, "Attojeng-tojeng sikali anjama anjo na’bi-na’bia, padahala’ tena naKusuroi ke’nanga. ArengKu napau ke’nanga appabattu kabara’, padahala’ tena pasang Kupassareang mae ri ke’nanga.
22Ebara’ angkana naassengi ke’nanga apa takkimbolonga lalang ri pikkirangKu, tantu napabattumi ke’nanga mae ri ummakKu sikontu le’baka Kupau. Nalatoba’ ummakKu battu ri dosa-dosana siagang battu ri panggaukang ja’dalaka.
23INakke Allata’ala niakKa’ ri kere-keremae, tena nanjoreng ri se’reang tampa’ bawang.
24Tena manna sitau akkulle ancokkoi kalenna battu ri paccinikKu, nasaba’ niakKa’ ri kere-keremae, ri suruga siagang ri lino.
25Sikontu anjo apa napaua na’bi-na’bia Kuassemmi. ArengKu napake ke’nanga a’balle-balle angkanaya natarimai pasangKu ke’nanga lalang so’na.
26Sa’ge kemae anjo na’bi-na’bia ero’ ampa’lingui ummakKu siagang kabara’ napare’-pareka kalenna ke’nanga?
27Nipikkiriki ke’nanga angkanaya lanri anjo so’na-so’na nacaritaya, nakkullemo takkaluppa ummakKu mae ri Nakke sangkamma batena boe-boena ke’nanga takkaluppa ri Nakke nampa anynyomba ri Rewata Baal.
28Na’bi asso’naya musti angkanai, ‘Anne poro so’naji bawang.’ Mingka na’bi anggappaya pasang battu ri Nakke musti napabattui anjo pasanga siagang sitojennaya. Gandunga takkulleai nipasangkamma rarame.
29KanangKu rapangi pepe’, siagang rapangi palu-palu angngancuruka batu!
30LaKuewai na’bi-na’bi appabattua pasang battu ri aganna tonji, nampa nakana anjo pasanga pasang battu ri Nakke.
31LaKuewa tongi na’bi-na’bi appabattua kana-kana kalenna tonji, nampa nakana anjo kanaya kana battu ri Nakke.
32INakke, Batara, langngewai na’bi-na’bi ampabattuai so’na-so’nana a’balle-ballea kabusu’. Napa’lingui ummakKu lanri balle-ballena siagang carita kosonna ke’nanga. Tena naKusuroi anjo na’bi-na’bi kammaya. Tena sikali matu-matunna ke’nanga mae ri ummakKu. INakke, Batara, anne akkana."
33Nakana Batara, "Yeremia, punna kalase’renna tau battu ri ummakKu, yareka kalase’renna na’bi yareka imang akkuta’nang ri kau angkana, ‘Apa pasanNa Batara?’ Musti appialiko angkana, ‘Ikaumi pisangnganNa Batara; lanri kammanami anjo nalaNapelakko.’
34Punna kalase’renna ummakKu yareka na’bi yareka imang a’bicara iji ri passala’na ‘pisangnganNa Batara’, ia siagang kaluargana laKuhukkungi.
35Kabalekanna, tunggala’ taua mustina napakkuta’nangngangi mae ri aganna siagang kaluargana angkanaya, ‘Apa pappiali battu ri Batara?’ yareka ‘Apa Nakana Batara?’
36Takkulleami ke’nanga ammake kana-kana ‘pisangnganNa Batara’. Punna nia’ ija ampakei anjo kana-kana kammaya, laKupa’jari anjo pasangKu a’jari pisangngang tojeng mae ri kalenna. Tau angkanaya ‘pisangnganNa Batara’ poro natunggennaja bicarangKu, Allata’alana ke’nanga, Allata’ala mattallasa’, Batara Kaminang Koasaya.
37Akkullea bawang napau mae ri na’bi-na’bia iamintu angkanaya, ‘Apa papialinNa Batara mae ri kau? Apa Nakana Batara?’
38Punna nia’ taeroka mannuruki ri anjo parentaKu, nampa napake ija kana-kana ‘pisangnganNa Batara’,
39laKurappungi ke’nanga nampa kupasambila bella-bella, baji’ nakalenna ke’nanga kammayatompa kota le’baka Kupassareang mae ri ke’nanga siagang mae ri boe-boena ke’nanga.
40LaKupa’jari siri’-siriki ke’nanga siagang a’jari tuna sa’genna satunggu-tungguna, kammayatompa anjo sarenna ke’nanga talanikaluppaiyai ri taua."