Dual Panel1Iaminne pappasanNa Batara ri sesena Moab. Kota Ar siagang Kir laniancuruki lalang sipattang, siagang pa’rasangang Moab la’jari sino sikali.
2Pandudu’na Dibon angngambiki nai’ ri buluka untu’ mange angngarru’ ri tampa’ panynyombanga ri rewata-rewataya. Pandudu’na Moab si’nami angkarruki kota Nebo siagang Medeba. Nacukkuruki uu’na siagang janggo’na tanra susana ke’nanga.
3Sikamma tau niaka ri aganga ammakeang karungi pammatei susana; appiraungi siagang angngarruki taua ri paranga siagang ri pattongko’na ballaka.
4Appiraunga tojemmi tu Hesybon siagang tu Eleale, na kalangngerang sa’ranna ke’nanga sa’genna mange ri Yahas. Ba’lalo sikamma tantaraya annekkere’mi; tappela’mi kabaranianna ke’nanga.
5Kukamaseangi Moab! Pandudu’na a’lette’mi mange ri kota Zoar siagang Eglat-Selisia. Nia’ angngambi’ ri oloang mangea ri Luhit nampa angngarru’; nia’ lari mange ri Horonaim nampa ammarrang-marrang natuju bala.
6Je’ne’ binangana Nimrim siagang ruku’ attimboa ri birinna kalotoro’ taba sikalimi, tenamo timbo-timboang moncongbulo.
7Nia’ tau a’limbang ri pangka binangana Haarabim siagang nausahai ampasalamaki sikamma barang-baranna ke’nanga.
8Kemae-kemae ri pa’baeng-baenna Moab nia’ kalangngerang sa’ra tau ammarrang. Piraunga kalangngerangi ri Eglaim siagang Beer-Elim.
9Ri Dibon a’jari ejai je’ne’ binangaya lanri accampuruki cera’. Siagang laNapabattui Allata’ala apa-apa la’bi hebaka pole mae ri tau niaka anjoreng. Nakiringi mange anjoreng pabuno-bunoa untu’ ambunoi sikontu tu Moab niaka ija attallasa’.