Dual Panel1Iaminne pappasang ri passala’na tu Mesir. Battui sallang Batara mange ri Mesir a’dongko’ rammang gassinga larina. Annekkere’ ngasengi sikamma barhalana tu Mesir ri dallekanNa siagang ca’dimi nyawana tu Mesir napakamma.
2Nakana Batara, "LaKupa’jari pa’bundukanga ri para tussari’battanga ri Mesir: Sari’battang ambaliangi sari’battanna, siampi’ balla’na ambaliangi siampi’ balla’na, kota se’reanga ambaliangi kota maraenganga siagang kakaraengang se’rea ambaliangi kakaraengang maraengannaya.
3LaKupassala-salangi sikamma rancanana tu Mesir siagang laKutepoki sumanga’na ke’nanga. Lappala’ tulungi ke’nanga mae ri barhala-barhalaya, lappalaki pappakainga’ siagang pangngunju’ mae ri sanro-sanroa siagang roh-roh tanicinika.
4LaKupassareangi Mesir mae ri se’rea karaeng pallaka ammarenta siagang jekkonga. INakke, Batara Kaminang Makoasaya, anne le’ba’ akkana kamma."
5Lanaungi je’ne’na Binanga Nil, sa’genna pila’ sallo pila’ kalotoro’.
6Sikamma tarrusang je’neka la’rasa bottoki ri wattunna pila’ cappu’ je’nena. Borong nipaya siagang rukuka la’jari kalumengi.
7Sikontu pa’bineang niaka ri biring-birinna Binanga Nil la’jari kalotoroki nampa niri’bakang ri anging.
8Sikamma paboya jukuka, ia biasaya anjakkala’ juku’ ri anjo binangaya lakkunrarengi siagang lappiraungi lanri tenamo matu-matunna pekanna siagang jalana ke’nanga. Sikamma patannunga tappu’ minasami;
9anjo ke’nanga siagang pakanre gajina lasi’na pa’mai’na siagang latappuki sumanga’na.
10(19:9)
11Teai sipato’ dongo’na sikamma pamimpinna kota Zoan! Tu Mesir kaminang cara’deka assare pappakainga’ tolo! Baranina ke’nanga angkana mae ri karaenga angkana turungannai ke’nanga tu cara’de’ siagang karaeng-karaeng turiolo dudua!
12He, karaeng Mesir, kemae sikamma tu mappakainga’na anjo karaeng cara’deka? Barang naassengi ke’nanga apa Narancanakanga Batara Kaminang Makoasaya mae ri Mesir.
13Sangnging tau dongo’ ngaseng sikamma pamimpinna Zoan siagang Memfis. Teai ke’nanga pamimping, mingka ba’lalo napalampa salaji bansana.
14Batarami ampa’jari ke’nanga assarei pappakainga’ appakalingu. Kale’bakkanna sala ngasemmi apa nagaukanga Mesir, ta’royong-royommi rapang tau nasa’ring, ta’laccirika rate ri langngena tonji.
15Tenamo tau ri Mesir nia’ ija pakkullena, baji’ na tukoasa kammayatompa ra’yaka, baji’ natau niparalluang kammayatompa tau biasaya.
16Nia’ sallang se’re wattu nala’jari pa’malla’-mallakkang siagang ballorang tu Mesir sangkamma tubaine. Annekkereki napakamma malla’ punna nacini’ Batara Kaminang Makoasaya ampaentengi limanNa untu’ anghukkungi ke’nanga.
17Butta Yehuda la’jari appakamallaki mae ri tu Mesir punna nipiu’rangiang ke’nanga mae ri kaputusang le’baka Napattantu Batara Kaminang Makoasaya ri sesena ke’nanga.
18Anjo wattua bicara Ibrani lanipake lalang ri lima kota ri Mesir. Lappareki sumpa tau niaka anjoreng lalang arenNa Batara Kaminang Makoasaya. Kalase’renna anjo kotaya laniarengi "Kota Mataallo".
19Anjo wattua ri pappokokanna pa’rasangang Mesir lania’ se’re tampa’ pakkoro’bangngang mae ri Batara, siagang ri pa’baeng-baenna nia’ se’re benteng batu nisa’la’ akkale-kalea untu’ Batara.
20Anjo tampa’ pakkoro’bangnganga siagang anjo bentenga a’jari pannanrai ri kahaderanNa Batara Kaminang Makoasaya ri Mesir. Punna nijallakkang anjo bansaya, nampa akkio’ ke’nanga appala’ tulung mae ri Batara, nia’mo sitau lanisuro battu untu’ ampasalamaki ke’nanga.
21Lanapa’nyatai KalenNa Batara mae ri bansa Mesir, siagang laniassemmi kammayatompa lanisombami ri ke’nanga, siagang langngerammi koro’bang siagang passare ke’nanga mae ri Ia. Assumpami siagang a’janjimi ke’nanga mae ri Ia, nampa narupai anjo janjinna.
22LaNipangngajarimi anjo tu Mesir ri Batara, mingka le’baki anjo Napa’jari baji’mi ke’nanga ammotere’. La’gilimmi ammotere’ ke’nanga mae ri Batara, siagang laNapilangngerimi Batara pappala’ doanna ke’nanga kammayatompa Napa’jari baji’mi ke’nanga ammotere’.
23Anjo wattua lania’ agang lompo battu ri Mesir sa’genna mae ri Asyur. Pandudu’na anjo ruaya pa’rasangang la’lampai siagang lammotereki numalo anjoreng ri anjo aganga, siagang lasiagangi ke’nanga anggaukangi ibadaya.
24Anjo wattua lasangkammai empoanna tu Israel siagang tu Mesir kammayatompa tu Asyur, tallu-talluna anjo bansaya la’jari barakkaki mae ri sikontu linoa.
25Batara Kaminang Makoasaya lambarakkaki ke’nanga siagang Nakana Batara, "Kubarakkaki ngasengko, he ikau tu Mesir ummakKu, Asyur tu Kupa’jaria, siagang Israel umma’ Kupilea."