Dual Panel1Batara le’ba’ angngangkaki Kores a’jari karaeng; ia nisuro ambetai sikamma bansa-bansaya siagang antepoki kakoasanna sikamma karaenga. Batara lassungkeangi sikamma pakke’bu’ lompona kotaya, tena manna se’re lammantang tattongko’. Nakana Batara ri ia,
2"INakke lampasadiangko oloang; laKulapparri monconga siagang buluka, sikamma pakke’bu’ tambagaya laKureppeki, na sikamma panjoli bassina laKutepoki.
3Na laKusareko kakalumanynyangngang taccokko, sollanna nuasseng angkana iNakkemi Batara, Allata’alana Israel, le’baka angkiokko situru’ arennu.
4Kukiokko siagang Kusareko areng pa’gallara’, manna natena nanuassengA’. Kusareko tugasa’ untu’ antulungi atangKu Israel, nasaba’ anjo ke’nanga bansa nipileKu.
5INakkemi Batara, tena pantaranganna, iNakke Allata’ala Kaminang Se’re-se’rea. Le’ba’ mako Kusare sanjata, manna natena nuassengA’.
6NaKugaukang ngaseng sikammaya anjo sollanna appakkaramula battu raya sa’genna kalau’ sikontu taua naassengi angkana iNakke Batara, tena allata’ala pantaranganna iNakke.
7INakke ampa’jari singaraka siagang sassanga, iNakke ampabattui barakkaka siagang balaya. INakkemi Batara anggaukang ngasengi anjo sikammaya.
8Kupaturungi pammetanga battu ri langika rapang bosi, nasungkei kalenna buttaya untu’ antarimai, nampa napattimbo kasalamakkanga siagang kabebasanga; iNakkemi Batara ampa’jari ngasengi anjo sikammaya."
9Cilakai tau eroka a’gea’ siagang Mappa’jarina; rapangi uring butta angngewayai tumappare’na. Maka akkuta’nangi butta pika mae ri papare’ uring buttaya, angkana, "Apa antu nupare’?" Maka akkunrarengi anjo uringa angkanaya tena kacara’dekanna anjo tumappare’na?
10Cilakai tau akkuta’nanga mae ri tau toana angkana, "Angngapa nakunilassukang kamma anne?"
11Batara, Allata’ala matangkasa’na Israel Nakana, "Kuta’nangA’ ri passala’ allo labattua. Mingka teako akkuta’nangngi ri passala’ ana’-anakKu, yareka assuroA’ appare’ apa-apa.
12INakkemi Batara ampa’jariai buttaya, siagang ampa’jari rupataua untu’ ampammantangngi. Lanri koasaKu naKuka’rang langika, siagang amparentai mataalloa, bulanga na sikamma bintoenga.
13INakke ampagioki Karaeng Kores untu’ anggaukangi erokKu siagang ampaentengi kaadelanga. INakke allappari sikontu agang naoloa. Lanabangungi ammotere’ kotaKu Yerusalem siagang lanalappassangi ummakKu nitahanga, na tanisarea doe’ pammuccu’ yareka pa’bayara’." Batara Kaminang Makoasaya anne le’ba’ angkana.
14Nakana Batara mae ri tu Israel, "Patangi wassele’ buttana Mesir siagang passawallanna Sudan. Sikamma tu Syeba barania a’jari ikau pata; a’jappai ke’nanga ri bokonu nisikkokang limanna. Lasu’juki siagang lamangakui ke’nanga angkana, ‘Ma’nassa nia’ tojengi Allata’ala ri tangnga-tangnganu; tena allata’ala pantaranganna Ia!
15Allata’ala ampasalamaki Israel Iami Allata’ala ancokkoai KalenNa.
16Sikontu tau appareka patung barhala; lanipakasiriki siagang lanihinai.
17Mingka Israel Nipasalamaki ri Batara; lattahangi kasalamakkanna. Ikau ngaseng tena nulanipakasiri’ siagang lanihina sa’genna satunggu-tungguna.’"
18Batara ampa’jari langika, Iami Allata’ala! Iami ampa’jari siagang ampareki buttaya, Najarreki pare’na na tuli ammenteng. Tena Napa’jari tampa’ sino, mingka a’jari tampa’ untu’ nipammantangngi. Iami angkana, "INakke Batara, tena pantaranganna.
19Tena Kuccokko-cokko a’bicara, yareka a’bicara rahasia. Tena Kusuroi ummakKu Israel sia-sia amboyai KalengKu. INakke, Batara, Makkana tojeng, siagang ampaui apa annabaya."
20Nakana Batara, "A’rappung mako siagang battu mako assama-sama, ikau ngaseng tau ta’lappasaka ri bansa-bansaya! Dongoki tau a’balulunga anrurungangi patung kayua, siagang appala’ doanga mae ri rewata-rewataya ia tenaya nakkulle appasalama’.
21Pamajumi parkaranu, paridallekammi butti-buttina, iyo, boli’mi kamma appare’ ke’nanga passitujuang. Inaika angkabarrangi anjo passalaka siagang le’ba’ ampaui baku’ battu riolo iji? Sai iNakke, Bataraya? Tena allata’ala pantaranganna iNakke. INakkemi Allata’ala adeleka siagang Mappasalamaka, tena maraeng pantaranganna iNakke!
22He, sikontu pandudu’na buttaya, pasailemi kalennu mae ri Nakke sollannu Kupasalama’, saba’ iNakkeji bawang Allata’ala, tena pantaranganna!
23INakke le’ba’ a’janji, na janjingKu tena nalasala-salang; lanri KalengKu na Kuassumpa: Tunggala’ taua lakkulantuki ri dallekangKu, lalang massing bahasana a’janji massing talamamminraya mae ri Nakke.
24Lanakana ngaseng taua, ‘Bataraji bawang nakabattui kaadelanga siagang kagassinganga!’ Sikontu tau birisika mae ri Nakke labattui mae ri Nakke na’jari siri’-siri’.
25Mingka turunganna Yakub lanipasalamaki, na lamammuji ke’nanga ri Nakke, Bataraya.