Alkitab Mobile SABDA
[VER] : [MEYAH]     [PL]  [PB] 
 <<  Filipi 4 >> 

1Erek koma jefeda, edohuji ongga dudou okora eteb rot, iwa yut rot ahais gij mar insa koma nomnaga oisouska Yesus Kristus ongga ofij iwa ojgomuja. Noba didif dudou os diker morototuma jera iwa deika. Jeska mar oufamofa ongga iwa intunggom bera ereita dudou efesi erirei eteb rot ojgomuja. Noba didif dudou efesi bera eskeiramera eteb rot iwa tein.

2Noba didif duis gu Euodia jera Sintike jeskaseda gojaga koma goga onomosokuma rot mar guru. Jeska goga geita mar ongga oufamofa erek gosnok gegeka ongga gororu Tuhan rot tenten fob.

3Noba didif duis gu bua Sunsugos, dedin edohuj egens ongga odou ocosu efei ahtah, jeskaseda bua bufij gojaga insa koma rot mar ongga goga omosokuma rot insa koma. Jeska gojaga insa koma gomfij didif rot iskusk gij mona ongga didif duftuftu mar rot Yesus oga ongga oufamofa jah suma sis fob. Goga gofij didif morototuma jera Klemen, noba jera dedin edohujir enjgineg tein ongga rudou ocosu efei ahtah noba ongga rufij Tuhan Yesus morototuma jera didif. Rua insa koma nomnaga bera rerin rufoka ongga Allah onggu gij efen buku eiteij ah fob. Jeska Allah onggu rot rusnok rufoka nomnaga ongga rimesma riteij ah ongga ah aibin.

4Iwa idou efaga ouka eteb ojgomuja, jeska iwa bera erek egens jera Tuhan Yesus Kristus fob! Didif dagot mar insa koma juens deika gu iwa oida, iwa idou efaga ouka eteb ojgomu!

5Iwa icunc rot idou ongga ongkoskamoka skoita rusnok nomnaga jeskaseda rua rik rot teinefa yeyin idou ongga oufamofa ojgomu. Jeska erek dektek deika guru, beda Tuhan Yesus emen si.

6Erek koma tein, iwa idou enefeneinei rot yeyin iteij ah kef erek oskiyai tein guru. Tina iwa yum iteij gu Allah osok gij mar meidu ongga ereneni iwa ojgomu. Koma bera, iwa yagot gu Ofa rot mar ongga iwa indou os rot ojgomu. Noba gij mona insa koma bera yuis oufamofa eteb skoita Ofa tein.

7Beda Allah omofij iwa jeskaseda idou efesi eskeiramera ojgomuja. Noba erek iwa idou enebriyi gij rot teinefa Ofa eita idou ongga eskeiramera rot koisoisa enesi, beda enadaij nou iwa ijekjeka idou efesi rot mar egema tein deika guru. Jeska Allah emeita mar insa koma nomnaga oisouska idou ongga erek egens jera Yesus Kristus fob si.

8Erek koma jefeda edohuji, iwa isujohu rot mar nomnaga ongga ongkoskamoka ojgomu, noba ongga erek mimif misitit Allah rot ojgomu. Koma bera, iwa isujohu rot mar ongga erek tenten ni, mar ongga rusnok rudou os rot ni, mar ongga oufamofa ahah Allah eiteij ni, mar ongga eita rusnok rudou eskeiramera rot ni, mar ongga ereita rusnok rudou oufamofa skoita iwa rot ni, erek koma ojgomuja.

9Noba iwa ita mar nomnaga jeni erek iwa imfokor gij jeska didif fob, era ongga didif duncunc gu iwa sis fob, era ongga iwa ingk oida didif duntunggom fob ojgomu. Iwa ita mar erek koma nomnaga ojgomu. Noba mifmin Allah, ongga eita mudou efesi ongga eskeiramera gu mimif, bera omofij iwa rot si.

10Didif disitit gu Tuhan rot iwa jeska sis fob bera iwa yumfij didif fogora insa mar skoita didif. Jeska gij mona ongga dektek fob bera dinesma mar egema tein jeska guru. Erek koma tina ebeibeyaif bera iwa incunc gu didif rot oida idou okora rot didif ojgomuja ros fogora iwa insa mar koma skoita didif fob. Noba didif dijginaga rot oida iwa idou os yufij didif gij mona ongga sismeni fob tein. Noba didif dijginaga rot oida idou okora rot didif gij mona ongga sis fob tein. Tina sis fob bera iwa yeyin mona efekesa nou yufij didif enesi.

11Didif dinagot rot mar insa kef jeska didif ducosu rot mar jeska iwa deika guru. Jeska didif dudou eskeira gij mona ongga dedin mar ongga enadaij guru, jera mona ongga dedin mar ongga ofoukou ros tein ojgomu.

12Jeska gij mona juens bera mosona eteb ongk didif. Noba gij mona egema deika bera dedin maat ofoukou tein. Erek koma tina didif dita dudou ongga eskeira gij mona ongga egeka insa koma tein ojgomu. Gij mona ongga mosona ongk didif ni, gij mona ongga didif dit maat ofoukou ni, gij mona ongga didif disma mar ongga oskiyai ojgomu ni, era gij mona ongga didif disma mar ongga ofoukou tein ni, koma bera dudou eskeira rot mar insa koma nomnaga ojgomuja.

13Jeska oisouska owesa efek ongga en jeska Yesus Kristus bera adaij nou didif dita dudou ongga ahais gij mar nomnaga ongga angh gu didif ojgomuja.

14Erek koma tina didif duis oufamofa eteb gu iwa jeska ebeibeyaif bera iwa yumfij didif rot mar ongga ducosu rot gij mona insa kef ongga mar okum ah keingg didif fob.

15Noba iwa ongga ingker gij Kota Filipi ijginaga rot tein oida, gij mona ongga didif dumftuftu mar rot Allah oga gij monuh Makadonia oisa fob fogora dinja jeska, beda rusnok ongga Mod Ari egema tein bera runofij didif rot mar ongga ducosu rot guri. Tina iwa isinsiyai bera ongga yumfij didif rot mar ongga duncosu rot gij mona insa koma ojgomu.

16Erek koma tein, gij mona ongga didif dingker gij Kota Tesalonika ros, beda iwa yumfij didif rot mar ongga ducosu rot erek ofosma ofoukou fob.

17Didif danggot rot mar insa kef jeskaseda diradgodu iwa fogora yufij didif guru. Tina didif dagot rot mar erek insa kef jeska didif dudou os rot oida Allah eita oufamofa ekirsa dokun deika gu iwa rot mar ongga intunggom nou didif fob.

18Noba ebeibeyaif bera didif disma mar nomnaga ongga iwa insa gu didif sis fob. Jefeda didif dedin mar nomnaga ongga erek eteb ekirsa fob, jeska Epafroditus bera orka mar insa koma ongga iwa insa skoita didif jah sif fob. Noba mar ongga iwa insa skoita didif fob bera erek mar ongga efen ensesa ongga iwa irougif gu Allah rot. Noba Ofa odou efesi eskeiramera eteb rot tein.

19Noba Tuhan Allah, ongga didif dugif gu noba ongga efen mar ongga ofoukou eteb ekirsa, Ofa bera emeita mar nomnaga ongga iwa icosu rot gu iwa si. Noba Ofa emeita mar insa koma odou ongga eskeiramera eteb rot iwa jeska iwa bera irek egens jera Yesus Kristus fob.

20Mimif muis oufamofa eteb gu mifmin mika Allah ojgomuja gij mona ongga ah aibin tein. Ainsoma.

21Didif duisu Allah efen ruforoker nomnaga ongga ruroru Yesus Kristus jah suma. Noba rua ongga rumfij didif jah sif bera ruisu iwa tein.

22Noba Allah efen ruforoker ongga ringker gij kota kef tein, jera rua ongga rumfij raja Kaisar gij efen mod jah sif tein bera ruisu iwa nomnaga.

23Didif dum diteij gu Tuhan Yesus Kristus jeskaseda Ofa eita oufamofa eteb gu iwa ojgomuja. Ainsoma.


  Share Facebook  |  Share Twitter

 <<  Filipi 4 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel