Alkitab Mobile SABDA
[VER] : [MONGONDOW]     [PL]  [PB] 
 <<  Markus 1 >> 

1Na'a in Habar Mopia soaáḷ ki Yesus Kristus, ki Adií i Allah.

2Habar Mopia tatua pinangkoi naí inta pinais i Nabi Yesaya, nana'a: Ki Allah noguman: "Na'adon in totabaí-Ku, 'Pinotabaí-Ku in sia umuna ko'i-Nimu, simbaí sia momontang kon daḷan baya'an-Mu.'

3Oyuíon intau nobaḷuí kom padang gurun, 'Sadia'aidon daḷan ko'i Tuhan; tuḷidon in daḷan baya'an-Nya.'"

4Naonda no'ipais daí natua domandon ki Yohanes no'iangoi kom padang gurun. Sia nobaptis ko intau bo nopota'au in Habar nongkon i Allah. Ki Yohanes noguman, "Mo'ikow musti mogogaidon mogaid kon dosamu mita bo musti baptison, simbaí ampungan i Allah mo'ikow."

5Daí bayongan intau inta nongkon butaí in Yudea bo inta nongkon kotaí in Yerusalem namangoi nokidongog ko'i Yohanes. Mosia nongaku kon dosa mita monia, bo binaptis i Yohanes im mosia kon Ongkag in Yordan.

6Ki Yohanes nogiḷambung in ḷambung inta nongkon bubuḷ in unta. Ba'annya nongkon kulit bo ka'anonnya im pangkoḷaí bo diluí ing kayuon.

7Sia noguman doman nana'a: "Mo'iduduimai ko'inakoí mo'iangoi intau inta kawasa-Nya no'iliu ko'inakoí. Umpakah tongaí kumuyung mobukaí kon togot in sapatu-Nya, yo diaíbií patus in aku'oi.

8Aku'oi mobaptis ko'i monimu in tubig, ta'e Sia Mopobaptis in Roho i Allah ko'i monimu."

9Kon wakutu intua namangoi ing ki Yesus nongkon Nazaret butaí ing Galilea bo binaptis i Yohanes kon Ongkag in Yordan.

10Naonda ing ki Yesus nobatundon nongkon tubig tatua, inontong-Nya ḷangit nobukat bo Roho i Allah noponag dinumompaí ko'i-Nia naíonda bo paḷoma.

11Poḷat kinodongogan in singog i Allah noguman, "Ikowbií ing ki Adií-Ku inta kinotabi-Ku, Ikowbií ing kinosanang ing gina-Ku."

12No'iduduimai kon tua Roho i Allah nodia ko'i Yesus minayak im padang gurun.

13Opat nopuḷuh nosinggai Sia kon tua, bo sinoba ibilis in Sia. Mahaḷuk mita kalig kotaki-takin-Nya doman kon tua, bo malaekat mita namangoi nobantung ko'i-Nia.

14Naonda ing ki Yohanes dinomok pinobonu kom ponjara, ki Yesus minayak ing Galilea, bo nopota'au kon tua in Habar Mopia inta nongkon i Allah.

15Ki Yesus noguman, "Ki Allah ḷagidon momangkoi momarentah. Pogogaidon mo'ikow mogaid kon dosa bo popirisayadon kon Habar Mopia inta nongkon i Allah!"

16Wakutu ing ki Yesus minayak nongin pintad in Danow Galilea, noko'ontong in Sia kon intau doyowa inta mododomok kon toyak in oaíidan monia. Ki Simon bo ki ai-ainya ki Andreas in tangoi monia. Mosia koyogot molandaraí kon danow tatua.

17Ki Yesus noguman ko'i nayadua, "Duduidon ko'i-Nakoí, baí baliíon-Kudon mo'ikow mololandaraí kon intau."

18Da' baya-bayakdon sinaḷaían monia in landaraí bo dinumudui ko'i Yesus.

19Ki Yesus nongingguput kom babaya'an-Nya bo noko'ontong doman bui kon intau doyowa mogutat ibanea, ki Yakobus bo ki Yohanes in tangoi monia. Taya dua na'a ki adií i Zebedeus. Mosia na'a kom bonupa in uangga monompiamai kon landaraí monia.

20Dalií bo inoinií i Yesus im mosia. Daí sinaḷaíanmaidon monia ing ki amaí monia inta kom bonupa in uangga takin intau mita inta ginajian i amaí monia. Bo minayakdon mosia dinumudui ko'i Yesus.

21Ki Yesus bo murií-Nya mita no'idapotdon kong kotaí ing Kapernaum. Kon singgai in Sabat no'iduduimai, ki Yesus sinumu'ot kom baḷoi pososambayangan bo nomangkoidon notunduí.

22Intau mita inta nokodongog noherang bo mo'ibog kom pototunduí-Nya. Sim pototunduí-Nya mokobangkaḷ, de'eman naí pototunduí ing guru mita agama.

23Kon wakutu intua kom bonu im baḷoi pososambayangan tatua oyuíon tobatuí intau inta kinotoḷangan dimukud mora'at. Intau tatua nomaḷuí,

24"Hei Yesus, intau Nazaret, onuon-Mu ing kami? Mamangoi degaí momutuí ko'inami Ikow? Kota'auankubií Ikow: Ikow nion totabaí i Allah inta mosuci!"

25"Kibio-bioímai!" toruí i Yesus kon dimukud mora'at tatua, "ḷuaidon nongkon intau tana'a!"

26Daí totokdon ginugur in dimukud mora'at in intau tatua, onda intua takin karak iḷumuaidon in dimukud mora'at tatua nongkon intau tatua.

27Bayongan intau nongoherang totok, daí nosi-liboaíndon mosia, "Onu in na'a? Tobatuí totunduí mobagu! Takin bangkaḷon bo kawasa Sia nomarentah kon dimukud mita mora'at, bo dinuduian doman monia in singog-Nya."

28Daí habar soaáḷ ki Yesus kilat bo no'iwaya kom bayongan butaí ing Galilea.

29Naonda iḷumuai makow nongkon baḷoi pososambayangan tatua, ki Yesus takin i Yakobus bo i Yohanes minayak im baḷoi Simon bo i Andreas.

30Dodai intua ki guyaí i Simon no'itosiug makow sin notakit pinonikan patuí. Daí naonda ing ki Yesus bo murií-Nya mita no'iponikmai kom baḷoi, baḷuídon monia bo pinota'au ko'i Yesus.

31Daí ki Yesus minayak dinimiug ko'i guyaí i Simon poḷat nokadai kon limanya simbaí mobangon. Kon dodaipa doman tua bo nopia im patuínya, bo baḷuídon bobay tatua bo nogoḷud kong ka'anon ko'imonia.

32Naonda in no'ungkoḷomdon singgai, intau mita nodia mangoi ko'i Yesus kon intau nongotakit bo inta kino'toḷangan dimukud mora'at.

33Bayongan intau kong kotaí tatua noyosipun kom muna im baḷoi tatua.

34Daí bayongan takit inta norupa-rupamai kon intau mita tatua nodait inundaman i Yesus, naí doman tua in dimukud mita inta mora'at, nodait-Nya doman sinoko'untun. Diaí-Nya inogoi mosingog in dimukud mita mora'at tatua, sing kino'ta'auan monia in Sia.

35Nopo'ikoḷomai kon singgai, subuhpa, nobangondon ki Yesus bo iḷumuai. Sia minayak in tampat inta no'i tontanií bo nosambayang kon tua.

36Ta'e binayak sinayak i Simon bo yobayat-Nya mita.

37Naonda in nodungkuḷdon monia ing ki Yesus, pinota'au monia, "Bayongan intau notayak ko'i Guru."

38Tongaí ki Yesus noguman, "Koligai, kita mayakpa ing kota mita ibanea inta kon diugmai na'a, simbaí pota'au-Kupa doman ko'i monia in Habar Mopia, sin tuabií im mangale inangoian-Ku."

39Daí ki Yesus minaya-mayakdon makow kom bayongan lipuí kong Galilea bo nopota'au in Habar Mopia kom baḷoi pososambayangan monia bo noguntun kon dimukud mita mora'at.

40Tobatuí intau inta pinanyaki kusta namangoi ko'i Yesus bo sinumungkud kon tayowon-Nya poḷat noguman, "Aka kuma bo totabionpa i Amaí, yo mopiabií i Amaí in aku'oi."

41Daí notabi ing ki Yesus kon intau tatua, sahingga kinadaian-Nya intau tatua bo poḷat noguman, "Motabi Aku'oi, yo kopiadon!"

42Kon dodaipa doman tatua bo no'inggamaí im panyaki tatua bo nopiadon intau tatua.

43Onda intua ki Yesus nopotabaí kon intau tatua takin koyow:

44"Poko'ingat, dona'ai o'umanon ko'i inekadon, ta'e bayakdon ko'i imang bo pokitantuídon ko'inia kon ikow totu-totu'udon nopia. Bo pobogoi ikow kon sosumbah sukurmu podudui in atorang i Musa saḷaku bukti kon intau mita kon nopiadon ikow."

45Ta'e intau tatua minayakbií bo nongonguman magií-makow kon onu inta nobalií ko'inia tua, sahingga ki Yesus diaídon mobebas tumu'ot kong kotaí tatua. Sia tongaídon kon ḷuai ing kotaí, kon tampat mita inta mo'ingongow. Ta'e bayongan intau inta nongkon lipu-lipuíannya umuran doman mamangoi ko'i-Nia.


  Share Facebook  |  Share Twitter

 <<  Markus 1 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2018
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran