Dual Panel1Ifaigi Faulo ndrotondroto rafe zanguhuku andrõ ba imane, "He ya'ami ira talifusõgu! Irugi da'e lõ fasala ndra'o khõ Lowalangi uw̃a'õ tõdõgu ba wa'aurigu."
2Me imanõ wanguma'õ Faulo, ibe'e linia Ere Sebua Anania ba niha si zizio ba zinga Waulo ena'õ ifalisi mbawa Waulo andrõ.
3Ba imane Faulo khõ gere sebua andrõ, "Lõ tola lõ'õ Itafari ndra'ugõ Lowalangi, niha sangosatulõ! Dumadao ndra'ugõ ba da'õ ba wanguhuku ya'odo molo'õ oroisa Lowalangi nibe'e Moze, ba hiza, ya'ugõ samõsa zi lõ molo'õ oroisa Lowalangi wango'ou niha wamalisi ya'odo!"
4Lamane khõ Waulo niha si so ba zingania, "Õ'o'aya gere sebua khõ Lowalangi!"
5Itema li Faulo imane, "O, lõ u'ila talifusõ, wa ere sebua ia. Duhu, no tesura bakha ba Mbuku Ni'amoni'õ, 'Bõi õ'o'aya zalaw̃a mbanuami.'"
6I'ila Faulo wa ato õsa ba gotalua ndrotondroto rafe zanguhuku andrõ ndra Sadukai'o ba Farizai'o. Bõrõ da'õ imane ba rafe zanguhuku andrõ, "He ira talifusõ! Farizai'o ndra'odo, nga'õtõ Warizai'o. Tehuku ndra'odo ba da'e bõrõ me faduhu dõdõgu wa ifuli auri mangawuli niha si no mate."
7Me imanõ wanguma'õ, ba fakara ndra Farizai'o ba ira Sadukai'o irege tebagi dua ngasi rafe zanguhuku andrõ.
8(Bõrõ me law̃a'õ ira Sadukai'o lõ ifuli auri zi no mate, lõ hadõi mala'ika ba lõ bekhu zi mate; ba hiza faduhu dõdõ ndra Farizai'o wa so daõ fefu.)
9Alua wawukasa sabõlõbõlõ. So õsa ndra Farizai'o si tobali guru agama si zizio so timbagõ sibai da'õ. Lamane, "Molo'õ ya'aga ma'ifu lõ sala niha andre! Te so Geheha ba mala'ika si fahuhuo khõnia!"
10Itugu abõlõbõlõ wasosota irege ata'u gomandra andrõ na aekhu ira fefu wamõbõzi Faulo. Andrõ ifatenge ndra saradadu wanga'i Faulo moroi ba gotalua niha sato andrõ ba wolohe ya'ia ba gõdo sebua.
11Ba zi bongi aefa da'õ muzizio ba ngai Waulo andrõ Yesu ba imane, "Abe'e'õ dõdõu! No õfaduhu'õ Ndra'o ba Yeruzalema. Ba lõ tola lõ'õ õfaduhu'õ gõi dania Ndra'o ba Roma."
12Mahemolunia sahulõ wongi, owulo ndra niha Yahudi. Mõi ira ba hõlu lõ manga ba lõ labadu nidanõ fatua lõ labunu Waulo.
13So mato õfa wulu niha sowulo andrõ.
14Mõi ira khõ ndra ere sebua awõ ndra salaw̃a niha Yahudi, ba lamane, "No fao ndra'aga fefu wahõlusa, lõ manga ba lõ mabadu idanõ fatua lõ nibunuma Waulo.
15Sõkhi na mifa'ohe'õ zura, ya'ami awõ ndrotondroto zanguhuku, khõ gomandra zaradadu Roma wangandrõ ena'õ la'ohe Waulo mangawuli fõnami, hulõ na mihaogõ mifareso warakaronia zui. Ba mabunu ia dania fatua lõ irugi da'e."
16Ba hiza, so nono dalifusõ Waulo ira alawe zi no mamondrongo era'era dõdõra. Mõi ia ba gõdo sebua zaradadu wangombakha da'õ khõ Waulo.
17Ikaoni Faulo samõsa zaradadu ba imane khõnia, "Ohe nono matua andrõ khõ gomandra; so zomasi i'ombakha'õ khõnia."
18I'ohe nono matua andrõ saradadu khõ gomandra ba imane, "Faulo niha nitaha andrõ, zogaoni ya'o ba i'andrõ wolohe ono matua andre khõu; so zomasi ia i'ombakha'õ."
19Igogohe danga nono matua andrõ komandra ba i'ohe ia ba zinga wanofu imane, "Hadia zomasi ndra'ugõ õ'ombakha'õ khõgu?"
20Itema li ono matua andrõ, imane, "No mamagõlõ niha Yahudi wangandrõ khõu ena'õ la'ohe Waulo ba rafe Zanguhuku ba Agama mahemolu, hulõ na omasi lahaogõ wamareso farakaronia.
21Ba hiza bõi o'õ niw̃a'õra andrõ, bõrõ me tõra õfa wulu niha zamini'õ ya'ira wanarogõ. No fahõlu ira fefu lõ manga ba lõ labadu nidanõ fatua lõ labunu Waulo. Iada'e no mama'anõ ira; ha tõ wombaloi fehedeu."
22Imane komandra, "Bõi ombakha'õ gofu ha'õkhõ wa no õ'ombakha'õ khõgu da'e." Aefa da'õ ifofanõ nono matua andrõ.
23Aefa da'õ ikaoni komandra darua zaradadu ba imane khõra, "Mifa'anõ dua ngaotu wazuri ba fitu ngafulu zaradadu si fakudo ba dua ngaotu zaradadu solohe toho wofanõ bongi andre bõzi siw̃a numalõ ba Kaizarea.
24Mihenagõ gõi kudo lala Waulo ba mi'ohe ia lõ hadia ia khõ Gubernur Feliki."
25Aefa da'õ isura zura komandra andrõ, si mane da'e,
26"Nifosumange Gubernur Feliki. Tema wangowai moroi khõ Kalaudio Lisia.
27No lara'u niha andre ira niha Yahudi ba arakhagõ labunu, na lõ tohare ndra'o awõ zaradadu ba wangefa'õ ya'ia; bõrõ me urongo wa ono mbanua Roma ia.
28Bõrõ me omasido u'ila hadia sibai zala nibõbõgõ khõnia, andrõ wa u'ohe ia fõna rafe Zanguhuku ba Agama khõra.
29Hiza, oroma lõ nilaunia sala si tobali bõrõ wa tehuku famunu ia ma zui labe'e ba gurunga. Sala nibõbõgõra khõnia si fakhai ba hukuhuku agama khõra.
30Aefa da'õ te'ombakha'õ khõgu wa so gera'era si lõ sõkhi moroi ba niha Yahudi khõnia. Andrõ i'anema'õ ufa'ohe'õ ia khõu Tuha Gubernur. Ba no uw̃a'õ ba zangadu andrõ ena'õ la'ohe wangadura khõu."
31Lafalua halõw̃õra ira saradadu andrõ. Lahalõ Waulo ba la'ohe ia ba zi bongi irugi Gandrifati.
32Mahemolunia lafofanõ Waulo awõ zaradadu si fakudo, ba mangawuli ira ba gõdo sebua khõra.
33Me larugi Kaizarea saradadu si fakudo, lafa'ema zura andrõ khõ gubernur, ba latou'õ ba dangania Waulo.
34Me no aefa ibaso zura andrõ gubernur, isofu khõ Waulo heza moroi ia. Ba me i'ila wa moroi ba Gilikia Waulo,
35imane, "Lau! Ufareso dania warakaro andrõ khõu, na no larugi da'e sangadugõ ya'ugõ." Aefa da'õ ibe'e wareta ena'õ lataha Waulo ba gurunga khõ Herode.