Dual Panel1Na si manõ, hadia zi tola taw̃a'õ sanandrõsa khõ Gaberahamo, furugõ soida? Hewisa nitõrõnia ba lala wa'aurinia?
2Na ba zi no ilau zi tobali bõrõ wa I'efa'õ ia Lowalangi moroi ba zala, tatu tola manõ isuno ia samõsa. Ba hiza, lõ isuno ia fõna Lowalangi.
3No tesura ba Mbuku Ni'amoni'õ, "Mamati Gaberahamo khõ Lowalangi, ba bõrõ wamatinia andrõ wa Itema ia Lowalangi tobali sangomusoi'õ tõdõ Lowalangi."
4Latema gazi niha sohalõw̃õ; ba tebai muw̃a'õ buala gazinia andrõ, bõrõ me tana khõnia da'õ.
5Ba hiza so niha si lõ manõtõna ba halõw̃õnia samõsa; ifaduhusi tõdõ wa'aurinia khõ Lowalangi sangetu'õ fa'aefa niha moroi ba zala. Bõrõ wamatinia andrõ wa Itema ia Lowalangi tobali sangomusoi'õ tõdõ Lowalangi.
6Si manõ gõi molo'õ era'era Dawido; andrõ wa sohahau tõdõ -- iw̃a'õ Dawido, niha nitema Lowalangi tobali sangomusoi'õ tõdõ-Nia, irege lõ Itanõ ba dõdõ-Nia sa'ae gamuata niha andrõ,
7"Ya'ahowu ni'efa'õ olalõw̃a ba si no ibalugõ horõnia Lowalangi!
8Ya'ahowu niha si lõ ihuku Lowalangi ba horõnia!"
9Hadia, famahowu'õ andrõ ha ba niha solo'õ amakhoita wamoto? Hadia, si manõ gõi ba niha si lõ molo'õ amakhoita wamoto? No maw̃a'õ mege, wa Itema Lowalangi Gaberahamo tobali sangomusoi'õ tõdõ-Nia, bõrõ me mamati Gaberahamo khõ Lowalangi.
10Hamega iw̃a'õ Lowalangi da'õ? Hadia fatua lõ muboto ia ma me no aefa muboto? Fatua lõ muboto! Tenga me no aefa muboto.
11Me no aefa da'õ awena muboto ia, ba famotonia andrõ ha tandra wa no Itema ia Lowalangi tobali sangomusoi'õ tõdõ Lowalangi, bõrõ me mamati ia khõ Lowalangi. No Itema ia Lowalangi fatua lõ ni'o'õnia amakhoita famoto andrõ. Ba tobali ama ba wamati Gaberahamo ba niha fefu samati khõ Lowalangi, ba bõrõ da'õ wa Itema'õ ira Lowalangi tobali niha sangomusoi'õ tõdõ-Nia, hew̃a'ae lõ ni'o'õra amakhoita wamoto andrõ.
12Ba no gõi ama ba wamati Gaberahamo ba niha solo'õ amakhoita wamoto. Tobali ama ba wamati ia tenga ha bõrõ me no la'o'õ gamakhoita wamoto, bõrõ gõi ba wa'aurira no samati khõ Lowalangi ira, si mane Aberahamo fatua lõ nasa ni'o'õnia gamakhoita wamoto.
13Fawu'u li Lowalangi khõ Gaberahamo ba ba nga'õtõnia wa tobali okhõta Gaberahamo gulidanõ andre. Ifabu'u zi manõ Lowalangi tenga bõrõ me i'o'õ huku agama Yahudi Aberahamo, hiza bõrõ me mamati ia khõ Lowalangi wa Itema ia Lowalangi tobali sangomusoi'õ tõdõ-Nia.
14Bõrõ na ha solo'õ huku agama Yahudi manõ zanema nifabu'u Lowalangi dania, ba lõ guna wamati khõ Lowalangi, ba si lõ boto wawu'usa li Lowalangi gõi.
15Huku agama Yahudi zama'aso fanguhuku Lowalangi. Ba na lõ huku andrõ, ba lõ hadõi gõi fanawõ.
16Tobali fawu'usa li Lowalangi andrõ modanedane ba wamati niha khõ-Nia. Tobali we'ewe'e dõdõ da'õ ba nga'õtõ Gaberahamo fefu wa no buala saohagõlõ wawu'usa li andrõ nibe'e Lowalangi khõra; tenga ha ba niha solo'õ huku agama Yahudi, hiza khõra gõi samati khõ Lowalangi, si mane Aberahamo samati khõ Lowalangi. Ama ba wamati khõda Gaberahamo.
17No Iw̃a'õ Lowalangi khõ Gaberahamo, "No Ubali'õ ndra'ugõ furugõ ba soi fefu." Si manõ wame'e Lowalangi khõ Gaberahamo fawu'usa li andrõ. Ba mamati Gaberahamo khõ-Nia. Lowalangi sangorifi niha si no mate Ia; Ya'ia gõi Lowalangi samazõkhi si lõ hadõi tobali so ha faoma fehede.
18Ba hew̃a'ae lõ lala mena'õ, ba lõ mamalõ Gaberahamo ba wanõtõna ba ba wamati. Da'õ mbõrõ wa'atobali ia furugõ soi soya. Si mane si no musura ba Mbuku Ni'amoni'õ, "Ato sibai dania nga'õtõmõ."
19No i'ila Aberahamo me inõtõ da'õ lõ lala wa isõndra nga'õtõ, bõrõ me atua mbotonia ba no arakha otu fakhe wa'anau ndrõfinia; inõnõ nasa me lõ tola tetabi wo'omonia Sara. Ba hiza lõ awuwu wamati Gaberahamo.
20Lõ mamalõ mamati ia ba lõ fa'amuheu dõdõnia ba wawu'usa li Lowalangi. Famatinia zangabõlõ'õ ya'ia, irege isunosuno Lowalangi.
21Faduhu sibai dõdõnia wa tola Ilau Lowalangi zi no Ifabu'u andrõ.
22Da'õ mbõrõ wa Itema Lowalangi Gaberahamo tobali sangomusoi'õ tõdõ-Nia.
23Fehede, "tetema tobali sangomusoi'õ tõdõ Lowalangi" tesura tenga ha soguna khõ Gaberahamo,
24no khõda gõi. Tetema ita gõi dania tobali niha si no mangomusoi'õ tõdõ Lowalangi, bõrõ me mamati ita khõ Lowalangi sangorifi Yesu, So'aya ya'ita, moroi ba wa'amate.
25No tebe'e nibunu Yesu andrõ bõrõ horõda; ba I'orifi Ia mangawuli Lowalangi, ena'õ ifuli sõkhi gamakhaitada Lowalangi.