Dual Panel1Si Ninang pinilen Mawu Ruata ringangu manga ahus'i Ninang. Suratẹ̌ ini e kai wọu iạ, těmbonangu jamaatẹ̌ kụ kahěnga-hěngang kụkěndagi kamene. Bal᷊inewe kětạu iạ, kaiso kai kẹ̌bị taumata masingkạu Mawu Ruata kahěngang, mal᷊aing kụ kěndag'i kamene.
2Batụu Mawu Ruata e mětẹ̌tumanạ su ral᷊ungu naung'i kitẹ, dingangu sarung hanesẹ̌ dingangi kitẹ sarang karěngụe.
3Karimạko i kitẹ gělirang u al᷊amatẹ̌, tatal᷊ěntụ dingangu karal᷊unsemahẹ̌ kahian Duata i Amang dingang'i Yesus Kristus Ahus'i Amang ene. Karimạko kěbị ene e taghuanengu naungi kitẹ matul᷊idẹ̌ dingangu ual᷊ingu kakěndagẹ̌.
4Iạ e mambeng limuasẹ̌ kahěngang, nakakasingkạ u piạ manga ahus'i Ninange měbẹ̌biahẹ̌ tụtuhụ těntiron Mawu Kasěllahenge kerẹewe seng nịlaorom Mawu kasěllahenge si kitẹ.
5Ual᷊ingu ene Ninang, iạ e měgẹ̌gausẹ̌ sěngapam botonge tadeạu i kitẹ kěbị e mẹ̌kakakěndagẹ̌. Takụ ipẹ̌paul᷊ị ini e wal᷊inewe sěmbaụ tita wuhu; kaiso seng tita těbe nipaul᷊ị si kitẹ dokeng bọu tětạu i kitẹ mạngimang.
6Kuměndagẹ̌ e mangal᷊ene mẹ̌biahẹ̌ tumuhụ titan Mawu kasěllahenge. Kụ tita seng kinaringih'i kamene dokeng bọu tětạe ute i kamene harusẹ̌be mẹ̌biahẹ̌ mẹ̌kakakěndagẹ̌ sěmbaụ dingangu wal᷊ine.
7Lawọ tahapamitaugu ral᷊akị e seng nakeke su dunia e. I sire kai taumata tawe měngaku u i Yesus Kristus riměnta su dunia e tabidạu sěngkatau taumata. Taumata kerene ute kai tahapamitaugẹ̌ e kụ kai Sekẹ i Kristus e.
8Ual᷊ingu ene ute, pakapapia wue i kamene, mạdiring i kamene kailangengu wuan saghed'i kami e. Pẹ̌sal᷊imaẹ bue tadeạu i kamene makatarimạ asẹ̌kinu wọu Ruata masukụ.
9I sain ta mangangumbelẹ su těntirong Kristus, taumata ene tawẹ Duatane. I saịewen tatapẹ̌ su ral᷊ungu těntirong Kristus, ute mạnaghuangbe kurai Ruata i Amang kuraiewe Ruata Ahusẹ̌.
10Ual᷊ingu ene kereu piạu ruměnta ringangu měhabarẹ̌ si kamene těntiro tai tatěntirong Kristus e, ute kumbahang bue měnarimạ u tau ene su ral᷊ungu wal᷊enu arau mangonggọu adatẹ̌ si sire.
11U taumata měngadatẹ̌ su taumata kerene ute mal᷊aing tụtol᷊e ringangu tau ene su ral᷊ungu kakanoạ dal᷊akisẹ̌.
12Mal᷊awọ kahěngang hinon takụ ihabarẹ̌ si kamene, kaiso mapiangbe wal᷊ine ringangu suratẹ̌. Sukiral᷊ingku e iạ makapẹ̌tiwo ringangu makapẹ̌bisara hala ringang'i kamene, tadeạu naung i kitẹ e kahěnga-hěngangbe mal᷊uasẹ̌.
13Manga anạ u tuarin Ninang kụ pinilen Mawu Ruata e, mal᷊aing něndohong adatẹ̌ e si Ninang.