Alkitab Mobile SABDA
[VER] : [SANGIR]     [PL]  [PB] 
 <<  Markus 16 >> 

1Sarạeng ěllon Sabatẹ̌ e seng nal᷊iu, i Maria Magdalena, i Maria i ninang Yakobus, dingangu i Salome rimal᷊eng němpamělli manga wěngi waug'u ipělanisẹ̌ badangu Mawu Yesus.

2Dongkeng mal᷊uka-l᷊ukadẹ̌ su sasěbangu matangěllo, su ěllo kahumotongange su sěngkamisa ene, i sire něngkakoạ sol᷊ong kubul᷊ẹ̌.

3Kạdal᷊enge i sire mạhumbisara sěmbaụ su wal᷊ine, "I saị e ngae makatul᷊ung i kitẹ mameho batu l᷊ahěping tukadu kubul᷊ẹ̌ e?" Batụu watu e kai masaria-saria. Ene sarạeng i sire nahumpạ sene, sěngkakakěllane watu e kai seng naweho.

4(16:3)

5Tangu i sire nahunsuẹ̌ e su kubul᷊ẹ̌ e. Su ral᷊unge su sěmběka koaneng, i sire nakasilo piạ umbaseng pakeange mawira mạiang, kụ i sire mengkatewe němpẹ̌hěkosẹ̌.

6Umbaseng ene nẹ̌bera, "Abe kěngkatakụ! Iạ e masingkạ i kamene mědẹ̌deạ Mawu Yesus tau Nazaret nạung seng nikuruisẹ̌ e. I Sie tawẹdise sini. I Sie kai seng nẹ̌bangung! Kakěllaịe, ěndaị tampạ e pinamělloěng i sire si Sie.

7Kụ dakọe, kụ bunạko wěke ini su manga murit'E, sarạeweng i Petrus. Pẹ̌bera, 'I Sie tamai měngal᷊imona si kamene sol᷊ong Galilea. Paị sene i kamene sarung makasilo si Sie, kerẹewe apan seng nịbaweran'E si kamene.'"

8Tangu i sire měngkatewe nahunsẹ̌bang bọu kubul᷊ẹ̌ ene mase němpẹ̌tal᷊ang ual᷊ingu němpẹ̌hěkosẹ̌ dingangu něngkatakụ. I sire tawe nẹ̌bera apa si saiewe lai, ual᷊ingu natakụ.

9[Sarạeng Mawu Yesus nẹ̌bangung bọu papatene, su ěllo Misa reng mal᷊uka-l᷊ukadẹ̌, i Sie kahumotongange nẹ̌těngkasilo'm batangeng'E si Maria Magdalena. (Bọ'i Maria ene, nạung Mawu Yesus něnokol᷊u rohkẹ̌ pitu ral᷊akị.)

10Tangu i Maria Magdalena e natamaịe něhabaru hal᷊ẹ̌ ene su manga hapịu Mawu Yesus, kụ bědang měngkạsusa ringangu mạhunsangị.]

11[Kai sarạeng i sire nakaringihẹ̌ u Mawu Yesus kai nẹ̌biahẹ̌, dingangu i Maria seng bọu nakasilo si Sie, i sire tawe němpangimang.

12Bọu e Mawu Yesus nẹ̌těngkasilo'm batangeng'E su murit'E ruang katau su ral᷊ungu kakakoạe naněntani. Ene tangu nariadi piạ i rẹ̌dua měmpạhundal᷊eng sol᷊ong kampong sěmbaụ.

13Kụ i rẹ̌dua němpẹ̌sul᷊e kụ němpẹ̌habaru hal᷊ẹ̌ ene si sire wal᷊ine. Kaiso i rẹ̌dua e tawẹu němpangimang si sire.

14Pangěnsueěnge Mawu Yesus nẹ̌těngkasilo'm batangeng'E si sire manga murit'E mapul᷊o ěsa e, piạ i sire kạpahungkaěnge. I Sie naněngkul᷊ẹ̌ si sire puhinengu i sire kai kadodọ pangangimange ringangu tumanịu makakětị těmbo i sire hakịu i sire tawe měmpangimang su taumata kụ seng bọu nakasilo mal᷊ahẹ u Mawu Yesus e wiahẹ̌.

15Mase Mawu Yesus něhengetangke si sire, "Dakọe pěmpaměpidẹ̌ kạguwạu dunia e kụ pěmpẹ̌habaru Injil'u Mawu Ruata e su patikụ taumata.

16I sai tawe mangimang sarung ihukung. Arawe i sai mangimang kụ makisahani, sarung masal᷊amatẹ̌.

17Makoạ tatiala u i sire mạngimang, i sire ene sarung měnguserẹ̌ rohkẹ̌ dalakị su ral᷊ungu areng-Ku; i sire sarung mahumbisara su ral᷊ungu haghin bera, kụ tawe kahěnganeng i sire.

18Kereu i sire makaumbelẹ těmpu arau makainung doti, ute tawẹ makapẹ̌kapura. Kamageng i sire měmpaněllidu l᷊iman sire su taumata masasakị, ute sarung měngkapia!"

19Sarạeng Mawu Yesus bọuten něhengetang si sire, i Sie nasapuạ sol᷊ong sorga. Dasị sene i Sie sěngkapẹ̌parenta ringangu Mawu Kasěllahenge.

20Tangu manga murit'E němpahundal᷊eng kụ němpěhabaru injil'u Mawu Ruata suapan tampạ. Kụ Mawu e mal᷊aing mẹ̌sasumbalane si sire ringangu mapạl᷊ahẹu haghin tanda makạdal᷊inaụ u pěnganginjil'i sire mambeng kahěngang.]


  Share Facebook  |  Share Twitter

 <<  Markus 16 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran