Alkitab Mobile SABDA
[VER] : [SANGIR]     [PL]  [PB] 
 <<  Markus 3 >> 

1Mawu Yesus nẹ̌sul᷊e kapia sol᷊ong bal᷊e'm pẹ̌kakal᷊iomanengang. Sene kai piạ tau l᷊imane sěmbẹ̌ka nipatene.

2Sene kai lai piạ i sire měmpẹ̌dědeạ sal᷊ang Mawu Yesus, mědeạu makapangěnsil'i Sie. Tangu i sire měngkatewe hanesẹ̌ měkẹ̌kakělla si Sie, měnsang i Sie mạpakaul᷊en taumata masakị e su ěllon Sabatẹ̌.

3Mawu Yesus nẹ̌bera su taumata l᷊imane sěmbẹ̌ka nipatene e, "Mahiko rarisị ěndaung sini su těngone."

4Mase i Sie nakiwal᷊o si sire sene, "Tuhụ agamang kitẹ e, kai apa hinong koateng i kitẹ su ěllon Sabatẹ̌ e? Mẹ̌koạ mapia arau mẹ̌koạ dal᷊akị? Měngambang taumata arau měmate?" I sire měngkate něngkarěmmasẹ̌.

5Mawu Yesus e limangehẹ̌ kạpẹ̌mandane mạngělikụ si sire, kaiso naung'E mang masusa, ual᷊ingu i sire mạhěmpal᷊iung tungkětị e. Mase i Sie nẹ̌bera su tau ene, "Togorẹ̌ko l᷊imanu." Tau ene nanogore limane, kụ sěngkianụe naul᷊e.

6Tangu tau Farisi e němpaněntangken bal᷊eng pěkakal᷊iomanengang, mase nẹ̌dal᷊ahintau ringangi sire pirang katau tumatol᷊e si Herodes, mědeạu měmate Mawu Yesus.

7Mawu Yesus dingangu manga murit'E simohọ sol᷊ong Danong Galilea. Tangu mal᷊awọ-l᷊awọ taumata wọu Galilea nahuntol᷊e Mawu Yesus. Mal᷊awọ lai nahunděnta wọu Yudea,

8wọu Yerusalem, bọu wanuang Idumea, dingangu wọu wanua su sěmběkan daking Yordan, dingangu wọu l᷊ikud'u manga soa su Tirus dingangu Sidon. I sire kěbị němpẹ̌děnta sol᷊ong anun Mawu Yesus, u i sire seng nakaringihẹ̌ kal᷊awọu hal᷊ẹ̌ kụ seng nikakoạ'E.

9I sire ene mal᷊awọ-l᷊awọ, hakịu Mawu Yesus něndoloh'u manga murit'E apẹ̌děndiahi sakaeng baug'i Sie, u mạdiringu i Sie kasẹ̌sekangu taumata l᷊awọ.

10I Sie napakaul᷊ẹen masasakị mal᷊awọ, kụ kakěpal᷊ewen masasakị e měngkate měpẹ̌papangansuhẹ̌ mẹ̌těngkarani kạdiongeng deng makapěnenggehẹ̌ si Sie.

11Dingangu i sire apan nikasuẹ̌kangu rohkẹ̌ dal᷊akị e, kasuewen makạsilo si Sie, apidu mẹ̌suba su těngon'E ringangu měmansagẹ̌ u, "Seng i Kau e Ahus'u Ruata e!"

12Kai Mawu Yesus měsẹ̌sěding sěngapan botonge u kumbahang manga rohkẹ̌ dal᷊akị e měmombeng i Sie.

13Bọu e Mawu Yesus simaka sol᷊ong bul᷊udẹ̌, kụ kimui si sire apang ikẹ̌kapulune. I sire e nahunděnta,

14mase i Sie namile wọu tal᷊oaran sire mapul᷊o dua su kataune. Angkuěng'E, "Iạ e namile si kamene, tadeạu i kamene tumaking si Siạ kụ i kamene Takụ irolohẹ̌ iapangeken Injil'u Mawu Ruata,

15ringangu i kamene sarung makatarimạ kawasa mědeạu makapěnokol᷊'u manga rohkẹ̌ daral᷊akisẹ̌."

16Kai ini e areng i sire mapul᷊o dua ene: I Simon (Kụ isẹ̌sěbạ e lai si Petrus),

17i Yakobus dẹ̌duan Yohanes tuarine, manga anạ i Zebedeus (i sire ini nitambaěngu areng i Boanerges mangal᷊ene "manga anạ u rěllụ"),

18i Andreas, Filipus, Bartolomeus, Matius, Tomas, Yakobus anạ i Alfeus, Tadeus, Simon i Mal᷊intoị,

19dingang'i Yudas Iskariot, kụ ianụ e nẹtul᷊ang Mawu Yesus e.

20Bọu e Mawu Yesus napul᷊ẹ sol᷊ong bal᷊ě. Kai taumata l᷊awọ e saụ nahunděnta nẹ̌tampung, sarạeweng Mawu Yesus dingangu manga murit'E tawe nakapẹ̌simokol᷊ẹ̌.

21Taumata němpẹ̌bera, "I Sie seng nẹ̌pulu!" Ene sarạeng manga anạ u sěngkataune nakaringihe hal᷊ẹ̌ nariadi e, tangu i sire němpangal᷊ạ e si Sie.

22Manga mananěntirong agama apang němpẹ̌děnta wọu Yerusalem němpẹ̌bera u, "I Sie nikasuěkang i Beelzebul! Těmbonangu manga rohkẹ̌ dal᷊akị ene e kụ němpěgěllịu kawasa si Sie tadeạu makapěnokol᷊u rohkẹ̌ dal᷊akị."

23Tangú Mawu Yesus kimuị e taumata l᷊awọ e, ringangu nẹ̌běken papinintu pirambaụ si sire. "Kai makoạbe kerea rohkẹ̌ dal᷊akị e manokol᷊'u rohkẹ̌ dal᷊akị?" ungkuěngu Mawu Yesus.

24"Kụ kereu sěmbanuaěnge kawe napahiạ su ral᷊ungu piran kamonaěng kụ tawẹ pẹ̌daramene, ute wanua ene tawe mẹ̌daragẹ̌.

25Kụ kereu su ral᷊ungu sěntahanakeng tawẹ kasasěmbaụe ringangu apạewen dal᷊ohone kawe měmpẹ̌sẹ̌sitori sěmbaụ dingangu wal᷊ine, ute pẹ̌tatěnganạu sěngkataue sarung magholang.

26Kereu su ral᷊ungu kararatuangu setang kai piạ kaghagholang dingangu pẹ̌sasitori, kararatuang ene e tawe mẹ̌daragẹ̌ dingangu sarung miwu.

27Tawẹu sarang sěngkatau makasuẹ̌ su wal᷊en tau matoghasẹ̌ kụ měhampasẹ̌ arětạe kereu i sie tawe měhapusẹ̌ tau matoghasẹ̌ ene kal᷊imona. Bọu ene wuhụ e i sie makapěhampasẹ̌ darotonge.

28Kěngkasingkạko! Kereu taumata mẹ̌koạ dosa ringangu měhinakang, i sie wẹ̌dang kaampungang.

29Arawe i sai měhinakang Rohkẹ̌ u Ruata e i sie tawe kaampungang! Batụu pělahinakang ene kai rosa sarang kakalẹ̌."

30(Mawu Yesus nakapẹ̌bera kerene, batụu piạ u nẹ̌berau Mawu Yesus niwal᷊iuangu rohkẹ̌ dal᷊akị.)

31Bọu e i ninang'E ringangu manga anạ u sěmbaụe nasongọe. I sire němpěngampal᷊ẹ̌ su l᷊ikude kụ dimoloh'u taumata niapẹ̌kui Mawu Yesus.

32Su tempo ene mal᷊awọ taumata mạiang mělẹ̌liwung Mawu Yesus. I sire němpẹ̌bera si Sie, "Tuang, i ninang dingangu manga anạ u sěmbaụ i Tuange ene su l᷊ikude. I sire měmpědẹ̌deạ si Tuang."

33Mawu Yesus simimbang, "I sai tangu i ninangkue? I sai tangu anạ u sěmbaụkue?"

34Bọu ene i Sie namanda si sire apan kụkaiang měmpělẹ̌liwung e mase něhengetang, "Tamai ini e i ninangku ringangu manga anạ u sěmbaụku e!

35I sai mẹ̌kẹ̌koạ kapulu'm Mawu Ruata e, i sie kai anạ u sěmbaụku esẹ dingangu anạ u sěmbaụku wawine, ringangu i ninangku."


  Share Facebook  |  Share Twitter

 <<  Markus 3 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran