Alkitab Mobile SABDA
[VER] : [SIMALUNGUN]     [PL]  [PB] 
 <<  1 Tawarikh 10 >> 

Parmatei ni si Saul

1Dob ai marporang ma halak Palistim dompak halak Israel, gabe maporus ma halak Israel i lobei ni halak Palistim, anjaha marradagan i dolog Gilboa.

2Ipardakdak halak Palistim ma si Saul pakon anakni ai, anjaha ibunuh halak Palistim ma si Jonatan, si Abinadab pakon si Malhisua, anak ni si Saul ai.

3Lambin jobuni ma porang ai dompak si Saul, anjaha jumpah halak siparpanah ai ma ia, ugahan ma ia ibahen halak siparpanah ai.

4Dob ai nini si Saul ma dompak siusung sinjatani, “Sintak ma podangmu anjaha tikamhon ma hu bangku, ase ulang roh halak na so marsunat on mandorun ahu.” Tapi seng ra juakjuak siusung sinjatani ai, ai biar tumang do ia. Dob ai ibuat si Saul ma podangni, lanjar ijombahon ma dirini hujai.

5Dob iidah juakjuak siusung sinjatani ai, na dob matei si Saul, ijombahon ma homa dirini, lanjar matei.

6Jadi matei ma si Saul, ia pakon anakni na tolu halak ai, ampa ganup ginomparni; rap matei do sidea.

7Dob iidah halak Israel, na marianan i pamah ai, na dob maporus halak Israel anjaha na dob matei si Saul pakon anakni ai, itadingkon sidea ma huta ni sidea lanjar maporus. Jadi roh ma halak Palistim marianan ijai.

8Patarni ai sanggah roh halak Palistim laho manrampasi na rasei ai, jumpah sidea ma si Saul pakon anakni ai tibal i dolog Gilboa.

9Jadi dob irampas sidea anjaha ibuat uluni pakon sinjatani, ipaebangkon sidea ma ai i tanoh ni halak Palistim inggot, laho patugahkon na masa ai bani gana-gana ni sidea, pakon hubani bangsa ai.

10Dob ai inahkon sidea ma sinjatani ai hubagas rumah ni naibata ni sidea, tapi anggo uluni igantungkon ma i rumah ni naibata Dagon.

11Jadi dob ibogei haganup parhuta Jabes-Gilead sagala na binahen ni halak Palistim ai hubani si Saul,

12bingkat ma ganup halak siimbang munsuh, ibuat sidea ma bangkei ni si Saul pakon bangkei ni anakni ai, iboan ma ai hu Jabes anjaha itanom sidea ma holi-holi ni sidea i toruh ni jabi-jabi na i Jabes, anjaha marpuasa ma sidea pitu ari dokahni.

13Jadi matei ma si Saul halani pangoseionni, na binahenni dompak Jahowa, halani na so niramotkonni hata ni Jahowa, anjaha halani na marsungkun ia hubani naboru partondung, laho mangindahi pangungkabon,

14seng hubani Jahowa isungkun. Halani ai ibunuh Jahowa ma ia, anjaha ipatongon ma harajaon ai hubani si Daud anak ni si Isai.


  Share Facebook  |  Share Twitter

 <<  1 Tawarikh 10 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran