Alkitab Mobile SABDA
[VER] : [SIMALUNGUN]     [PL]  [PB] 
 <<  2 Timotius 2 >> 

Sirsir Marsitaronon songon Tentara ni Kristus Jesus

1Ham pe, ale anakku, margogoh ma ham marhitei idop ni uhur ni Kristus Jesus,

2anjaha na binogeimu hun bangku i lobei ni buei saksi, ai ma padas hubani hasoman hatengeran ni uhur, na boi mangajari halak na legan.

3Ra ma ham marsitaronon, songon tentara ni Kristus Jesus na bujur.

4Sada tentara na mandalankon tugas, seng ra ia taralit bani urusan-urusan goluh siganup ari, ase harosuh ia bani kopalani.

5Halak siparlumba pe, seng boi jumpahan sortali rudang ia, anggo seng pambalosi ia bani paraturan-paraturanni.

6Siparjuma, na torik marhorja, ai do na patut parlobei jumpahan gogoh ni juma ai.

7Paruhurhon ma na huhatahon in, ai bereon ni Tuhan in do bam hauhuron ibagas haganupan in.

8Padingat-dingat ma Jesus Kristus, na dob pinapuho humbani na matei, na humbani ginompar ni si Daud, domu hubani na huambilankon in.

9Marhalanihon-Si do ase marsitaronon ahu, pala hona garihon songon parjahat, tapi hata ni Naibata, seng targarihon.

10Tapi hutaron do haganupan in halani na tarpilih in, ase dihut sidea marulih bani haluahon na ibagas Kristus Jesus ampa bani hasangapon sisadokah ni dokahni.

11Hatengeran ni uhur do hata on: Anggo rap matei hita pakon-Si, rap manggoluh ma homa hita pakon-Si.

12Anggo sabar hita manaron, rap manrajai ma hita pakon-Si, anggo iparnalang hita Ia, parnalangon-Ni ma age hita.

13Ia lang pe hatengeran ni uhur hita hatengeran ni uhur do anggo Ia, ai seng tarparnalang-Si diri-Ni.

Siparlahouhonon ni Siparhorja

14In ma pasingat anjaha lumbahon i lobei ni Naibata, ase ulang marsual-sual na so marguna sidea, gabe hasedaon bani na mambogeisi.

15Haringgaskon ma patuduhkon, paboa na bujur ham i lobei ni Naibata, songon sada parhorja na so tarbador, na padalankon hata hasintongan in pintor-pintor.

16Tapi simbili ma parsahapan na so marisi, na so margagan, ai lambin tambah do hajahaton ni sidea pangkorhonni ai,

17ai songon kanker do panggagat ni podah ni sidea ai inggot, si Hemeneus ampa si Piletus ma deba sidea ai.

18Na kahou do sidea humbani hasintongan in, ai ihatahon sidea do, domma masa parpuhoon in, gabe seda ibahen haporsayaon ni deba halak.

19Tapi totap do onjolan na humbani Naibata na toguh in, anjaha hata on ma surat ni lakni, “Itanda Tuhan in do halak, na Ia simadasi, anjaha barang ise na mandilo goran ni Tuhan in, maningon sirang ma ia humbani hajahaton.”

20Ibagas rumah na banggal, seng pitah parugas omas barang pirak adong, dihut do parugas hayu ampa tanoh, deba bani horja na sangap, na legan bani horja na so sangap.

21Halak na paborsih dirini humbani nongkan ai, ai ma gabe parugas na mapansing, na bani horja hasangapon, na marguna bani simada rumah ai, sirsir bani sagala horja na madear.

22Lembangi ma hisap-hisap haposoon, tapi parayak ma hapintoron, haporsayaon, holong ampa damei, rap pakon halak na mandilo goran ni Tuhan in humbani uhur na borsih.

23Tapi parsual-sualon haotoon ampa na so patut, simbili ma ai, ai ibotoh ham, na paroh paringoran do ai.

24Seng patut paringor-ingor anggo juakjuak ni Tuhan in, tapi parbasar do dompak haganup, pandei mangajari, sabar manaron na jahat,

25parlamlam mamodahi sipanlawan, andohar ibere Naibata bani sidea hamubahon ni uhur, laho mananda hasintongan in,

26ase tarjolma sidea, maluah humbani siding ni sibolis in, na dob manangkap sidea, laho pasaudkon rosuh-rosuhni ai.


  Share Facebook  |  Share Twitter

 <<  2 Timotius 2 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2018
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran