Dual PanelSambatni
1Timbangan palsu hagigi do ai bani Jahowa, tapi batu timbangan na sintong do harosuh-Ni.
2Masa gijang ni uhur, masa ma habadoron, tapi hapentaran do jumpah bani sitoruh uhur.
3Habonaron ni halak parpintor, ai do pambobai bani sidea, tapi hagedukon ni halak sipangosei do na parseda sidea.
4Seng marguna habayakon bani panorang mardalan uhuman, tapi hapintoron do na paluahkon humbani hamatean.
5Hapintoron ni halak na daulat do mambahen dalanni hornop, tapi tompas do parjahat ibahen hajahatonni.
6Hapintoron ni halak parpintor do paluahkon sidea, tapi hona tangkap do halak sipangosei ibahen hisapni.
7Anggo matei halak parjahat magou do pangarapanni, anjaha sinta-sinta ni halak na so pintor gabe na lang.
8Maluah do halak parpintor humbani parmaraan, anjaha halak parjahat do masuk hujai, gantihni.
9Marhitei pamangan ni halak parjahat madabuh hasoman hubagas hamagouan, tapi marhitei habotohon ipaluah halak parpintor.
10Anggo mardohar halak parpintor masa do olob-olob ibagas huta, tapi halak parjahat, marsurak-surak ma parhuta anggo roh hamagouan bani.
11Marhitei pasu-pasu bani halak parpintor timbul do huta, tapi marumbak do ai marhitei pamangan ni halak parjahat.
12Siapasi hasomanni, ai ma halak na so marpangartian, tapi halak na marpambotoh masip do.
13Halak na hujai-hujon pahata-hata halak, mambahen tarbotoh rusia, tapi ponop do ai ibahen halak hatengeran ni uhur.
14Anggo seng dong be sipambobai, maseda ma bangsa, tapi dear ma ai anggo buei halak sipanuturi.
15Harugian do ai manjamini halak na legan, tapi sonang do halak na so ra manjamini.
16Parinangon siparbasar dapotan hormat, tapi bador do naboru na magigi bani na bonar.
17Dirini do pinadearni anggo layak halak, tapi halak na kejam parseda dirini sandiri.
18Halak siparjahat jumpahan pansarian sipaoto-oto, tapi halak na manidahkon hapintoron, dapotan untung na totap.
19Halak na totap jongjong bani hapintoron jumpahan hagoluhan, tapi siayaki hajahaton sai matei do.
20Hagigi ni Jahowa do paruhur na geduk, tapi marosuh do Ia bani halak na so panurakon parlahouni.
21Sintong tumang, seng anjai lang hona uhum halak parjahat, tapi sai maluah do ginompar ni halak parpintor.
22Songon tintin omas na bani unsum ni babuy, sonai do naboru na majenges, na so maradat.
23Sinta-sinta ni halak parpintor parohkon hadearon, tapi niarapkon ni halak parjahat uhumon do.
24Halak na unjah marsibere-bere, lambin bayakni, tapi halak na sai pagugun-gugunkon, lambin miskin do.
25Halak pardear layak dapotan layak-layak, anjaha halak na ra mambere siinumon, jumpahan siinumon do.
26Halak sitahan-tahan gandum iburai halak do, tapi pasu-pasu do sogop bani ulu ni sipanjual.
27Halak siparayak na madear, gabe harosuh do, tapi sipindahi na masambor, sai roh do ai bani.
28Halak na marhatengeran bani habayakonni madabuh do, tapi halak parpintor martumbor do songon bulung-bulung na maratah.
29Halak na manggeori rumah tanggani, logou do teanonni, anjaha halak na oto gabe jabolon ni na pentar.
30Buah ni habonaran ai ma hayu hagoluhan, tapi na mandalankon na so uhum goluh do iparseda.
31Tonggor ma, halak parpintor dapot pambalason do i tanoh on, samintolah ma halak parjahat ampa pardousa, lang?