Dual Panel(Sambatni)
1Anak na pentar itangihon do pangajaran ni bapani, tapi halak sipanrisai seng ipardulihon pinsang-pinsang.
2Humbani buah ni pamanganni do panganon ni halak hadearon, tapi halak sipangeluk hisapan do bani odoh-odoh.
3Halak sirajai pamanganni, goluhni do niramotkonni, tapi halak siganjang dilah maseda do.
4Sai marsura-surai do halak parrayoh, hape soya-soya do; tapi halak na ringgas sai dapotan do bani pinarsinta ni uhurni.
5Magigi do halak parpintor bani hata ladung, tapi halak parjahat sambor anjaha butak do pambahenanni.
6Hapintoron do na manramotkon halak na daulat marparlahou, tapi hajungkaton do na mambahen madabuh pardousa.
7Adong do halak na pakulah bayak ia, age pe seng dong bani, dong homa, ibahen ia songon na miskin, hape marnah na dong do.
8Habayakonni do ipakei na bayak manobus hosahni, tapi halak na musil seng tarpaluahsi dirini.
9Sondang ni halak parpintor marsinalsal do, tapi miloh do suluh ni halak parjahat.
10Uhur hagijangon patubuhkon paringoran, tapi hapentaran do jumpah bani halak na ra manangihon podah.
11Habayakon na tarolos-olos pinagugun sai surut do, tapi na pinaiduk-iduk lambin tambah do.
12Pangarapan na so dapot, paborit uhur; tapi sinta-sinta na dapot, hayu hagoluhan do ai.
13Halak na so parduli bani hata, parseda dirini do, tapi sihabiari titah dapotan upah do.
14Podah ni halak na pentar, ai ma bah hagoluhan, na boi paluahkon humbani siding ni hamatean.
15Hapentaran na sintong parohkon holong, tapi dalan ni halak sipargeduk gabe hasedaon do bani.
16Halak na pentar mandalankon ganup horjani ibagas partimbangan, tapi halak na bodoh paidahkon haotoonni.
17Suruhan na jahat parohkon hamagouan, tapi suruhan hatengeran ni uhur mamboan hamalumon.
18Hasombuhon pakon habadoron do sogop bani halak situlak pangajaran, tapi gabe marsangap do halak sitangihon pinsang-pinsang.
19Sinta-sinta na dapot, tuah do ai bani tonduy, tapi sirang humbani hajahaton hagigi do ai bani na oto.
20Marsaor pakon halak na pentar, parohkon hapentaran, tapi maseda do halak na marhasomankon halak na oto.
21Hamagouan do na mardakdak pardousa, tapi hadoharon do upah bani halak parpintor.
22Halak sidear uhur martading-tadingan do ronsi pahompuni, tapi habayakon ni halak pardousa ipagugun do ai bani halak parpintor.
23Ladang tinombei ni halak na miskin mambere gogohni buei, tapi gati do magou ai halani hagedukon.
24Halak na malang manlonsingkon hotang, anakni do nihagigihonni ijai, tapi na holong uhur bani, ipagirah do mangajarsi.
25Halak parpintor bosur-bosur do mangan, tapi lumei do boltok ni halak parjahat.