Dual Panel(Sambatni)
1Anggo hundul ho rap mangan pakon sahalak panggomgomi, pangkei ma pardiatei atap aha na i lobeimu;
2nahkon ma pisou bani tolonanmu, anggo parhisap ho!
3Ulang ma sir uhurmu bani na mantin-mantinni ai, ai sipanganon na paoto-otohon do ai.
4Ulang ma lojai dirimu mangindahi habayakon, padaoh ma pingkiranmu hunjai.
5Ai anggo mangkawah ho hujai, jadi lang dong be, ai sompong do marhabong ia, gabe habang songon manuk-manuk nanggordaha hu awang-awang.
6Ulang ma pangan indahan ni halak parmata na serleng, ulang ma sir uhurmu bani sipanganonni age naha mantinni,
7ai mambahen hira-hira do ia ibagas uhurni. “Mangan anjaha minum ma ham,” nini hubam, tapi uhurni seng dompak ho.
8Gabe utahkononmu ma holi sisampohul na pinanganmai, anjaha sisoya-soya ganup hatamu na madear ai.
9Ulang ma marsahap ho i lobei ni halak na oto, ai mapas do uhurni bani sahapmu na marisi hapentaran ai.
10Ulang ma osor batu parbalogan sisapari, anjaha ulang ma soluk ladang ni na tading maetek,
11ai gogoh do sipanluluhon sidea; Ia do mansuhutkon parkara ni sidea dompak ho.
12Dompakkon ma uhurmu bani pangajaran, sonai pinggolmu bani sahap na gok habotohon.
13Ulang ma parontihon pangajaran hubani dakdanak, porini ilonsing ho pe ia, seng pala matei.
14Ilonsing ho do tongon angkulani, tapi na paluahkon tonduyni ai do ho hun nagori toruh.
15Ale anakku, anggo gok hapentaran uhurmu, uhurhu pe malas do.
16Anjaha marolob-olob do tonduyhu, anggo isahapkon bibirmu hasintongan.
17Ulang simburu uhurmu mangidah pardousa, tapi marhabiaran ma ho tongtong.
18Tongon, adong do ari pangapudianan, seng anjai rotap pangarapanmu.
19Tangihon ma, ale anakku, ase pentar ho, anjaha dompakkon ma uhurmu bani dalan na pintor.
20Ulang ma saor ho pakon halak sisibur anggur atap pakon halak na hisapan bani gulei;
21ai halak parmabuk pakon parhisap maningon miskin do, anjaha marhiou rigat-rigat halak na marosuh modom-modom.
22Tangihon ma bapamu na mantubuhkon ho, anjaha ulang mapas uhurmu bani inangmu anggo matua ia.
23Hasintongan ma boli, anjaha ulang jualhon ai; sonai hapentaran, pangajaran ampa pangarusion.
24Tongon, malas do uhur ni bapa ni halak parpintor; anjaha ise na mantubuhkon anak na maruhur, malas do uhurni marhalanihonsi.
25Malas ma tongon uhur ni bapamu ampa inangmu, marolob-olob ma uhur ni na mantubuhkon ho.
26Bere ma, ale anakku, uhurmu bangku, anjaha sai iharosuhkon matamu ma dalanku.
27Ai doskon godung na bagas do boru jalang, anjaha parigi na sompit do naboru parbangkis.
28Tongon, songon panamun do ia manggompangi, anjaha ipabuei do halak sipangeluk i tongah-tongah ni hajolmaon.
29Ise do na hoih-koih? Ise do siparinangoi? Ise do siparingor? Ise do na holsohan? Ise do na ugahan seng marhala? Ise do siparmata na gombur?
30Halak na halalaban minum anggur, halak na laho mandai-dai minuman na koras.
31Ulang pakawah-kawah anggur halani magerger rupani, halani marlinang idahon ibagas panginuman, halani lamlam panjalirni hubagas.
32Dobni mangkarat do ai songon ulog, anjaha mandoit songon darih.
33Idahon ni matamu ma na ganjil-ganjil, anjaha uhurmu mansahapkon na so marturut.
34Gabe songon halak na modom i tongah laut ma ho, anjaha songon halak na modom i ujung ni tiang layar.
35Nim, “Ibogbog sidea do ahu, tapi lang maborit, ibalbal sidea do, tapi lang huahapkon. Anggo tarjolma ahu, ulakanku do minum.”