Dual Panel(Sambatni)
1Maporus do halak parjahat age pe seng dong na mardakdaksi, tapi anggo halak parpintor marnalom ni uhur do songon anak ni singa.
2Anggo masa hajahaton bani sada nagori, pagantih pasoluk ma rajani, tapi marhitei sada halak na maruhur anjaha na marpambotoh totap do mardalan uhum.
3Halak na sangap, na mangodoh-odoh halak na masombuh, songon udan doras, na mangayubkon do ai, siparseda gogoh ni tanoh.
4Halak sitadingkon uhum mamuji-muji halak parjahat, tapi halak sidalankon uhum ilawan do sidea.
5Halak parjahat seng iarusi aha hasintongan, tapi halak sipindahi Jahowa iartihon do haganupan ai.
6Dearan do halak na masombuh, na pitah marparlahou humbani halak na so pintor langkahni, age pe bayak ia.
7Halak siramotkon titah, ai ma anak na pantas maruhur, tapi halak na marhuankon siparhisap, pabador bapani do.
8Halak na pabuei artani marhitei bunga ni duit ampa untung na malobihtu, bani halak sihaholongi na miskin do arta ipatumpuni ai.
9Halak na padaohkon pinggolni humbani na manangihon titah, tonggoni ai pe gabe hagigi do.
10Halak na pakahouhon sibujur uhur hubani dalan hamagouan, hubagas godungni sandiri do ia madabuh; tapi halak sipitah maruhur, na dear do teanonni.
11Halak na bayak, pentar do ia ninuhurni, tapi halak na miskin siparuhur, tardapotsi do uhurni ai.
12Anggo marhamonangan halak parpintor, banggal ma hatuahon, tapi anggo markuasa halak parjahat, marponop bei ma jolma.
13Barang ise na manrongkob panlanggaronni seng martuah ai, tapi halak na mansopotkon salahni anjaha itadingkon ai, dapotan idop ni uhur do.
14Martuah ma halak na tongtong marhabiaran bani Jahowa, tapi na pahengkeng uhurni madabuh do hubagas hamagouan.
15Songon singa na maraum pakon gipul na loheian, sonai do panrajai na jahat bani rayat na miskin.
16Raja na hurang uhur, ai do sidalankon odoh-odoh, tapi sihagigihon untung na so sintong, paganjang ari-arini do ai.
17Halak na hona sapata ni daroh ni jolma, mompas-ompas do ia ronsi matei, ulang iurupi be ia.
18Halak na so panurakon marpalahou, sai na maluah do, tapi halak na lekluk marparlahou sai madabuh do hubagas godung.
19Halak sihorjahon jumani bosuran do ia bani sipanganon, tapi halak sipindahi na so marguna, bosuran do ia bani hamiskinon.
20Halak hatengeran, buei do pasu-pasu dapotsi, tapi halak na tarolos sihol bayak, seng anjai lang hona uhum.
21Seng dear mambuat-buat uhur; halani sipanganon sampohul pe, ra do halak sipata mandalankon hajahaton.
22Parmata na mangapian, oji do uhurni bayak, tapi seng dapot uhurni hamiskinon do sogop bani.
23Halak na ra maminsang hasomanni, puji-pujian do ujungni dapotsi, lobih humbani halak na palemes-lemes parsahapni.
24Halak na manangkoi bapani atap inangni anjaha ihatahon homani, “Seng dousa ai!” Dos do ai pakon halak sipanamun.
25Halak paruhur haut, patubuh paringoran, tapi halak na martenger ni uhur bani Jahowa marlobih-lobih do.
26Halak na martenger ni uhur bani pingkiranni sandiri, na oto do ai, tapi halak na pantas marparlahou, sai maluah do.
27Halak parlayak bani na masombuh, seng anjai hurangan, tapi halak na papitpit matani, buei do bura-bura mangonai bani.
28Anggo markuasa halak parjahat, marponop bei ma jolma, tapi anggo masab sidea, lambin tambah ma halak parpintor.