Alkitab Mobile SABDA
[VER] : [SIMALUNGUN]     [PL]  [PB] 
 <<  Kejadian 38 >> 

Dousa ni si Juda

1Bani panorang ia tuad ma si Juda manadingkon saninani, tondok ma ia hubani sahalak Adullam, na margoran si Hira.

2Iidah ma ijai sada boru ni halak Kanaan, na margoran si Sua; ibuat ma ia bahen parinangonni anjaha iparayak ma.

3Boratan rumah ma ia, anjaha itubuhkon ma sada anak, ibahen ma goranni si Er.

4Dob ai boratan rumah ma ia use, anjaha itubuhkon ma sada anak, ibahen ma goranni si Onan.

5Itubuhkon puang-puang ai ma use sada anak, ibahen ma goranni si Sela. Tapi i huta Kesib do si Juda, sanggah tubuh dakdanak ai.

6Ibuat si Juda ma sada naboru bahen parinangon ni si Er, anak bunga-tubuhni ai, si Tamar do goranni.

7Tapi ia si Er, bunga-tubuh ni si Juda ai, jahat do ia bani pangidah ni Naibata, jadi ipamatei Jahowa ma ia.

8Nini si Juda ma dompak si Onan, “Parayak ma parinangon ni abangmu, anjaha pagodang, pajongjong ginompar bani abangmu.”

9Tapi ibotoh si Onan ma na sedo ia simada ginompar holi, halani ai ganup hali iparayak parinangon ni abangni ai, iambungkon ma hu tanoh gogoh ni dagingni, ase ulang jongjong ibahen ginompar bani abangni.

10Tapi jahat do pambahenanni ai iidah Naibata, jadi ipamatei ma homa ia.

11Dob ai nini si Juda ma hubani si Tamar, parumaenni ai, “Songon sahalak na mabalu ma ham lobei marianan i rumah ni bapanta, paima magodang anakku si Sela ai.” Halani ninuhurni, atap matei homa holi ia songon abangni ai. Laho ma si Tamar marianan i rumah ni bapani.

12Bani labang-labang ni ari, matei ma boru ni si Sua parinangon ni si Juda. Jadi dob tarapoh uhur ni si Juda, tangkog ma ia marayak sigunting ambulu ni biribiri hu Timna, ia rap pakon huan-kuanni si Hira na hun Adullam.

13Ibaritahon halak ma hubani si Tamar, “Tonggor ma, na laho do simatuamu dalahi tangkog hu Timna sihol manggusting ambulu ni biribirini.”

14Dob ai itanggali puang-puang ai ma hiou habaluonni ai, martudung anjaha marsabing bolag ma ia, jadi laho ma ia hundul hu horbangan ni huta Enaim na bani dalan hu Timna; halani domma iidah banggal si Sela, tapi lalab lang ibere ia hubani si Sela bahen parinangonni.

15Dob iidah si Juda ia, iagan ma boru jalang ia, halani itudung-tudungi bohini.

16Iparayak ma puang-puang ai hu biding ni dalan ai, nini ma, “Mahua palopas ma ahu roh hubam.” Ai lang ibotoh, parumaenni do hape ia. Nini naboru ai ma, “Aha ma bereonmu bangku, anggo roh ho hu bangku?”

17Balosni, “Hutongos pe hubam sada anak ni hambing humbani hambingkai.” Nini puang-puang ai ma, “Ra do ho mambere borotni, paima itongos ho ai?”

18Nini ma, “Aha ma borotni bereonku bam?” Ibalosi ma, “Tintin sap pakon horung-korung ampa tungkotmu na i tanganmin ma.” Dob ai ibere ma bani ganupan ai, iparayak ma ia, jadi boratan rumah ma ia humbani.

19Jongjong ma puang-puang ai, laho ma ia, itanggali ma tudung-tudungni ai, anjaha ipakei ma hiou habaluonni ai.

20Dob ai itongoskon si Juda ma anak ni hambing ai marhitei huan-kuanni, halak Adullam ai, laho manobus borot ai humbani tangan ni puang-puang ai, tapi lang jumpahsi be ia ijai.

21Jadi isungkun ma parnagori ai, nini ma, “Ija do boru jalang na hundul-hundul i Enaim i biding dalan ai?” Ibalosi sidea ma “Seng dong ijon boru jalang.”

22Mulak ma ia hubani si Juda, nini ma, “Seng jumpah ahu ia;” sonai homa parnagori ai mangkatahon, “Seng dong boru jalang ijon.”

23Nini si Juda ma, “Paturut ma bani ugas-ugas ai, ase ulang jadi habadoronta ai; domma hutongos anak ni hambing on, tapi lang jumpah ho naboru ai.”

24Dob dong hira-hira tolu bulan, dong ma na patugahkon hubani si Juda sonon, “Marboru jalang do si Tamar parumaenmu ai, anjaha domma boratan rumah homa ia ibahen parriah-riahonni ai.” Ihatahon si Juda ma, “Boan ma ia hu darat, ase itutung.”

25Sanggah na binoban ai ia hu darat, marsuruhan ma ia marayak simatuani dalahi mangkatahon, “Humbani dalahi simada ugas on do ahu boratan rumah.” Nini ope homa, “Tandai ma pangkei, ise do simada tintin sap, horung-korung pakon tungkot on?”

26Jadi itandai si Juda ma ugasni ai, nini ma, “Pintoran do ia ase ahu, halani lang tongon hubere ia hubani si Sela, anakkai.” Tapi lang iparayak si Juda be ia.

27Bani partoras ni omeini, tarbotoh ma adong sirindu-rindu ibagas parnaibataan.

28Sanggah na manubuhkon ai ia, surduk ma sada tangan, ijolom sibaso ai ma ai, isangkut ma pakon bonang sigerger, nini ma, “On do na parlobei kaluar.”

29Hape dob itarik tanganni mulak, kaluar ma anggini; jadi nini sibaso ai ma, “Gogohni in parruntasmu hu darat!” Jadi ibahen ma goranni si Peres.

30Dob ai kaluar ma anggini na marsangkut bonang sigerger ai tanganni, jadi ibahen ma goranni si Zerah.


  Share Facebook  |  Share Twitter

 <<  Kejadian 38 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2018
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran