Dual PanelGolgol Martonggo
1Dob ai ihatahon ma bani sidea sada limbaga, laho patorangkon paboa maningon tongtong do sidea martonggo, seng bulih lengah,
2nini ma, “Adong ma sada panguhum ibagas sada huta, seng mabiar ia bani Naibata anjaha seng parduli bani jolma.
3Anjaha adong do homa i huta ai sada naboru na mabalu, na marnunut roh marayaksi, mangkatahon, ʻPintori ham ma ahu dompak imbangkai!ʼ
4Dokah do seng ra ia lobei. Tapi nini ma use ibagas uhurni, ʻTongon, seng huhabiari Naibata, anjaha seng parduli ahu bani jolma,
5tapi huurus ma lah parkara ni naboru na mabalu on, ase ulang roh be ia manunsahi ahu.ʼ”
6Dob ai nini Tuhan in ma, “Tangar hanima ma hata ni panguhum na geduk ai!
7Ia Naibata, mintor lang ma pintoran-Ni na pinilih-Ni, na mandilo-Si arian pakon borngin? Ai padokah-dokahon-Ni ma bani sidea?
8Huhatahon ma bennima, podas ma sidea pintoran-Ni! Tapi anggo roh Anak ni Jolma in, adong do nani jumpahon-Ni haporsayaon i atas tanoh on?”
Dousa Gijang ni Uhur
9Dob ai ihatahon ma sada limbaga pasal halak na martenger ni uhur bani dirini, na mangkatahon pintor sidea, na mapas bani hasomanni, nini ma,
10“Adong ma dua halak na tangkog hu rumah panumbahan martonggo, halak Parisei do na sada, anjaha sijalo sohei do na sada nari.
11Jadi dorgak ma Parisei ai jongjong, anjaha sonon ma tonggoni ibagas uhurni, ʻHam Naibata, tarima kasih ma huhatahon Bamu, halani seng dos ahu pakon halak na legan, panrampok, pargeduk, parbangkis barang songon sijalo sohei an.
12Dua hali saminggu ahu marpuasa, anjaha huparsapuluh do sagala sinaringku.ʼ
13Ia halak sijalo sohei ai mandaoh-daoh do ia jongjong, gari mangkawah dompak nagori atas seng barani ia. Tapi itompas ma tontonni, lanjar nini ma, ʻHam Naibata, idop ma uhur-Mu bangku pardousa on!ʼ
14Huhatahon ma bennima, pintoran do on laho mulak ase na sada an. Ai sipatoruhon do sagala na pagijang dirini, tapi na patoruh dirini sipagijangon do!”
Pamasu-masuon ni Jesus bani Dakdanak
15Iboan sidea do homa dakdanak hu lobei-Ni, ase ijamah sidea. Tapi mangidah ai susian ai, ipandang ma sidea.
16Tapi idilo Jesus ma sidea, nini ma, “Lopas hanima ma roh dakdanak in Bangku, ulang ma pandang hanima sidea, ai bani sisonin do Harajaon ni Naibata!
17Sintong do na Huhatahon on bennima, ʻNa so manjalo Harajaon ni Naibata songon dakdanak, seng anjai masuk ia hujai.ʼ”
Garama na Bayak
18Jadi isungkun sada halak sipambobai ma Ia, nini ma, “Ham Guru, sidear uhur, aha do sibahenonku, ase tartean ahu hagoluhan na sadokah ni dokahni?”
19Jadi nini Jesus ma hu bani, “Mase ihatahon ham Ahu sidear uhur? Seng dong sidear uhur sobali Naibata.
20Ibotoh ham do titah in: Ulang ho marbangkis! Ulang ho mamunuh! Ulang ho manangko! Ulang ra ho manaksihon hata na so tongon! Pasangap bapamu pakon inangmu!”
21Jadi nini ma, “Haganupan ai domma hudalankon humbani sietek-etekonku nari.”
22Manangar ai Jesus, nini ma hu bani, “Sada mando na hurang bamu! Jual ham ma haganup na dong bamu, anjaha pambere ma ai bani halak na masombuh, gabe mararta ma ham i nagori atas. Dob ai roh ma ham, irikkon ham ma Ahu!”
23Manangar ai pusok ma uhurni, ai na bayak tumang do ia.
24Mangidah ai Jesus, nini ma, “Mahol ni in masuk halak na bayak hubagas Harajaon ni Naibata!
25Urahan do masukan ni unta ruang ni jarum, ase sada halak na bayak masuk hubagas Harajaon ni Naibata.”
26Jadi nini halak na manangar ai ma, “Anggo sonai, ise ma boi maluah?”
27Nini ma, “Na so tarbahen bani jolma, tarbahen Naibata do.”
28Jadi nini si Petrus ma, “Itadingkon hanami do na dong bannami, laho mangirikkon Ham.”
29Gabe ihatahon ma bani sidea, “Na sintong do hatang-Kon bannima: Sagala na manadingkon rumahni barang parinangonni barang saninani barang namatorasni barang niombahni halani Harajaon ni Naibata,
30maningon marlompit do jaloonni i dunia on, ambahni ai hagoluhan sisadokah ni dokahni bani dunia magira.”
Ilumbahon Jesus Sitaronon-Ni Patoluhalihon
31Jadi iarahkon Jesus ma na sapuluh dua ai, nini ma dompak sidea, “Tonggor ma, na tangkog ma hita hu Jerusalem, anjaha saud ma bani Anak ni Jolma in haganup, na dob tarsurat marhitei sagala nabi.
32Ai ondoskonon ma Ia bani sipajuh begu-begu, gabe apasanni anjaha pahirionni anjaha tijuranni ma Ia,
33lonsingan anjaha bunuhonni ma Ia, dob ai mulak manggoluh do Ia bani ari patoluhon.”
34Tapi otik pe lang iarusi sidea pasal ai; ponop do hata ai humbani uhur ni sidea, seng ibotoh sidea na hinatahon-Ni ai.
Ipamalum Sada Halak na Mapitung
35Jadi sanggah na dohor Ia hu Jeriko, adong ma sada halak na mapitung, hundul-hundul i dalan ai mangindo-indo.
36Manangar halak na mabuei, na mamontas ai, ipapangkei ma atap aha do na masa.
37Gabe ipatugah halak ma bani, “Jesus na hun Nasaret montas.”
38Jadi dilo-dilo ma ia, nini ma, “Ham Jesus, Anak ni si Daud, idop ma uhur-Mu bangku!”
39Jadi ihata halak na parlobei ai ma ia, ase sip namin. Tapi lambin ipagomos do dilo-dilo, “Ham Anak ni si Daud, idop ma uhur-Mu bangku!”
40Jadi soh ma Jesus, anjaha ihatahon ma, ase iboan ia hu lobei-Ni. Dob dohor ia, isungkun ma ia,
41“Aha ipindo uhurmu bahenon-Ku bamu?” Jadi ihatahon ma, “Ham Tuhan, marpangidah ma namin matangku!”
42Jadi ihatahon Jesus ma hu bani, “Marpangidah ma ham! Haporsayaonmu do na paluahkon ham.”
43Jadi mintor marpangidah ma matani, iirikkon ma Jesus lanjar ipuji ma Naibata. Mangidah ai halak na mabuei ai, ipuji sidea ma Naibata.