Dual Panel1“Tonggor ma, suruhon-Ku ma suruhan-Ku, ase ipasirsir dalan i lobei-Hu, jadi sompong ma roh Tuhan, na pinindahannima ai, marayak rumah-Ni; suruhan ni parpadanan, na hinasiholhonnima ai, tonggor ma, na roh ma Ia,” nini Jahowa Zebaot.
2“Tapi ise ma na boi manahankon ari parroh-Ni ai, anjaha ise ma na boi jongjong, anggo talar ma Ia? Ai songon apuy ni panopa do Ia anjaha songon sabun ni panabun.
3Hundul ma Ia songon sipanlala ampa sipapitah pirak, jadi urasan-Ni ma halak Levi, anjaha papitahon-Ni ma sidea songon omas ampa pirak, ase boi sidea mamboban galangan na sintong bani Jahowa.
4Anjaha rosuh uhur ni Jahowa bani galangan ni Juda ampa Jerusalem songon sapari ampa bani tahun-tahun na salpu.
5Jadi dohoran-Ku ma hanima laho manguhum, gabe saksi na sihap ma Ahu bani parsibalik mata, bani siparbangkis, bani sibijahon na tongon, bani halak na mangodohkon siparombou ibagas gajini, na mabalu ampa na tading maetek, bani halak na manulak panginsolat, na so mabiar Bangku,” nini Jahowa Zebaot.
Dilo-dilo bani Hamubahon
6“Seng mubah-ubah anggo Ahu, Jahowa, tapi anggo hanima tong pe songon anak ni si Jakob.
7Humbani panorang ni ompungnima, sai manlembang do hanima humbani titah-Ku, anjaha seng iramotkon hanima ai. Mulak ma hanima hu Bangku, ase mulak Ahu bannima,” nini Jahowa Zebaot. “Tapi nini hanima, ʻSonaha ma hanami mulak?ʼ
8Ai ongga do jolma paoto-otohon Naibata, ase paoto-otoonnima Ahu? Tapi nini hanima, ʻMarhitei aha ma ioto-otoi hanami Ham?ʼ Marhitei parsapuluhan ai ampa galangan ai!
9Mangonai do papa bannima, halani ioto-otoi hanima Ahu, ganup bangsa in tene.
10Boan hanima ma parsapuluhan in, gok, hu rumah parartaan, ase adong bohal i rumah-Ku; dob ai lajou hanima ma Ahu marhitei ai,” nini Jahowa Zebaot, “atap na so buhaon-Ku do bannima jendela ni langit, laho manguseihon bannima pasu-pasu na marlobih-lobih.
11Jadi tulakon-Ku ma, halani hanima, sipangatah (balang) ai, ase ulang be isiapkon gogoh ni tanoh in, anjaha ase ulang mangolang hayu anggur na i juma ai marbuah bannima,” nini Jahowa Zebaot.
12“Jadi parhatuahon ni haganup bangsa ma hanima, ai maningon gabe tanoh haudungan ni uhur do hanima,” nini Jahowa Zebaot.
Legan ni Parpintor ampa Parjahat
13“Ipabanggal hanima do hata-hatanima dompak Ahu,” nini Jahowa. “Lanjar nini hanima ope, ʻSonaha ma parsahapnami dompak Ham?ʼ
14Ihatahon hanima, ʻSeng dong gunani balosan Naibata. Aha ma untungnami, halani ihorjahon hanami parentah-Ni, atap na marhoru ai hanami mardalan i lobei ni Jahowa Zebaot?ʼ
15Halani ai iparhatuah hanima do halak na jungkat maruhur: Halak parjahat seng pitah mardohar, tapi age pe ilajou sidea Naibata, maluah do sidea.
16Tapi marsipasingatan do halak na mangkabiari Jahowa samah sidea, pardiateihon anjaha itangar Naibata do ai. Anjaha tarsurat do i lobei-Ni sada buku pardingatan bani halak na mangkabiari Jahowa ampa na mangkargahon goran-Ni.
17Jadi Ahu ma simada sidea,” nini Jahowa Zebaot, “bani ari na sihol marlulu ai Ahu, anjaha idopan-Ku ma sidea, songon sada halak na mangidopi anakni, na mambalosisi.
18Ijai use idahonnima ma parleganan ni parpintor humbani parjahat, na mambalosi Naibata humbani na so mambalosi Naibata.”