Alkitab Mobile SABDA
[VER] : [SIMALUNGUN]     [PL]  [PB] 
 <<  Matius 9 >> 

Ipamalum Tuhan Jesus Sada Halak na Oyangon

1Dob ai masuk ma Ia hu parau, laho ma mandipar, gabe das ma Ia hu huta-Ni.

2Jadi iboan halak ma hu Bani sada halak na oyangon, tibal bani podomanni. Jadi dob ididah Jesus haporsayaon ni sidea, nini ma dompak na oyangon ai, “Tenger ma uhurmu ambia, domma sasap dousamu!”

3Anjaha tonggor ma, deba humbani sibotoh surat marpingkir ibagas uhurni, “Na mangapasi Naibata do Halak on!”

4Tapi ibotoh Jesus do pingkiran ni sidea ai, gabe nini ma, “Mase ma jahat pingkiran nasiam ibagas?

5Na ija do urahan hataonkon, ʻDomma sasap dousamuʼ atap mangkatahon, ʻJongjong ma ho, mardalan ma ho?ʼ

6Tapi ase ibotoh nasiam, na markuasa do Anak ni Jolma in manasap dousa i tanoh on. Ihatahon ma bani na oyangon ai, “Jongjong ma ho, boan ma podomanmu, mulak ma ho hu rumahmu!”

7Jadi jongjong ma ia, lanjar mulak hu rumahni.

8Mangidah ai na mabuei ai, mabiar ma sidea anjaha ipuji ma Naibata, na mambere kuasa na sonai banggalni bani jolma.

Pandilo ni Tuhan Jesus bani si Mateus

9Dob laho ia hunjai, ididah Jesus ma sada halak na margoran si Mateus, hundul i kantor sohei. Nini ma hu bani, “Irikkon ma Ahu!” Jadi jongjong ma ia, lanjar iirikkon ma Jesus.

10Jadi sanggah mangan Jesus i rumah ai, buei do sijalo sohei pakon pardousa rap mangan pakon Jesus ampa susian-Ni ai.

11Mangidah ai, nini Parisei ai ma hubani susian-Ni ai, “Mase ma rap mangan Gurunima rap pakon sijalo sohei ampa pardousa?”

12Ibogei Jesus ma ai, gabe nini ma, “Seng porlu doktor bani halak na jorgit, bani na boritan do.

13Laho ma nasiam, mangguruhon arti ni hata on, ʻIdop ni uhur do harosuh ni uhur-Hu, sedo galangan.ʼ Ai roh pe Ahu, sedo mandilo parpintor, halak pardousa do.”

Mase Lang Marpuasa Susian ni Tuhan Jesus?

14Dob ai roh ma hu Bani susian ni si Johannes manungkun, “Mase marpuasa hanami pakon halak Parisei, hape susian-Mu lang?”

15Jadi nini Jesus ma hubani sidea, “Mintor tarbahen ma marhoru hasoman-hasoman ni siparunjuk sadokah rap ope siparunjuk ai pakon sidea? Tapi na roh ma arini, buaton ma siparunjuk ai humbani sidea, jadi ijai ma sidea marpuasa.

16Seng dong halak mandungkapkon hiou na baru bani hiou na dob madotei, ai rigatkonon ni hiou na baru ai do hiou na dob madotei ai, gabe roh bangbangni ma na marigat ai.

17Seng ipausei halak anggur na baru hubagas gusi hulingkuling na buruk, mapultak holi gusi ai, gabe mambur anggur ai anjaha maseda iananni ai. Hubagas gusi hulingkuling na baru do nahkonon anggur na baru, jadi simpan ma haduasi ai.”

Ipagoluh Tuhan Jesus Boru ni si Jairus; Ipamalum Homa Sada Naboru na Boritan

18Sanggah marsahap Ia pasal ai hubani sidea, tonggor ma, roh ma sada halak kopala ni sinagoge (rumah parguruan), manrogop hu lobei-Ni, lanjar nini ma, “Tongkin on ope matei borungku; tapi roh ma Ham, anjaha tampeihon Ham ma tangan-Mu, ase manggoluh use ia.”

19Jadi jongjong ma Jesus, iirikkon ma ia, sonai homa susian-Ni ai.

20Jadi adong ma sada naboru, na dob sapuluh dua tahun sai roh pantang ni hiouni, idohori ma Ia hun pudi-Ni lanjar ijamah ma rambu ni hiou-Ni,

21ai ninuhurni ibagas, “Hiou-Ni gelah hujamah, malum ma ahu.”

22Jadi marhusor ma Jesus, ikawahkon ma ia, lanjar nini ma, “Tenger ma uhurmu inang, haporsayaonmu do na pagoluhkon ham!” Mintor malum ma naboru ai hunjia nari.

23Ase dob das Jesus i rumah ni kopala ai, ididah ma gosou siparsulim ampa halak na mabuei,

24jadi nini ma, “Misir ma nasiam! Sedo na matei dakdanak on, na modom do.” Jadi itartawai sidea ma Ia.

25Ase dob ipalaho halak na mabuei ai, masuk ma Ia, ijolom ma tanganni, gabe jongjong ma dakdanak ai.

26Jadi sar ma barita ai hu sab nagori ai.

Ipamalum Dua Halak na Mapitung

27Sanggah laho Jesus hunjai, adong ma dua halak na mapitung mangirikkon-Si, dilo-dilo, “Ham Anak ni si Daud! Idop ma uhur-Mu bennami!”

28Dob das Ia i rumah, roh ma na mapitung ai hu Bani. Jadi nini Jesus ma hubani sidea, “Porsaya do nasiam, paboa na margogoh do Ahu mangkorjahon in?” Nini sidea ma hu Bani, “Eak Tuhan, porsaya do!”

29Jadi ijamah ma mata ni sidea, lanjar nini ma, “Jumpah nasiam ma songon na hinaporsayaon nasiam ai!”

30Jadi buha ma mata ni sidea. Gogoh ma ipandang Jesus sidea, nini ma, “Jaga ma nasiam, ulang adong na mambotoh in!”

31Tapi ai pe sidea luar, isahap-sahapkon sidea ma pasal-Si hu sab nagori ai.

Ipamalum Sada Halak na Longah

32Sanggah na laho luar ai sidea, adong ma halak na mamboan hu Bani sada halak na longah, na siniaran ni setan.

33Dob iusir setan ai, marsahap ma na longah ai. Jadi longang ma halak na mabuei ai, nini sidea ma, “Seng ongga ope masa na sonin i tanoh Israel.”

34Tapi halak Parisei mangkatahon, “Marhitei kopala ni setan do iusir setan-setan ai.”

Idop ni Uhur ni Tuhan Jesus Mangidah Halak na Mabuei

35Jadi isiar Jesus ma sagala huta ampa dusun, mangajari do Ia bani parguruan ni sidea, iambilankon do Ambilan Na Madear pasal Harajaon in, anjaha ipamalum do sagala naborit ampa na niarou ni sidea.

36Jadi mangidah halak na mabuei ai, idop ma uhur-Ni, ai loja anjaha mambur merap do sidea songon biribiri na so marparmahan.

37Nini ma dompak susian-Ni ai, “Bolag do sisabion, tapi otik do siparhorja.

38Ai pe, elek-elek hanima ma Simada sisabion in, ase ipaingkat siparhorja bani sisabion-Ni in!”


  Share Facebook  |  Share Twitter

 <<  Matius 9 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel