Alkitab Mobile SABDA
[VER] : [SIMALUNGUN]     [PL]  [PB] 
 <<  Roma 15 >> 

Pasal Parjongjong ni Halak na Gogoh Dompak Halak na Galek

1Tapi hita na margogoh in, patut do manganju hagalekon ni na hurang gogoh, anjaha ulang ma rosuhta sandiri pindahi hita.

2Ganup ma hita mambahen rosuh ni uhur ni hasoman, gabe hadearonni, laho pauli-ulihonsi.

3Ai Kristus pe seng rosuh-Ni sandiri ipindahi, songon na tarsurat in, “Risa-risa ni na manrisai Ham mangonai do hu Bangku!”

4Ai sagala na tarsurat hinan, bahen podah banta do ai, ase tarsurat ai, ase marpangarapan hita halani hasabaron ampa apoh-apoh na ibagas Surat in.

5Tapi Naibata, simada hasabaron ampa apoh-apoh ma mambere bani nasiam hasadaon ni uhur samah nasiam mangihutkon rosuh ni Kristus Jesus,

6ase sauhur anjaha sasora ma nasiam mamuji Naibata, Bapa ni Tuhanta Jesus Kristus.

Ojur-ojur Marsada ni Uhur Samah Jahudi Ampa Kristen na hun Bani Sipajuh Begu-begu

7Halani ai marsijaloan ma nasiam, songon panjalo ni Kristus banta, bahen hasangapon ni Naibata.

8Ai huhatahon ma bani nasiam, na dob gabe pambalosi do Kristus bani na tarsunat halani hasintongan ni Naibata, laho patotapkon bagah-bagah, na hubani ompung na lobei,

9anjaha sipajuh begu-begu pe pasangapkon Naibata do halani idop ni uhur-Ni, songon na tarsurat in, “Halani ai pujionku do Ham i tongah-tongah ni sipajuh begu-begu, anjaha dodingkononku do goran-Mu.”

10Anjaha ihatahon use, “Marmalas ni uhur ma nasiam sipajuh begu-begu rap pakon bangsa-Ni!”

11Dob ai use, “Puji ma Tuhan in, nasiam haganup sipajuh begu-begu, anjaha haganup ma bangsa mamuji-Si.”

12Anjaha si Jesayas pe nini do, “Adong ma urat ni si Jesse, anjaha jongjong ma na manggomgom sipajuh begu-begu. Bani do mangarap sipajuh begu-begu.”

13Tapi Naibata, simada pangarapan in ma manlayak-layakkon bani nasiam hagogok ni malas ni uhur ampa damei marhitei haporsayaon, ase lambin tambah nasiam marpangarapan marhitei gogoh ni Tonduy Na Pansing.

Hatorangan ni si Paulus Ase Itongos Surat on

14Ahu pe torang do hubotoh, nasiam saninangku, paboa na dob gok do nasiam bani na madear, marisi bani haganup habotohon, anjaha boi marsipodah-podahan samah nasiam.

15Tapi sonai pe, mapagtu do ahu manurat bani deba suratku bani nasiam, songon na pasingatkon nasiam, halani idop ni uhur na binere ni Naibata bangku,

16ai gabe siparugas bani Kristus Jesus ampa gabe malim ni Ambilan Na Madear na humbani Naibata bani bangsa sipajuh begu-begu, ase gabe galangan na hinarosuhkon ni Naibata sidea haganup, na pinapansing ibagas Tonduy Na Pansing.

17Ibagas Kristus Jesus, adong do na mambahen megah uhurhu pasal horjangku i lobei ni Naibata.

18Ai seng barani ahu mangkatahon atap aha pe, sobali na binahen ni Kristus marhitei ahu, ai ma laho manogu-nogu sipajuh begu-begu hu pambalosion ibagas hata ampa pambahenan,

19marhasoman hagogohon ni tanda ampa halongangan, ibagas hagogohon ni Tonduy Na Pansing, gabe das huambilankon Ambilan Na Madear na humbani Kristus, mamungkah hun Jerusalem ampa nagori inggotni ai das ronsi Iliria.

20Hasangaponku do huhira na mangambilankon Ambilan Na Madear in bani ianan, na so tarbogei ope ijai goran ni Kristus, ase ulang ahu songon na pauli rumah bani onjolan ni halak na legan,

21tapi songon na tarsurat in ma, “Marpangidah ma na so dapotan barita pasalsi, anjaha mangarusi ma na so ongga mambogeisi.”

22On do halani mambahen gati tarabat ahu marayak nasiam.

23Tapi anggo nuan, seng adong be sihorjahononku i nagori ai; anjaha domma piga-piga tahun hinan ihasiholi uhurhu marayak nasiam, bani pardalananku na laho hu Spania.

24Ai arap do uhurhu, idahonku nasiam sanggah na montas ahu, anjaha itaruhkon nasiam ahu hujai, dob lobei sombuh uhurhu otik mangidah nasiam.

25Tapi hu Jerusalem ope langkahku sonari, laho marugas bani halak na pansing ai,

26ai iputuskon kuria na i Mekedonia ampa na i Akaya do, mambahen tumpak pangurupion bani hasoman na mapansing na hurangan i Jerusalem.

27Domma sonai iputuskon sidea, ai parutang do sidea tongon bani sidea ai. Ai anggo gabe parrupei sipajuh begu-begu bani arta partonduyon na adong bani sidea, patut do sipajuh begu-begu mangurupi sidea pasal na porlu bani pardagingon.

28Anggo domma husaloseihon ai anjaha hupadas buah ai bani sidea, sihol do ahu bingkat hu Spania, anjaha singgah bani nasiam.

29Tapi hubotoh do, anggo roh ahu bani nasiam, ibagas hagogok ni pasu-pasu ni Kristus do ahu roh.

30Tapi ojur-ojur hubani nasiam, ale hasoman, marhitei Tuhanta Jesus Kristus ampa marhitei holong ni uhur ni Tonduy in: Hasomani nasiam ma ahu maruntol marhitei na manonggohon ahu bani Naibata,

31andohar ipaluah ahu humbani halak na so porsaya i Judea, anjaha iharosuhkon halak na mapansing ai horjangku na hu Jerusalem ai,

32andohar marmalas ni uhur ahu das bani nasiam, domu hubani rosuh ni Naibata, boi marsaran bani nasiam.

33Naibata Pardamei in ma mangkasomani nasiam ganup. Amen.


  Share Facebook  |  Share Twitter

 <<  Roma 15 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran