Dual PanelBatu Pardingatan pakon Anjapanjap na i Dolog Ebal
1Dob ai iparentahkon si Musa pakon pangintuai ni bangsa ai ma hubani bangsa ai, Ramotkon nasiam ma ganup tonah, na dob hutonahkon in bamu sadari on.
2Anggo domma idipari nasiam Jordan, das nasiam hu tanoh sibereon ni Jahowa Naibatamu bamu, maningon pajongjongonmu ma bamu batu na bolon, anjaha lapuonmu ma ai bani hapur,
3anjaha uhirhononmu ma hujai ganup hata ni titah on, anggo domma mandipar ham masuk hu tanoh sibereon ni Jahowa Naibatamu bamu, tanoh habaoran ni dadih pakon manisan ni huramah, songon na dob pinarbagah-bagah ni Jahowa Naibata ni ompungmu hinan bamu.
4Anjaha anggo domma idipari nasiam Jordan, maningon pajongjongon nasiam ma batu on songon na dob hutonahkon in bani nasiam sadari on, i atas ni Dolog Ebal, anjaha lapuon nasiam ma in bani hapur.
5Maningon pajongjongonmu homa ijai sada anjapanjap bani Jahowa Naibatamu, sada anjapanjap humbani batu; seng bulih dais hujai parugas bosi.
6Maningon humbani batu na so binarbar pajongjongonmu anjapanjap bani Jahowa Naibatamu; anjaha maningon galangkononmu do i atasni galangan situtungon bani Jahowa Naibatamu,
7anjaha maningon galangkononmu homa galangan pardameian, anjaha panganonmu ijai, lanjar marmalas ni uhur ma ham i lobei ni Jahowa Naibatamu.
8Anjaha maningon torang tumang do uhirhononmu hubani batu ai hata ni titah on.
9Dob ai nini si Musa pakon malim na humbani marga Levi ma dompak ganup Israel, Pasonang anjaha tangihon ma alo Israel, sadari on ma nasiam gabe bangsa ni Jahowa Naibatamu.
10Halani ai sai tangihon ma sora ni Jahowa Naibatamu, anjaha horjahon ganup tonah-Ni pakon aturan-Ni, sagala na hutonahkon in bamu sadari on.
Pasu-pasu hun Dolog Garisim, Papa hun Dolog Ebal
11Dob ai iparentahkon si Musa ma hubani bangsa ai bani ari ai,
12“Anggo domma idipari nasiam Jordan, maningon jongjong ma i atas ni Dolog Garisim manaurhon pasu-pasu hubani bangsa in: Morga Simeon, Levi, Juda, Isasar, Josep pakon Benjamin.
13Anjaha marga on ma na maningon jongjong i atas Dolog Ebal mangkonahon papa: Morga Ruben, Gad, Asser, Sebulon, Dan pakon Naftali.
14Dob ai pagogohon ni halak Levi ma sora ni sidea manaurhon hubani ganup bangsa Israel,
15Hona papa ma barang ise na mambahen gana-gana, na niuhir barang na tinuang, hagigian ni Jahowa, jadi-jadian ni tangan ni halak na pandei, anjaha ipajongjong ai bani ianan na ponop. Dob ai balosan ni ganup bangsa ai ma. “Amen!”
16Hona papa ma barang ise, na marpis ni uhur mangidah bapani barang inangni. Dob ai, hatahonon ni ganup bangsa ai ma. “Amen!”
17Hona papa ma barang ise na paosor parbalogan ni hasomanni. Dob ai balosan ni ganup bangsa ai ma. “Amen!”
18Hona papa ma barang ise na pakahouhon halak na mapitung i tongah dalan. Dob ai hatahonon ni ganup bangsa ai ma. “Amen!”
19Hona papa ma barang ise na papeol uhum bani halak dagang, dakdanak na tading maetek pakon puang-puang na mabalu. Dob ai hatahonon ni ganup bangsa ai ma. “Amen!”
20Hona papa ma barang ise na paganjang parinangon ni bapani, halani na dob marsaor bapani pakonsi. Dob ai hatahonon ni ganup bangsa ai ma. “Amen!”
21Hona papa ma barang ise na marsaor pakon pinahan aha pe. Dob ai hatahonon ni ganup bangsa ai ma. “Amen!”
22Hona papa ma barang ise na marsaor pakon botouni, na sada bapa barang na sada inang pakonsi. Dob ai hatahonon ni ganup bangsa ai ma. “Amen!
23Hona papa ma barang ise na marsaor pakon simatuani naboru. Dob ai hatahonon ni ganup bangsa ai ma. “Amen!”
24Hona papa ma barang ise na mamunuh hasomanni ibagas na ponop. Dob ai hatahonon ni ganup bangsa ai ma. “Amen!”
25Hona papa ma barang ise manjalo sisip, laho mamunuh sada halak, anjaha na manduruskon darohni na so marpipot. Dob ai hatahonon ni ganup bangsa ai ma. “Amen!”
26Hona papa ma barang ise na so pajonamkon hata ni titah on marhitei na mangkorjahon ai. Dob ai hatahonon ni ganup bangsa ai ma. “Amen!”