Dual PanelNa lang do Sisombah-sombahon, Pitah Jahowa do Siparkuasa
1Tangar ma hata, na hinatahon ni Jahowa bannima, ale ginompar ni Israel!
2Sonon do hata ni Jahowa, “Ulang ma marguru hanima bani dalan ni sipajuh begu-begu, ulang ma tarsonggot hanima ibahen tanda na i langit, tongon, bangsa parbegu do tarsonggot bani sisonai ai;
3tongon, na lang do naibata ni parbegu: Sada hayu iroboh hun harangan, anjaha tuhang manukangi ai marhitei pisou.
4Ipajagar ma ai bani omas ampa pirak, ipahat marhitei paku ampa parpalu, ase ulang tarbahen miut.
5Songon halak-halak do ai i paransimunan, seng boi marsahap; siusungon do ai, ai seng boi mardalan. Ulang ma habiari hanima sidea, ai seng tarbahensi mambahen na masambor, anjaha mambahen na madear pe seng dong gogohni.”
6Seng dong na songon Ham, ale Jahowa. Banggal do Ham, anjaha timbul do goran-Mu marhitei hagogohon.
7Ise ma na so mangkabiari Ham, ale Raja ni bangsa-bangsa? Ai sonin do talup i lobei-Mu. Seng dong na songon Ham i tongah-tongah ni sagala na maruhur bani bangsa-bangsa ampa bani sab harajaon ni sidea.
8Haganup do sidea lontong anjaha bodoh; pangajarion ni sisombah-sombahon, seng marguna ai.
9Pirak ialop hun Tarsis anjaha omas hun Uphas; itukangi ma ai marhitei sipanguhir ampa tukang omas; mahonda anjaha magerger do pakeianni ibahen; anjaha jadi-jadian ni tangan ni tukang do ai ganupan.
10Tapi Jahowa, ai ma Naibata na sintong; Ia do Naibata na manggoluh anjaha Raja sisadokah ni dokahni. Dugur do tanoh on ibahen gila-Ni, anjaha bangsa-bangsa seng tahan i lobei ni ringis-Ni.
11Sonai do hatahononnima bani sidea, ʻNaibata-naibata ai, na so sitompa langit pakon tanoh on, maningon do bois hun tanoh ampa hun toruh ni langit.ʼ
12Jahowa do na manjadihon tanoh on marhitei hagogohon, Ia do na pajonamkon dunia on marhitei hapentaran-Ni, anjaha marhitei habotohon-Ni ipaherbang do langit.
13Anggo ipabogeihon sora-Ni marhasak ma bah i langit, anjaha marhitei parentah-Ni naik do hombun hun ujung ni tanoh on. Hilap do ibahen parohkon udan, anjaha iparoh do logou humbani rumah panimpanan-Ni.
14Na bodoh do ganup jolma, seng dong pangartianni; bador do haganup tuhang omas halani gana-ganani; ai sipaoto-oto do gana-gana ai, seng dong hosah ibagas.
15Logou do hansa ai, jadi-jadian na pakahouhon; magou do ganupan ai bani panorang pambalason bani sidea.
16Tapi seng sonai anggo rupei ni si Jakob; Ia do na manjadihon sagala na dong, anjaha Israel marga parbagianan-Ni; Jahowa Zebaot do goran-Ni.”
Tangis-tangis ni Bangsa na Hona Uhum ai ampa Tonggo ni si Jeremia
17Patumpu ma ugas-ugasmin, ho ale na hinubu.
18Ai sonon do hata ni Jahowa, “Tonggor ma, ambukkonon-Ku do isi ni tanoh in santorap on, anjaha parohon-Ku do hasosakan bani sidea, ase mangahap sidea.
19Mogouni in ahu halani ugahkon! Borit do ugahku! Tapi ningku do, ʻAnggo ningon sonai ma sitarononku, na taron ma!ʼ
20Maseda do lampolampongku, mangkarotap talini; itadingkon niombahku do ahu, seng dong be sidea; seng dong be na pajongjong lampolampo bangku, ampa na paherbang tendangku.
21Ai na oto do siparmahan, seng ipindahi Jahowa, halani ai seng mardohar sidea, mambur merap do ganup hulanan ni sidea.
22Tangar ma, roh do sada barita, sada hageoron banggal roh do hun tanoh parutara, laho parsedahon huta ni Juda, ase gabe ianan ni sorigala.
23Hubotoh do, ale Jahowa, sedo hape guru bani jolma langkahni, anjaha sedo halak pardalan-dalan na manontuhon langkahni.
24Pinsang Ham ma ahu, ale Jahowa, asal marpangantan; ulang ibagas ringis-Mu, ase ulang bois ahu.
25Useihon Ham ma ringis-Mu bani bangsa sipajuh begu-begu na so mananda Ham, ampa bani bangsa na so mandilo goran-Mu, ai ibondut sidea do Jakob, ibondut sidea do ia anjaha iboiskon, anjaha tarulang do ibahen iananni.”