Dual Panel1Kaula ningal kana lalangit nu melengkung luhureun mahluk-mahluk jangjangan tea. Di luhureunana katingal aya nu siga tahta tina batu nilem.
2Allah nimbalan ka jelema anu papakeanana lawon linen, timbalana-Na, "Maneh asup ka ditu, kana sela kikiping-kikiping handapeun mahluk-mahluk tea, kudu ngarawu ruhak ti dinya, terus awurkeun ruhakna ka jero kota." Eta jelema indit, ku kaula diawaskeun.
3Waktu manehna geus nepi, mahluk-mahluk teh keur narangtung di Bait Allah beulah kidul, ari di buruan jero pinuh ku mega.
4Cahaya gumebyar anu nandakeun sumpingna Allah katingal mumbul ti lebah eta mahluk-mahluk jangjangan, ngeser ka lebah bangbarung panto Bait Allah. Seug Bait Allah teh pinuh ku mega, ari di buruanana caang mani mabra.
5Jangjang mahluk-mahluk tea ngabijilkeun sora mani ngaguruh, ka buruan luar oge kadenge, sorana lir gentra Allah Nu Maha Kawasa.
6Jelema anu papakeanana lawon linen, anu ku PANGERAN dipiwarangan nyokot ruhak nu aya dina sela kikiping-kikiping handapeun mahluk-mahluk, geus aya di dinya, nangtung deukeut salah sahiji kikiping.
7Mahluk anu hiji leungeunna nyolongkrong kana seuneu anu keur disalanghareupan, ngarawu ruhak terus diteundeun dina dampal leungeun eta jelema, sarta ku eta jelema di bawa ti dinya.
8Katingal mahluk-mahluk teh baroga anu siga leungeun jelema di handapeun jangjangna masing-masing.
9(10:9-10) Di dinya aya opat kikiping anu bangunna sarua, di gigireun mahluk-mahluk tea hiji-hiji. Eta kikiping-kikiping tingponcorong lir batu permata, sarta pada ngabogaan hiji kikiping deui anu malang di tengah-tengah nu sejenna.
10(10:9)
11Mahluk-mahluk tea bisa gerak ka jihat mana bae, bari teu kudu muterkeun awak, jeung bisa gerak bareng kumaha karep tanpa muterkeun awakna.
12Saluar awakna, tonggongna, leungeunna jeung jangjangna, kitu deui kikiping-kikiping tea, pinuh ku mata.
13Ari kikiping-kikiping tea bangunna sarua jeung anu katingal dina titingalan kaula anu kahiji.
14Mahluk-mahluk teh beungeutna pada opat-opat: hiji beungeut sapi, hiji beungeut jelema, hiji beungeut singa, hiji beungeut manuk rajawali.
15(Opatanana ge mahluk anu bareto katingal di sisi Walungan Kebar tea.) Ana eta mahluk-mahluk mumbul ka awang-awang,
16atawa obah, kikiping-kikiping tea nuturkeun. Ari eta mahluk-mahluk meberkeun jangjang arek hiber ge kikiping-kikiping teh milu kabawa.
17Mun mahluk-mahluk tea eureun, kikiping-kikiping ge eureun. Mun eta mahluk-mahluk hiber, kikiping-kikiping ge milu, sabab diatur ku mahluk-mahluk tea.
18Geus kitu cahaya gumebyar tanda hadirna PANGERAN teh pindah tina bangbarung panto Bait Allah ka luhureun eta mahluk-mahluk.
19Seug eta mahluk-mahluk teh maleberkeun jangjangna, tuluy haliber, mumbul ninggalkeun beungeut taneuh, dituturkeun ku kikiping-kikiping tea. Ku kaula terus bae diawaskeun. Di palebah gapura Bait Allah beulah wetan hiberna areureun, diauban ku cahaya anu gumebyar.
20Kaula apal, eta mahluk-mahluk teh anu bareto katingal, anu pernahna di handapeun Allahna Israil, basa di sisi Walungan Kebar.
21Nu ieu ge beungeutna teh opat-opat, jangjangna opat-opat, jeung di jeroeun jangjangna aya anu siga leungeun jelema.
22Beungeut-beungeutna ge sarua jeung anu kungsi katingal di sisi Walungan Kebar. Geus kitu eta mahluk-mahluk teh kebat ka hareup.