Alkitab Mobile SABDA
[VER] : [TAA]     [PL]  [PB] 
 <<  Kisah Para Rasul 17 >> 

1Wali tempo i Paulus sira dua i Silas meyoko yako ri kota Pilipi etu, sira malinja liu ri kota Ampipolis pasi Apolonia, rata nja’u kota Tesalonika. Nja’u ria re’e banua to napampotunde nto Yahudi.

2Wali i Paulus yau ri banua etu ewa to ia biasa mangika. Togo minggu kasaenya ponto ri Eo Rapandoo ia yau magombo-gombo resi tau to siromu nja’u ria mampakanasaka sira pampobuuka to si ia mangkonong batuanginya tuntu i mPue Allah. Pasi sira manganto’oka seja ia pampobuuka to si sira.

3Ia mangabasaka tau etu gombo to ratulis yami ri raya ntuntu i mPue to manganto’o i Kerisitu, Makole parajanji i mPue Allah Ia taa maya taa rasesai sampe mate yau, pei roo see Ia damambangu muni yako ri kapateNya etu. Wali ojo karoonya i Paulus mangabasaka sira tuntu i mPue etu ia mampakanasaka resi sira, to’onya, “Gombo etu semo to mampakatantu raya ngkita i Yesu to kupakarebaka resi komi etu, Ia semo i Kerisitu, Makole parajanji i mPue Allah.”

4Wali tau to mangandonge gombo i mPaulus etu, boros kojo to mangaya gombo i mPaulus mangkonong i Pue Yesu etu pasi mangaluluka i Paulus sira dua i Silas. Re’e sangga’a to Yahudi, pasi boros kojo to Yunani to mampalaika i Pue Allah saba manga’angga Ia, pasi boros seja tau we’a to bose angganya to mangaya pasi mangalulu etu.

5Pei to Yahudi to taa mangaya i Pue Yesu, sira timopo rayanya pasi kaloo mangkita boros kojo tau to mangaluluka tau dua etu. Wali to Yahudi to etu sira mampokio bara sawei mba’a tau to maja’a lengkonya panewa sindara-ndara pei tau maja’a etu sira mampasiromunaka tau boros kojo pei mangika rotai to bae ri kota etu. Yako etu sira mangampago banua i Yason apa ia semo to mampalinggona i Paulus sira dua i Silas. Sira rani mangansoko tau dua etu panewa mangkenika tau boros.

6Pei tempo sira yau ri banua i Yason etu, sira taa mangarata i Paulus dua i Silas, wali sira mangansoko i Yason pasi bara sawei mba’a pua’inya to samba’a pangaya. Sira mangaditi i Yason pasi yununya etu rata ri tango nto pobotus nu ngkota etu. Sira manganto’o, “I Paulus pasi yununya mampakasusa tau juku ri lino si’i, pasi si’i-si’i naratam seja ri lipu ngkita damampakasusa seja kita.

7Pei i Yason si’i, ia masanang mampalinggona sira. Sira samparia mangewa porenta-porenta makole nto Roma, sira manganto’o re’e wo’u makole to yusa, sanganya i Yesu.”

8Wali tau boros pasi to pobotus paka marotai rayanya mangandonge gombo ntau etu.

9Wali to pobotus etu manganto’oka i Yason pasi yununya, sira manganto’o, “Bayar ruyu kami see kami damangalapa muni komi. Ane komi tamo mangika palaong to maja’a etu, kami damangawaika muni doi.” Wali i Yason pasi yununya mangawaika tau etu doi, panewa sira ralapa muni.

10Wali yako etu, ojo kawurinya rao, i Paulus sira dua i Silas napokau mpua’inya to samba’a pangaya etu yau njo’u kota Berea. Ojo karata nsira dua nja’u Berea etu, sira dua masua ri raya banua to napampotunde nto Yahudi.

11Wali to Yahudi to nja’u nja’u kota etu sira semo to sana-sanang mampodongeka tuntu i mPue pei tau ri Tesalonika. Tempo i Paulus mampotundeka sira tuntu i mPue Allah, sira masanang kojo mampodongeka, pasi ponto eo sira mamparesa tuntu i mPue etu mampakanasa bara monso pu’u anu to nato’oka i mPaulus sira etu, bara taa.

12Wali boros to Yahudi etu to mangaya i Pue Yesu. Pasi ane to Yunani ewa see seja. Boros tau we’a nsira to bose angganya to mangaya pasi boros seja to langkai.

13Pei yako etu to Yahudi to nja’u Tesalonika to kaloo seore mangkita tau boros mangalulu i Paulus pasi yununya, sira mangandonge kareba to manganto’o i Paulus re’e seja mampakarebaka tuntu i mPue resi tau nja’u kota Berea. Wali sira mangampago kota Berea. Ojo karata nsira, sira mangarotai pasi mampakasusa raya ntau boros nja’u ria.

14Wali tempo etu, i Paulus mansaka napokau mpua’inya to samba’a pangaya etu yau lo’u wii ntasi. Pei i Silas sira dua i Timotius ojo maroo ri kota Berea.

15Wali tempo i Paulus yau lo’u wii ntasi etu, re’e bara sawei mba’a tau to yau mangantambo ia rata ri kota Atena. Panewa tau etu mawolili muni ndeku Berea, sira mangkeni patuu i mPaulus resi i Silas sira dua i Timotius. Ia manganto’oka sira dua, “Pakagasi imba pata pangkurang ngkomi dua mangampago aku la’u kota Atena.” Etu semo patuu i mPaulus.

16Wali tempo i Paulus la’u la’u Atena mangampea-mpeas yununya etu, ia masusa kojo rayanya mangangkita boros kojo tau-tau to napue ntau la’u ria.

17Wali ia yau ri banua to napampotunde nto Yahudi panewa ia magombo resi to Yahudi pasi tau to si’a to Yahudi to masuamo ri agama nto Yahudi. Ia magombogombo mampakanasaka sira mangkonong pampobuuka to si ia. Pasi sira manganto’oka seja ia pampobuuka to si sira. Pasi ewa see seja nikanya ponto eo resi tau to ia mangarata la’u pasar.

18Wali ri kota etu re’e seja tau to aliran Epikuros pasi aliran Stoa. Tau to mampoguru aliran etu re’e masibanta pei i Paulus. Panewa re’e tau to manganto’o mangkonong i Paulus, sira manganto’o, “Gete! Kesaa nansani ntau si’i? Gombonya boros kojo, pei tare batuanginya.” Pasi re’e wo’u tau to manganto’o, “Bara pue ntau to yusa to ia mampakarebaka kita ta’anya.” Naka pei sira manganto’o ewa wetu apa i Paulus re’e mampakarebaka sira mangkonong i Yesu pasi ia manganto’oka sira, “I Yesu nambangu muni yako ri kapateNya pasi samparia tau to mate darawangu muni seja yako ri kapatenya.”

19Wali sira mangkeni i Paulus nto’u tampa to rapangabotus ri rapa mpantana to sanganya Areopagus. Rata ndate ria sira manganto’oka ia, “Sawang pakanasaka kami anu to bou to nupotundeka ngkorom etu.

20Apa anu to nupotundeka ngkorom etu yusa kojo apa kami tawa re’e mangandonge anu to ewa wetu, wali see naka kami rani mangansani batuanginya.”

21(Wali naka pei tau etu manganto’oka i Paulus ewa see apa tau Atena pasi tau rata to maroo nja’u ria etu, palaong to bae kojo batuanginya resi sira, etu semo magombo-gombo pasi mampodongeka mangkonong anu to tawa nansani nsira.)

22Wali i Paulus makore ri tango ntau to siromu ndate rapa mpantana Areopagus etu, panewa ia manganto’o, “O to Atena! Aku mangkita samparia palaong ngkomi mangalulu kojo agama.

23Apa tempo aku malinja-linja ri kota ngkomi si’i aku re’e mangkita boros anu to nupue ngkomi. Pasi aku mangarata seja palampa to nja’u ratulis, ‘RESI PUE TO TAA RANSANI.’ Wali Pue to nupue ngkomi pasi to taa nunsani ngkomi etu, Pue etu semo to kupakarebaka resi komi.

24“Wali i Pue Allah anu nampapowali lino pasi samparia bananginya, Ia semo Pue nu yangi pasi Pue nu lino. Ia taa maroo-roo ri banua-banua to naika ntau.

25Pasi tare to maya naika nto lino damangansawang Ia, apa Ia tare to napoipu, apa Ia semo to mangawaika to lino katuwu pasi nosa pasi samparia to re’e resi kita.

26Wali i Pue Allah nampapowali samba’a tau panewa yako tau samba’a etu Ia nangika samparia to lino panewa mampokauka sira yau damaroo ri sambawo lino. Pasi Ia mampakatantuka yami kita temponya katuwu ngkita pasi ungka nu lipu nakaroos ngkita.

27Naka pei naika i mPue Allah ewa wetu, see to lino damangaliwu Ia, see tuwu-tuwuja kita dasimparata pei Ia tempo mangaliwu Ia etu. Pei kamonsonya i Pue Allah Ia taa longko yako resi kita samba’a pei samba’a.

28Apa ane ewa panto’o ntau, ‘Ia semo pu’u ngkatuwunta, pu’u mpolengkonta, pasi pu’u ngkare’enta.’ Ewa see seja to nato’o ntau ngkomi to pande makayori, sira manganto’o, ‘Kita samparia seja wiyaaNya.’

29“Wali ane kita wiyaaNya, taa matao ane kita mampobuuka i Pue Allah anu samba’aja etu Ia sewaju ewa tau-tau to raika yako weyawa, bara yako pera, bara watu, to naika nto lino yako ri kapandenya pasi yako ri pampobuukanya.

30Tempo ruyu, tempo to lino tawa mangansani pamporani i mPue Allah, tempo etu i Pue Allah ojo mangansabaraka sala to naika ntau etu. Pei ri tempo si’i Ia mamporentang samparia tau ri sambawo lino, to’oNya, ‘Pajeamo!’

31Naka pei Ia manganto’o ewa wetu apa Ia room mampakatantu temponya darapangabotus to lino. Pasi re’e samba’a tau, i Yesu semo, to napilis i mPue Allah mangabotus to lino etu, wali Ia damangabotus to lino singkonong pei anu to masipato raika. Wali i Pue Allah room mampakanasaka resi samparia kita to lino monso pu’u Ia damangika palaong etu. Wali anu to inikaNya mampakanasaka kita, etu semo Ia mangawangu muni i Yesu etu yako ri kapateNya.”

32Wali ojo karoonya i Paulus magombo mangkonong tau rawangu muni yako ri kapateNya etu, tau to mangandonge gombonya etu sangga’a to mampokore ia. Pei re’e seja tau yusa to manganto’o, “Sangkani wo’u kami tiroowa rani mangandonge gombo ngkorom mangkonong palaong to etu.”

33Wali yako etu i Paulus mampiyaika sira.

34Pei re’e bara sawei mba’a tau to mangaluluka ia pasi to mangaya i Pue Yesu. Tau etu samba’a sanganya i Dionisius. Ngkai etu samba’a to pobotus ri Areopagus. Pasi re’e seja tau we’a to sanganya i Damaris, pasi re’e seja bara sawei mba’a tau to yusa.


  Share Facebook  |  Share Twitter

Download Audio MP3 (Kisah Para Rasul 17):
Mobile (Low Quality) - CD (High Quality)

 <<  Kisah Para Rasul 17 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2018
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran