Alkitab Mobile SABDA
[VER] : [TAA]     [PL]  [PB] 
 <<  Markus 1 >> 

1Si’i semo pamulanya kareba matao mangkonong i Yesu Kerisitu, Ana i mPue Allah.

2Wali re’e katawanya i Yesu ma’i ri lino, i Pue Allah mangika parajanji resi Ia. Parajanji etu natulis nto pantuntu tuntu i mPue Allah, i Yesaya, tempo owi. Wali i Pue Allah manganto’oka i Yesu, “Aku damampokau tau to damamporata gombongKu. Ia damampatiruyu pei Korom damampasilongaka Korom jaya.”

3Pasi mangkonong tau to rapokau etu, i Pue Allah manganto’o, “Re’e tau maroso loonya mampogomboka tau boros nja’u pada bone, ia manganto’oka tau etu, ‘Tamo masae i Pue darata. Wali ewa naika ntau mampasilongaka yami i makole jaya see taa masuli palinjanya, ewa wetu seja nuika ngkomi mampasilonga raya ngkomi damangaya i Pue.’” Wali etu semo to natulis i Yesaya tempo owi.

4Wali i Yohanes to Pombaptis mangabanang gombo to ratulis etu. Ia mangika seja lengko nto pantuntu tuntu i mPue tempo owi, see naka ia pakenya pela nu binatang unta, pasi salipinya seja pela nu binatang. Pasi see naka pangkoninya kaborosinya mpa’o pei juu. Wali i Yohanes etu, ia rata nja’u pada bone, panewa tempo etu boros tau to mampago ia. Tau etu sangga’a yako ri kota Yerusalem, pasi sangga’a wo’u yako samparia lipu ntau to ri propinsi Yudea.. Wali i Yohanes mampakarebaka resi tau boros etu, ia manganto’o, “Pojeamo see i Pue Allah damangalapa dosa ngkomi. Panewa rabaptis see palaong etu damawali tondong to mampaponsanika tau boros komi roomo majea.” Wali tau boros etu sira mampodongeka gombo i Yohanes etu pasi mampongakung dosa nsira, panewa i Yohanes mangabaptis sira nja’u koro Yordan.

5(1:4)

6(1:4)

7Panewa roo see ia manganto’oka wo’u sira, “Aku mangabaptis komi mangika tondong komi majeam. Wali tempo aku mangabaptis komi etu, aku mangampake ue. Pei re’e tau to dama’i wo’u yako aku si’i, Ia semo to bae-bae kuasaNya pei aku. Ia bae kojo anggaNya see naka aku mangepe aku nempo ojo madungku mangayali so’o nsapatuNya taa masipato. Wali tau to dama’i etu taa damangabaptisika komi ue. Ia damangabaptiska komi i Nosa Mapasing batuanginya Ia damampaporoo i Nosa Mapasing ri raya ngkomi.”

8(1:7)

9Wali tempo i Yohanes nja’u koro Yordan, tempo etu ma’i i Yesu yako ri kota Nasaret nja’u propinsi Galilea. Wali tempo Ia rata nja’u koro Yordan, Ia nabaptis i Yohanes ri koro Yordan etu.

10Ojo karoonya Ia rabaptis Ia miyai muni yako ri ue. Pei tempo Ia miyai yako ri ue etu, Ia mansaka mangkita yangi tiloka pei Ia mangkita i Nosa Mapasing yako ndate yangi ewa tagou tudu ri wawoNya.

11Pasi tempo etu re’e radonge loo yako ndate saruga, loo etu manganto’o, “Korom semo anangKu anu Kuporayang kojo. Aku masanang kojo resi Korom.”

12Wali ojo karoonya i Yesu mangandonge loo etu, i Nosa Mapasing mansaka mampokau Ia yako ri koro Yordan nto’u pada bone. Pada bone etu tare tau nakaroo, ojo binatang to maila to maroo ndate ria. Wali i Yesu Ia opo mpuyu mbengi kasaenya maroo-roo ndate ria, pasi tempo etu Ia nagoda i ngKepala Measa. Ojo karoonya Ia nagoda i ngKepala Measa kagananya opo mpuyu mbengi etu, panewa ma’i pomakau i mPue Allah yako ndate saruga, ma’i mangansawang Ia.

13(1:12)

14Wali re’e seore i Yohanes to Pombaptis ratarungku. Tempo ia nja’uwa nja’u raya ntarungku, tempo etu i Yesu yau njo’u propinsi Galilea. Rata nja’u ria Ia mampakarebaka resi tau boros kareba matao yako resi i Pue Allah.

15Si’i kareba matao anu nato’oka i Yesu tau boros etu. Ia manganto’o, “Daratamo temponya i Pue Allah damawali Makole ri lino. Wali see naka pojeamo pei aya kareba matao yako resi i Pue Allah etu.”

16Wali yako etu, re’e seore i Yesu yau njo’u rano Galilea. Rata nja’u ria Ia malinja ri wii ndano etu. Ri raya mpalinjaNya etu, Ia re’e mangkita dua mba’a tau sintua’i. Sanga ntau dua etu i Simon sira dua i Andreas. Sira dua manganjala bau ri rano etu apa sira dua to panjala.

17Wali i Yesu mangansale sira dua, Ia manganto’o, “Yau lulu Aku pei mawali anagurungKu. Apa tempo si’i komi to panjala bau, pei Aku damangawaika komi palaong to bou. Wali si’amo bau to danuliwu ngkomi. Aku damampotundeka komi yau damansale tau see sira damangalulu seja Aku.”

18Wali ojo pangandonge nsira dua gombo i Yesu etu, sira mampiyaikamo jalanya, mansaka yau mangalulu Ia.

19Wali yako etu sira togo malinja wo’u. Pei tawa longko palinja nsira etu, sira mangkita wo’u tau dua to sintua’i. Tau dua etu ana i nSebedeus, i Yakobus sira dua i Yohanes. Wali sira dua re’e sindarandara pei pa’anya ri raya bangka, pasi to papolaong mpa’anya re’e seja. Sira tongo-tongonya mangkariang jala-jala nsira. Wali i Yesu mansaka mampokio i Yakobus sira dua i Yohanes, Ia mangansale sira dua mangalulu seja Ia. Wali sira dua mampiyaika yau pa’anya pasi to papolaonginya nja’u raya bangka nsira etu pei yau mangalulu Ia.

20(1:19)

21Wali ojo karoonya i Yesu mangansale tau opo etu mawali anaguruNya, yako etu sira yau lo’u kota Kapernaum. Rata la’u ria, ojo karatanya Eo Rapandoo, sira yau njo’u banua to napampatunde nto Yahudi panewa i Yesu mampotundeka tau to siromu nja’u ria.

22Wali tempo tau to siromu etu mangandonge i Yesu mampotundeka sira, sira ipu rayanya. Naka pei ipu raya nsira apa i Yesu mampotundeka sira si’a ewa naika ntau to mampoguru porenta i Musa. Pei Ia mampotundeka sira ewa tau to nawaika i mPue Allah kuasa.

23Wali tempo i Yesu mampotundeka tau ri raya banua to napampatunde nto Yahudi etu, tempo etu nja’u seja ngkai to naposuak measa. Ngkai etu maroso loonya kaboo,

24ia manganto’o, “O Yesu to Nasaret, kesaa Komi damangika resi kami to measa? Wimba Komi bara ma’i mampakaja’a kami? Aku kunsani Komi. Komi semo Tau anu Mapasing yako resi i Pue Allah!”

25Pei i Yesu mamporentang measa to re’e resi ngkai etu. Ia manganto’o, “Karoti pei piyaimo yako resi ngkai si’i.”

26Wali measa etu maroso loonya kajio pasi mangika ngkai etu kanjonjo-njonjo, panewa ia mampiyaika ngkai etu.

27Wali tempo tau boros to nja’u raya banua etu mangkita palaong etu sira paka ipu kojo rayanya, wali sira masipotanaka, sira manganto’o, “Gete, kesaa si’i? Yusa kojo anu to napotunde ntau si’i. Lo’a, bae kojo kuasaNya see naka pasiwa measa mampalaika seja Ia tempo Ia mamporentang sira!”

28Wali kareba mangkonong kuasa i Yesu etu majoli kojo natikareba-rebamo juku ri lipu ntau ri propinsi Galilea.

29Wali i Yesu masuwu muni yako ri banua to napampatunde nto Yahudi, panewa Ia yau sinjaya-njaya pei i Yakobus sira dua i Yohanes. Sira yau njo’u banua i nSimon sira dua i Andreas.

30Wali temanua i nSimon to we’a re’e seja ri banua etu pei ia jamo maturu-turu apa wojo. Wali tempo i Yesu masua, tau to nja’u raya banua etu, sira mansaka manganto’oka i Yesu, “Temanua i nSimon ia wojo si’i-si’i.”

31Wali i Yesu Ia yau resi tau we’a masaki etu. Ia mangkongko palenya panewa mangawangu ia. Wali tempo etu semo temanua i nSimon ia roo muni yako wojo, wali ia mampalinggona sira.

32Wali yako etu, ojo kawurinya rao, nasiromumo songonya tau ri kota etu ri tango banua i nSimon sira dua i Andreas. Tau boros etu mangkenika i Yesu samparia tau to masaki pasi tau to naposuak measa.

33(1:32)

34Wali i Yesu mampakatao muni boros tau to kono panyaki pangaya-ngaya. Pasi boros seja tau to naposuak measa, Ia mangarubak yau measa yako resi sira. Tempo Ia mangarubak measa etu, Ia taa mangabiaka measa etu magombo apa sira mangansanika Ia semo Ana i mPue Allah.

35Wali mosueo to bae i Yesu mambangu pei masuwu yako ri banua i nSimon. Ia yau njo’u tampa to tare tau mangkaroos. Rata nja’u ria Ia makai-kai.

36Yako etu mambangu seja i Simon pasi yununya pei yau mangaliwu i Yesu.

37Ojo parata nsira Ia, sira manganto’oka Ia, “Guru! Samparia tau mangaliwu komi.”

38Pei i Yesu manganto’o, to’oNya, “Anu kita yau mampakarebaka seja tuntu i mPue Allah ri kota-kota to ri awe ngkota Kapernaum si’i. Apa Aku ma’i si’a ojo mampakarebaka tuntu i mPue Allah ri kota to si’i. Aku ma’i mampakarebaka tuntu i mPue Allah ri kota-kota to yusa seja.”

39Wali yako Kapernaum i Yesu yau mangalinjak wo’u juku ri propinsi Galilea. Ri raya mpalinjaNya etu, ponto ri banua to napampatunde nto Yahudi to nakarata, Ia mampakarebaka tau tuntu i mPue Allah. Pasi Ia mangarubak yau seja boros measa yako resi tau to ri propinsi Galilea etu.

40Wali tempo etu seja re’e samba’a ngkai to masaki malobo, ia yau resi i Yesu. Tau etu mambokotu ri tango i Yesu manga’angga Ia, pei ia mamporapi darasawang, to’onya, “Ane nuporoe, Komi nukurang mampakatao muni aku.”

41Wali i Yesu mamporayang ia, see naka Ia mangantonjuka paleNya pei mampotaka ngkai etu, Ia manganto’o, “Kuporoe. Korom matao munim si’i-si’i.”

42Wali ngkai etu mansaka matao muni. Tamo re’e saki malobo resi ia.

43Wali ojo karoonya tau to masaki malobo rapakatao muni, i Yesu mamporentangika ia, to’oNya, “Intamo, pei ne’e kojo mangansaritaka sa’e palaong to nawali resi korom etu. Pei intamo njo’u to pampue pei to’oka ia mamparesa korom see ia damangkita korom roo muni masaki. Panewa kenika ia dua mba’a tonsi to darapampueka resi i Pue Allah singkonong ewa porenta i Musa. Ika ewa wetu see korom damayongo muni ri pangkita i mPue Allah. Pasi tempo tau boros mangkita korom mangika pampue etu, palaong etu damawali tondong resi sira korom tamo re’e panyaki to malao.” Etu semo porenta i Yesu resi ngkai etu.

44(1:43)

45Pei ngkai etu ia taa mampolaika gombo to nato’oka i Yesu ia etu. Ia mayoko pei ia mangampaleleka resi tau mangansaritaka tau ewa wimba palaong to nawali resi ia etu. Pasi samparia tau to nakarata ia mangansaritaka. Wali see naka yako etu i Yesu tamo maya masua ri kota ane re’e tau mangkita apa ane tau mangkita Ia, tare pandoonya tau mangampago Ia. Wali see naka Ia ojo maroo-roo re’e lipu to tare tau mangkaroos. Pei nempo ewa wetu, tiroo boros tau yako ri ponto-ponto lipu to yau mangampago Ia nja’u ria.


  Share Facebook  |  Share Twitter

Download Audio MP3 (Markus 1):
Mobile (Low Quality) - CD (High Quality)

 <<  Markus 1 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel