Dual PanelTo minaa dipapatui golongan
1Diona golonganna bati’na Harun. Iatu anakna Harun iamotu Nadab, Abihu, Eleazar na Itamar.
2Apa iatu Nadab sola Abihu mate dolo na ambe’na tang ma’dadian bati’, iamoto na iatu Eleazar sola Itamar untoe pentoean to minaa.
3Napapatuimi Daud sola Zadok – bati’na Eleazar – sia Ahimelekh – bati’na Itamar – tu golonganna tau iato mai tu diona pentoeanna.
4Naappa’mi tu bati’na Eleazar mandu buda tu pangulu golongan na iatu bati’na Itamar; iamoto nadipapatui pangulu golongan susite: sangpulo annan tu pangulu rapu tu bati’na Eleazar na karua tu pangulu rapu bati’na Itamar.
5Napapatuimi golonganna anna loterei, la golongan iate mai la golongan iato mai, belanna la dio mai bati’na Eleazar la dio mai bati’na Itamar, den tu umpangului inan maindan, iamotu pangulunNa Puang Matua.
6Iatu sanganna nasura’ Semaya, anakna Netaneel, pangulu to massura’, iamotu to Lewi, dio olona datu sia mintu’ pangulu, to minaa Zadok, Ahimelekh – anakna Abyatar – sia mintu’ pangulu rapunna mintu’ to minaa sia to Lewi; sipissannoi diala tu misa’ rapunna Eleazar, diala dukaoi misa’ tu Itamar.
7Iatu pa’loterei bunga’na ungkanna Yoyarib, ma’penduanna ungkanna Yedaya,
8ma’pentallunna ungkanna Harim, ma’penna’pa’na ungkanna Seorim,
9ma’pellimanna ungkanna Malkia, ma’pennannanna ungkanna Miyamin,
10ma’pempitunna ungkanna Hakos, ma’pengkaruanna ungkanna Abia,
11ma’pengkaseranna ungkanna Yesua, ma’pessangpulona ungkanna Sekhanya,
12ma’pessangpulo misanna ungkanna Elyasib, ma’pessangpulo duanna ungkanna Yakim,
13ma’pessangpulo tallunna ungkanna Hupa, ma’pessangpulo a’pa’na ungkanna Yesebeab,
14ma’pessangpulo limanna ungkanna Bilga, ma’pessangpulo annanna ungkanna Imer,
15ma’pessangpulo pitunna ungkanna Hezir, ma’pessangpulo karuanna ungkanna Hapizes,
16ma’pessangpulo kaseranna ungkanna Petahya, ma’penduangpulona ungkanna Yehezkel,
17ma’penduangpulona mmisa ungkanna Yakhin, ma’penduangpulona ndua ungkanna Gamul,
18ma’penduangpulona ntallu ungkanna Delaya, ma’penduangpulona nna’pa’ ungkanna Maazya.
19Iamote tu golonganna tau iato mai la untoe pentoeanna, anna tama banuanNa PUANG susi naatoranni Harun, ambe’na, unturu’i tu apa Napepasanan PUANG, Kapenombanna to Israel.
Rapunna to Lewi
20Iatu bati’ senga’na Lewi, den dukapa unnala bilanganna bati’na Amram, iamotu Subael, na iatu unnala bilanganna bati’na Subael, iamotu Yehdeya.
21Iatu diona Rehabya: iatu unnala bilanganna bati’na iamotu Yisia, tu pangulu;
22iatu Selomot naala bilanganna to Yizhar; na iatu unnala bilanganna bati’na Selomot iamotu Yahat.
23Iatu bati’na (Hebron iamotu) Yeria, (tu pangulu), Amarya tu ma’penduanna, Yahaziel tu ma’pentallunna, Yekameam, tu ma’penna’pa’na.
24Iatu bati’na Uziel iamotu Mikha, na dio mai bati’na Mikha iamotu Samir.
25Iatu siulu’na Mikha iamotu Yisia; dio mai bati’na Yisia iamotu Zakharia.
26Iatu anakna muane Merari iamotu Mahli na Musi; iatu anakna muane Yaazia, anakna muane Merari,
27iamotu bati’na Merari dio Yaazia, anakna muane, iamotu Syoham, Zakur na Hibri.
28Dio mai Mahli iamotu Eleazar; iatu Eleazar tae’ nama’dadian muane.
29Na iatu Kish ma’dadian muane iamotu Yerahmeel.
30Na iatu anakna muane Musi iamotu Mahli, Eder na Yerimot. Mintu’i te bati’na Lewi, ke dipasirundunanni rapunna.
31Ma’loterei duka tu tau iato mai, susi mintu’ siulu’na, iamotu bati’na Harun, dio olona datu Daud, Zadok, Ahimelekh na mintu’ pangulu rapunna mintu’ to minaa sia to Lewi; la pangulunna mintu’ rapu la adi bongsunna.