Dual PanelDiona Amazia, datu to Yehuda
1Iatonna taun ma’penduan kadatuanna Yoas, anakna Yoahas, datu Israel, dadimi datu tu Amazia, anakna Yoas, datu Yehuda.
2Duangpulomo llima taunna tonna dadi datu anna ma’parenta duangpulo ngkasera taunna dio Yerusalem. Iatu indo’na disanga Yoadan, dio mai Yerusalem.
3Napogau’mi tu apa malolo dio pentiroNa PUANG, apa tae’ nasusi penggauranna Daud, nene’ to dolona, sangadinna mintu’na tu penggauranna susi penggauranna Yoas, ambe’na.
4Ia mannamo tu inan madao tae’ nadiratoi; na iatu to buda tontong siapa mantunu sia memala’ dao inan madao iato.
5Iatonna manda’mo tu kadatuan lan limanna datu, napateimi tu mintu’ to mase’ponna, tu mangka umpatei datu, ambe’na.
6Apa iatu anakna tu to papatean, tae’ napatei, susitu disura’ lan sura’ Sukaran aluk tu natarima Musa, tu Namii PUANG mepasan, nakua: Tae’ nama’din dipatei tu mai ambe’ natumang anakna, sia tae’ duka nama’din dipatei tu mai anak natumang ambe’na, sangadinna pantan la dipatei natumang kasalanna kalena.
7Natalomi tu to Edom diong Lombok Ma’sin sangpulo sa’bu tau, sia natalo tu kota Sela tonna rarii, anna sangai Yokteel sae lako allo totemo.
8Attu iato nasuami Amazia tu ba’tu pira-pira pesua lako Yoas, anakna Yoahas, anakna Yehu, datu to Israel, nakua: Maikomi anta sipempangan sirari.
9Apa mesua tu Yoas, datu Israel, lako Amazia, datu Yehuda, nakua: Iatu a’da’ dao Libanon ussua pesua lako kayu arasi’ dao Libanon, kumua: Benni anakku muane tu anakmi baine napobainei. Apa lendu’ tu olo’-olo’ dao Libanon, anna silullu’i tu a’da’ iato.
10Tappu nasangmo mitalo tu to Edom, iamoto anna matampo penaammi. Kampai tu kamala’birammi sia torrokomi lan banuammi. Ma’apari ammi daka’ri tu kamandasan, miurunganni sanggang sola to Yehuda?
11Apa tae’ naperangii Amazia. Iamoto ke’de’mi tu Yoas, datu Israel, anna sipempangan sirari la ia la Amazia, datu Yehuda, dio Bet-Semes, lan lili’na Yehuda.
12Iatu to Yehuda natalomo to Israel, anna pada mallai sule lako to’ tendana.
13Iatu Yoas, datu Israel, untingkan Amazia, anakna Yoas, datu Yehuda, dio Bet-Semes. Tarru’mi tu Yoas lako Yerusalem, natuanni tu rinding tembo’ Yerusalem, randuk dio mai babangan Efraim sae lako babangan Tetuk, a’pa’ ratu’ sikunna.
14Naala nasangmi tu bulaan sia salaka sia mintu’ pareanan tu lan banuanNa PUANG sia lan pangnannan tongkonan layuk, sia ba’tu pira-pira to mangindo’i, namane sule lako Samaria.
15Iatu tang dipokadannapa tu mintu’ tuna’na Yoas sia mintu’ apa napogau’ sia penggauran lalongna sia umba nakua sirari Amazia, datu to Yehuda, tang tisura’moraka lan sura’ ossoranna mintu’ datu to Israel?
16Iatu Yoas malemo tama batu dilobang sola nene’ to dolona, anna dipeliang dio Samaria, sola mintu’ datu to Israel. Anna Yerobeam, anakna muane, ussondai dadi datu.
17Iatu Amazia, anakna Yoas, datu Yehuda tuopa sangpulo lima taunna tonna matemo tu Yoas, anakna Yoahas, datu Israel.
18Iatu tang dipokadannapa tu mintu’ tuna’na Amazia, tang tisura’moraka lan sura’ ossoranna mintu’ datu Yehuda?
19Sipakulu-kulumi tu tau unneai dio Yerusalem, anna mallai tu datu lako Lakhis, apa mesua tu tau iato mai unnula’i lako Lakhis, anna patei dio.
20Napalangnganmi tau darang, anna dipeliang dio Yerusalem dipasola nene’ to dolona lan kotana Daud.
21Iatonna sangpulo annanmo taunna tu Azarya, naangka’mi mintu’ to Yehuda dadi datu ussonda Amazia, ambe’na.
22Napamatoto’mi tu Elat, sia napasule lako Yehuda, tonna malemo tama batu dilobang tu datu Amazia, sola nene’ to dolona.
Diona Yerobeam ma’penduan, datu to Israel
23Iatonna taun ma’pessangpulo lima kadatuanna Amazia, anakna Yoas, datu to Yehuda, dadimi datu tu Yerobeam dio Samaria, anakna Yoas, datu to Israel; ma’parentami patangpulo mmisa taunna.
24Napogau’mi tu apa kadake dio pentiroNa PUANG, sia tae’ naboko’i tu mintu’ kasalan napa’pesuan Yerobeam, anakna Nebat, lako to Israel umpogau’i.
25Naalamo sule tu lili’na Israel, randuk dio mai batatta lako Hamat sae lako tasik dio Araba, susitu kadanNa PUANG, Kapenombanna to Israel, tu mangka Napokada nalopian taunna, nabi Yunus, anakna Amitai, to dio mai Gat-Hefer.
26Belanna natiro PUANG, kumua iatu kamandasanna to Israel mapai’ tongan sia tae’mo la mala’bi’na la to bitti’na sia moi misa’ tae’ tu to patunduanna to Israel.
27Apa tae’ duka Nama’kada PUANG, kumua la Naputtai tu sanganna to Israel lan nasambo langi’, iamoto Narampananni tu tau iato mai tete dio Yerobeam, anakna Yoas.
28Iatu tang dipokadannapa tu mintu’ tuna’na Yerobeam sia mintu’na apa napogau’ sia penggauran lalongna, sia umba nakua parari sia umba nakua umpasulei tu Damsyik sia Hamat, tu dolona napolili’ Yehuda, lako Israel, tang tisura’moraka lan sura’ ossoranna mintu’ datu to Israel?
29Iatu Yerobeam malemo tama batu dilobang sola nene’ to dolona, iamotu mintu’ datu to Israel, anna Zakharia, anakna muane, ussondai dadi datu.