Dual PanelTampak kadanna Daud
1Iamote tu tampak kadanna Daud: Pa’pangada’na Daud, anakna Isai, sia pa’pangada’na to dipalayang tanduk, tu Natokko Kapenombanna Yakub, tu dikaboro’i lan pa’pudianna to Israel.
2Iatu PenaanNa PUANG lan kaleku angku ma’kada-kada, iatu kadanNa nasa’bu’ tongka’ di lilaku.
3Ma’kada tu Kapenombanna to Israel, narampoina’ kadanNa Buntu batunna to Israel, Nakua: Misa’ to ma’parenta lako tolino sitoe kamalamburan, misa’ to ma’parenta ungkataku’ Puang Matua.
4Iamo la ten to arrang melambi’, ke berre’i allo, ke melambi’ tang saleburan: iamo ke attu mari’ uran, anna mellolo tu mai tananan diong mai padang.
5Apa tang susikan to sola bati’ku dio oloNa Puang Matua. Moi susito Natanananna’ misa’ basse matontongan, tu ma’rundunan nasang sia ditoe manda’. Belanna tang la Napabu’turika tu mintu’ kasalamarangku sia mintu’ kapaimanangku?
6Apa iatu mintu’ to bulituk, butung to duri dipemasapui; anna tang untoei tau;
7ianna la untoei tau, umpakepi bassi ba’tu pasoan doke, sia napadukkui api dio to’ inanna!
Penggauranna pa’baraninna Daud
8Iamote tu sanganna mintu’ pa’baraninna Daud: misa’ tau lu dio mai Ishbaal, tondokna to Hakhmoni, pangulunna mintu’ kamandang, disanga Adino, to Esni, unnea doke to karua ratu’na, napissanni napatei.
9Den pole’omi Eleazar, anakna Dodo, bati’na to Ahohi, iamo sangbilangan tu tallu pa’barani, iamo sisola Daud tonna ullo’bo to Filistin, tu sirampun dio la parari, na iatu to Israel sorong boko’mo.
10Ke’de’mi anna ba’tai tu to Filistin, naurungan mengkata’ka’mo tu limanna, sia iatu pala’ limanna la’ka’ bangmo dio pa’dangna. Napadenammi PUANG misa’ kapataloan kapua allo iato. Na iatu to buda sule pole’mo unturu’i, la mangrampa mannamo.
11Den pole’omi tu Sama, anakna Age, to Harari. Sirampunmi tu to Filistin dio Lehi. Denmi sanginan pa’lak dio situtu’ kadong barra’. Iatonna mallaimo tu surodadu naula’ to Filistin,
12bendanmi lan tangnga pa’lak iato, napangeai tu pa’lak iato, anna taloi tu to Filistin. Napadenmi PUANG misa’ kapataloan kapua.
13Denni tallui tu kamandang tallungpulo male umpellambi’i Daud rokko lo’ko’ Adulam tonna pegandungan; attu iato denmi sangkaponan surodadu to Filistin ma’tenda diong lombok Refaim.
14Attu iato iatu Daud lan tambakuku, na attu ia dukato iatu pa’kampan surodadu to Filistin dio Betlehem.
15Morai liumo tu Daud anna ma’kada nakua: Mindara ma’din umbanna’ uai dio mai bubun dio Betlehem, sikandappi’ babangan?
16Natamaimi pa’barani sola tallui tu inan surodadunna to Filistin, natimbami tu uai diong mai bubun dio Betlehem, sikandappi’ babangan, namale umbanni Daud. Apa tae’ namorai tu Daud unniru’i, sangadinna nabolloan dio oloNa PUANG.
17Anna ma’kada nakua: Napatoyangmira PUANG dio mai kaleku la umpogau’i tu susinna te! Tang uai iaraka te tu butung rarana to male untibe sunga’na? Tae’mi namorai unniru’i. Susimoto tu penggauranna tinde to lalong sola tallui.
18Iatu Abisai, siulu’na Yoab, anakna Zeruya, iamo pangulunna tu tau tallu. Na iamoto tu unnea doke tau talluratu’, napatei nasangi. Iamoto natarompo’ dio to tau tallu.
19Tae’raka na ia lendu’ kadipakarayanna dio tu to tallu? Manassa iamotu pangulunna. Apa tang nalambi’i tu to tallu disa’bu’ dolona.
20Sia iapa tu Benaya, anakna Yoyada, anakna misa’ pa’barani, tu tarompo’ penggauranna, dio mai Kabzeel; iamote tu umpatei da’dua pa’barani lalong dio mai Moab. Den duka sangallo tonna attunnamo ambun makko namengkalao rokko garuang, napatei tu misa’ singa diong.
21Sia umpatei duka misa’ to Mesir, misa’ tau makarra’ tampana; iatu to Mesir untoe doke, apa ia manna tu tekken napake ullaoi; nasintakki tu doke dio mai to Mesir, nadoke iato napateanni.
22Susimoto tu penggauranna Benaya, anakna Yoyada; tarompo’mi dio lu tu pa’barani sola tallui.
23Lendu’ ia kadipakarayanna dio to tau tallungpulo, apa tae’ nalambi’i tu to tallu disa’bu’ dolona. Naangka’mi Daud pangulunna mintu’ pa’kampana datu.
24Iatu Asael, siulu’na Yoab, sangbilanganni tu tau tallungpulo; na Elhanan, anakna Dodo dio mai Betlehem;
25na Sama to Harod; na Elika to Harod;
26na Heles to Palti; na Ira, anakna Ikesh, to Tekoa;
27na Abiezer to Anatot; na Mebunai to Husa;
28na Zalmon to Ahohi, na Maharai, to Netofa;
29na Heleb, anakna Baana, to Netofa; na Itai, anakna Ribai, dio mai Gibea to Benyamin;
30na Benaya to Piraton; na Hidai diong mai lombok Gaas;
31na Abialbon to Bet-Araba; na Azmawet to Bahurim;
32na Elyahba to Saalbon; na anakna Yasyen; na Yonatan;
33na Sama to Harari; na Ahiam, anakna Sarar to Harari;
34na Elifelet, anakna Ahasbai, anakna misa’ to Maakhati; na Eliam, anakna Ahitofel, to Gilo;
35na Hezrai to Karmel; na Paerai to Arbi;
36na Yigal, anakna Natan, dio mai Zoba; na Bani to Gad;
37na Zelek to Amon; na Naharai to Beerot, pa’takinna Yoab, anakna Zeruya.
38na Ira to Yetri; na Gareb to Yetri;
39na Uria to Het; mintu’i sola nasang tallungpulo mpitu.