Alkitab Mobile SABDA
[VER] : [TORAJA]     [PL]  [PB] 
 <<  2 Samuel 5 >> 

Daud undatui mintu’ to Israel

1Sae nasangmi tu mintu’ sukunna to Israel mennolo lako Daud dio Hebron, anna ma’kada nakua: Kami te sola nasang manassa sangrara sangbukuki’.

2Ondongpi masaimo, tonna datuipakan Saul, puang dukamo tu umpalutama-lulanni-mai tu to Israel, sia lu lako duka kalemi tu kadanNa PUANG: Iko la ungkambi’i tu taungKu Israel sia iko dukamo la dadi datunna mintu’ to Israel.

3Susi dukato tu mintu’ pekaamberan to Israel sae mennolo lako datu dio Hebron, anna sibasse datu Daud tu tau iato mai dio Hebron dio oloNa PUANG; mangkato natokkomi tu Daud dadi datunna to Israel.

4Iatu Daud tonna dadi datu tallungpulomo taunna, anna ma’parenta patangpulo taunna.

5Dio Hebron nanii pitungtaun annan bulanna undatui to Yehuda na dio Yerusalem tallungpulo ntallu taunna undatui mintu’ to Israel sia to Yehuda.

Daud untalo Yerusalem anna pa’tondokki

6Ke’de’mi tu datu sola mintu’ surodadunna lako Yerusalem, la urrarii to Yebus, tu torro lan tondok iato. Ma’kadami tu tau iato mai lako Daud nakua: Tae’ mima’din tama mai, mane to buta sia to kupi’ unnula’ikomi, battuananna: tae’ nama’din Daud tama mai.

7Apa natalo Daud tu tambakuku Sion, iamo tondokna Daud.

8Allo iato nakuami Daud: Minda-minda la untalo to Yebus, manassa male tama unnola pambo’bok sitarru’ diolai umbaa uai; apa iatu to kupi’ sia to buta, mandu nakagi’gi’ penaanna Daud. Iamoto nakuai tau: Iatu to buta sia to kupi’ tae’ nama’din tama.

9Torromi Daud lan kota ditambakuku iato, anna sangai tondok Daud; napalilingimi Daud rinding tembo’ randuk dio mai Milo ma’palutama.

10Samasai-sainna sakerangngan-rangngannami tu kamala’biranna Daud, belanna PUANG, Kapenombanna mintu’ ma’dandan maritik, urrondongi.

11Iatu Hiram, datu Tirus, ussua pesuanna lako Daud umbaa kayu arasi’ sia ba’tu pira-pira pande kayu sia to ma’pa’ batu, anna pabendanan Daud misa’ tongkonan layuk.

12Susito naissanni Daud, kumua Napamanda’mo PUANG undatui to Israel sia Napamala’bi’ tu kadatuanna belanna taunNa, iamotu to Israel.

13Iatonna saemo dio mai Hebron, naalaomi Daud tu ba’tu pira-pira gundi’ sia baine dio mai Yerusalem, napadadianomi Daud ba’tu pira-pira muane sia baine.

14Iamote tu sanganna mintu’ anak dipadadianni dio Yerusalem: Syamua, Sobab, Natan, Salomo.

15Yibhar, Elisua, Nefeg, Yafia,

16Elisama, Elyada sia Elifelet.

Daud untalo to Filistin

17Iatonna rangimi to Filistin tu kareba diona Daud ditokko undatui to Israel, ke’de’mi tu mintu’ to Filistin la undaka’ Daud; iatonna rangimi Daud tu diona to, malemi lako kota ditambakuku.

18Saemi tu to Filistin anna sikarangan dio rante Refaim.

19Mekutanami Daud lako PUANG, nakua: La sirarira’ka tu to Filistin? La Misorongraka tama limangku? Ma’kadami tu PUANG lako Daud, Nakua: Ke’de’moko, belanna manassa la Kusorong tu to Filistin tama limammu.

20Saemi Daud lako Baal-Perasim, nataloi tu tau iato mai inde to, anna ma’kada nakua: Naruang tangnga PUANG tu ualingku dio oloku susito uai ma’tu’ba’. Iamoto nasangai tau tu inan iato Baal-Perasim.

21Natampemi tau iato mai tu mintu’ rapang-rapang dipodeatanna, anna alai Daud sola mintu’ taunna.

22Undinnato sae pole’omi tu to Filistin, anna sikarangan diong rante Refaim.

23Napekutanammi Daud lako PUANG, anNa ma’kada tu Puang Nakua: Da mulaoi dio mai tingayo, tigirikko ammu tamai boko’i, muurunganni ullaoi dio mai to’ garonto’ baka.

24Iake murangii tu tengka dao lolok baka, la madongi’ko, belanna attu iato tassu’mo tu PUANG undoloangko la untaloi tu surodadu to Filistin.

25Napogau’mi Daud susitu pepasanNa PUANG lako kalena; natalomi tu mintu’ to Filistin randuk dio mai Geba ma’palulako Gezer.


  Share Facebook  |  Share Twitter

 <<  2 Samuel 5 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2018
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran