Dual Panel1Mandu melo ia tu bo’bo’ rangke sangraku’, ke naturu’i karapasan, na iatu banua nanii ponno pa’kandeanan, ke naturu’i kasigagan.
2Misa’ kaunan unnampui tangnga’ kinaa la umparenta misa’ pia muane ma’pakasiri’ sia la umpotaa mana’ dio lu mintu’ to massiulu’.
3Iatu pa’paredean dinii umpatama salaka sia po’poran dinii umpatama bulaan, apa PUANG ussudii tu mintu’ penaa.
4Iatu to umpogau’ kadake umpalan penaa puduk ma’pakena, sia iatu kakelokan untananni talinga lila ma’kasanggang.
5Minda-minda untelle to bongko, umpamatuna Totumampana; sia minda-minda umpoparannu kamandasanna to senga’ tae’ natilendok dio mai ukungan.
6Iatu lanto mimi’ napomakota nene’, sia iatu to padadian napomala’bi’ anak.
7Iatu kada mandalan tang sitondon to baga, ondong pissan, ke to kapua anna ma’kada buttok.
8Iatu pamengan sangtinti parimata maelo lako to umpoapai, la maupa’ umba-umba tu napatu.
9Minda-minda ussamboi kapatodotintingan, unnula’ pa’kaboro’; apa minda-minda untundan nenne’ kara-kara, umpasisala to massangmane.
10Pissanri disayu tu to unnampui tangnga’ kinaa natamamo penaanna, losong na iatu pessaratu’ peta’tan lako to baga.
11Minda-minda tu pabali-bali, kakadakean manna naparri-parri, apa la disua tu pesua tang unnissan kamamasean la ullaoi.
12Melo ia tu sitammu beruang birang sisayuran anakna, na iatu sitammu to baga lan kabaganna.
13Minda-minda umpakkanni kakadakean tu kameloan, manassa iatu kakadakean tae’ nala toyang dio mai banuanna.
14Iatu pamulanna kasigagan susito ke ullo’po’ki sapan uai; iamoto torei tu kasigagan, ke tae’ siapi namasarrang.
15Minda-minda ussanda tonganni to tang mekaaluk sia minda-minda umpasala sia unnukung to malambu’, tau iate sola dua Nakagalli PUANG.
16Apara gai’na tu pealli lan limanna to baga la naallian kakinaan, belanna inang tae’ naampui tangnga’ kinaa?
17Misa’ sangmane tontong bang ma’pakaboro’, sia iatu kasiuluran payan lan kapussakan.
18Minda-minda umpasisala’pa limanna mangallu’ sia unnindo’i indanna padanna tolino, tae’ naampui tangnga’ melo.
19Minda-minda umporai kasigagan, umporai kapatodo-tintingan; sia minda-minda umpamadao kadanna undaka’ kasanggangan.
20Minda-minda tu leko’ penaanna, tae’ nakabu’tui kamauparan, sia iatu lila ma’pakena tobang rokko kasanggangan.
21Minda-minda undadian to baga iamo napomaparri’, naambe’ to baga tang la parannu.
22Iatu kaparannuan lan penaa umpamadoi’ kamalekean, apa iatu penaa rosso umpamarangke buku.
23Iatu to tang mekaaluk untarima pamengan lan mai kandu’ la umputa’ lalan katonganan.
24Iatu to unnampui tangnga’ kinaa dio pentioran tu kakinaan, apa iatu mata to baga mettia’-tia’ bang sae lako randan langi’.
25Misa’ pia muane baga naposaki inaa ambe’na, sia napopa’di’ penaa to undadianni.
26Diposala ke undosaki’ to malambu’, ondong pissan tang sipatu ke umbambaki’ to la’bi’.
27Minda-minda unnampui tangnga’ kinaa umpasilolongan melo buangan kadanna, sia iatu to mandalan pa’inaanna ma’timbang melo.
28Moi anna to baga, ke rapa’ siai, disanga to kinaa, sia iake ma’pakappa bangi disanga to unnampui tangnga’ kinaa.