Dual Panel1Iake unno’ko’ko kumande sola misa’ pangulu, ia manna mutiro melo tu diona tingayomu.
2Sia pandanni piso tu barokomu, ke misa’ko to soko.
3Da mukaduangi tu kande mammi’na, belanna iamo kande mepakena.
4Da mubo’yo’i kalemu la morai sugi’, pamambelai tu pa’inaan iato.
5Iake mupenunui, simpolo pa’de, belanna ta’pa unggaragan kalena pani’, susito langkan maega mettia’ langngan langi’.
6Da mukandei tu kande to ma’mata pasisik, da mukaduangi tu kande mammi’na
7belanna susito ma’inaa lanna bang lu, susimoto tu a’ganna; kumandemoko sia mangiru’ko!, kadanna lako kalemu, apa iatu penaanna mambela dio mai kalemu.
8Iatu kande musuak, tu muamma’mo, la mulua sule, sia iatu kada masokanmu mupokada punala bang.
9Da muma’kada dio pa’peranginna to baga, belanna nasayu tu kada tonganmu.
10Da mupalelei tu katonan dolo sia da mulambanni tu pa’lakna pia biung.
11Belanna iatu Tomangla’bakna matoto’; sia la Napebalii tu kara-kara unneako.
12Papatui penaammu tu pa’pakilala sia patananni talingammu tu kada tongan.
13Da mupadapai tu peada’ lako pia muane; iake mubambai pebamba, tae’ nala mate.
14Moi ammu bambai pebamba, apa murampanan tu sunga’na dio mai lino tomate.
15E anakku muane, iake kinaai tu penaammu, manassa ia duka tu penaangku la parannu.
16Iatu mintu’ apa lan ba’tengku la sila’tekan, ke ussa’bu’i tonganna tu pudukmu.
17Da nakimburui penaammu tu to umpogau’ kasalan, sangadinna birisanko la tontong ungkataku’, PUANG,
18iake susito, manassa la sae tu attu melo, sia tae’ mula ka’tu rannu.
19Ma’perangiko, e anakku muane, ammu kinaa, patu’tunni tupenaammu lako lalan tongan.
20Da musikadamak tu to pangiru’ uai anggoro’ sia to pa’duku’.
21Belanna iatu to pangiru’ sia to pa’kande la kalala’ sia iatu to pa’tingkaru’dusan umpopake sare dodo.
22Perangii tu kadanna ambe’mu tu mangka undadiangko, sia da musayui tu indo’mu, ke matuami.
23Alli tu kamanapparan sia da mubaluk pole’i, sia kakinaan, pa’pakilala sia tangnga’ kinaa.
24Iatu ambe’na to malambu’ la parannu tongan, minda-minda undadian pia kinaa la naposende.
25Iamoto anna parannu penaanna tu ambe’mu sia indo’mu, sia anna sende tu to undadiangko.
26E anakku, sorongi tu penaammu lako kaleku, sia la naposende matammu tu diona lalanku.
27Belanna iatu baine bualang susito kalo’tok mandalan, sia baine passulo bongian susito patuang si’pi’.
28Ondongpi, mangodo’ susito pa’gora’ sia umpakerangngan to tang maruru’ dio lu torro tolino.
29Mindara tu nanii pa’dikka’? mindara tu nanii pekaindo’? mindara tu nanii kasigagan? mindara tu nanii kasumarroan? mindara tu nanii bangke punala bang? mindara tu nanii mata maru’gun?
30Dio lu to masai bongi bangmo unno’ko’ mangiru’ uai anggoro’, iamotu to sae ullae’ uai anggoro’ dipasito’bo’.
31Da mutiroi tu uai anggoro’, ke mararang tonganni, sia iake pamburorongi lan irusan, tarru’ liu bang diamma’.
32Katampakanna ma’totok susito ula’, sia umpessumpiran ipona ten to ula’ rame.
33Iake susito, iatu matammu untiro ma’rupa-rupa apa memangngan, sia tang ma’runduanan tu penaammu muma’damolang.
34Sia la susiko to mamma’ lan atena tasik, sia sangtintiko to matindo dao tampak lentong kappala’.
35Nabambana’ tau, apa tae’ kusa’ding mapa’di’, nabobo’na, apa tae’ kusa’dinganni; pirampira kula pandiu? Manassa la kudaka’ pole’pa.