Alkitab Mobile SABDA
[VER] : [TORAJA]     [PL]  [PB] 
 <<  Ayub 30 >> 

Siumpu’na kada ma’katampakanna Ayub, iamotu kamandasanna totemo

1Apa totemo napetaaina’, minda tu mangura na aku, na iatu ambe’na kusanga tang sipatu kusua male sola tu asu ullaai tuntunan domba sia bembe’ku.

2Moi kuporai, apara gai’na lako kaleku tu kamawatangan limanna? Iatu sumanga’na sia kamatotoranna tau iato moro’mo,

3iamotu to tang pa’bela napobua’ kapu’duran sia katangdiaran, namale ungkeke’i tu apa dao lu padang rangke, sia kayu anakna padang aak sia padang pangallaran;

4naala tu sorang mapi’da dio mai garonto’na sia uaka’ roten napokande.

5Diali’ tu tau iato dio mai pa’tondokan, napetamban tau susito unnula’ to boko.

6Diparuku umpa’tondokki lombok megiangan, sia pamombong sia lo’ko’ batu;

7unnorron dio lu to’ kayu anak, sisi’pin bang diong to’ lelating,

8baga, ondongpi to tang dibilang, tu dilolai lan mai tondok.

9Apa totemo butungna’ naposinggiran bang sia aku tu napoulelean tang kebattuan.

10Nakagi’gi’na’ tau iato sia untoyangan kalena dio mai kaleku, sia tang masiri’ untittudui tu lindoku;

11belanna Puang umbukai tu ulang tendaku sia ullullu’ lu rokkona’ sia iatu tau iato mai napalulako kaleku tu gau’na susi to urrampanan sanga’.

12Dio kanan nanii bendan ma’misa tu to bulituk, nasuale tu lentekku sia natungangngaranna’ tu lalan kamandasanna;

13natuan-tuan tu mai lalanku, sia napakerangngan tu kasangganganku, tu ia kalena tae’ to patunduanna.

14Matira’ rampo susi to untarru’ tembo’ panglo’po’ kapua, dio lu alla’na tembo’ rondon nanii sae situru’-turu’.

15Iatu apa ma’patiramban nabolloina’; iatu kamala’birangku pa’de disapui susito angin; sia iatu kamauparangku tileak susito salebu’.

16Apa totemo bonnong tu penaangku lan ba’tengku, sia allo kamandasan urrampoina’.

17Iake bongi susito dilo’po’ tu bukungku, sia tangtorena’ nakeke’ tu kamapa’diran.

18Iatu kuli’ku lono-lono napobua’ kuasa masa’ga’, mendoke’ dio lu kaleku susito tamangkale lanku lu.

19Napembuanganna’ Puang rokko to’ losso’, angku susi barra’-barra’ sia au.

20Metambana’ lako Kalemi umpalaku pa’tunduan, apa tae’ Mipebaliina’; bendanna’ dio, apa tae’ Mipalanna’ penaa.

21Membali to tang mamasemo-Komi lako kaleku, Mieana’ lima ma-watangMi;

22Mipalanna’ angin anna male umpettiaranna’, sia Mipasabu’ina’ angin bara’.

23Ondongpi kuissan, kumua Puang ussolanna’ lako kamatean, lako to’ inan kasirampunanna mintu’ apa kepenaa.

24Tonganna, tae’raka nala umpendondongan limanna tu tau lako to tobang, ke tae’i tu pa’tunduanna lan kamandasanna?

25Tang mangkamora’ka untangi’i to narampoi allo kamaparrisan? Tae’raka kupomasussai tu diona to kalala’?

26Kupeagi bang tu kameloan, apa kakadakeanora rampo; untayanna’ masiang, apa malillin sae.

27Iatu ara’ku lan susito uai re’de sia tae’ narapa’ len, iatu allo kamandasan narampoimo’.

28Mario-riona’ lan kalingkangku, tu tang naarrang allo, bendanna’ lan kombongan metamba umpalaku pa’tunduan.

29Naposiulu’na’ serigala, sia naposolana’ burung unta.

30Malotong tu kuli’ku sia tilalek dio mai kaleku, dukku tu bukungku napobua’ kamalassuan kale;

31iatu oni katapingku mendadi batingmo, iatu oni sulingku mendadi katumangiran mapai’.


  Share Facebook  |  Share Twitter

 <<  Ayub 30 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel