Alkitab Mobile SABDA
[VER] : [TORAJA]     [PL]  [PB] 
 <<  Kejadian 29 >> 

Yakub lan banuanna Laban

1Ke’de’mi tu Yakub inde to dio mai, ma’palulako padang to rampe matallo.

2Natiromo den misa’ bubun dio padang iato; naden tallung tuntunan bembe’ sola domba tisambo’ dio sa’dena, belanna dio bubun iato tu nanii tau umpairu’i tu mintu’ bembe’ sola domba; den misa’ batu kapua dao baba bubun iato.

3Naramba nasangmi tau lako tu mintu’ bembe’ sola domba ma’baanan anna lolinni tu batu dao mai baba bubun, napairu’i tu mintu’ bembe’ sola domba, mangkato napasulemi langngan baba bubun tu batu lako inanna.

4Nakuami tu Yakub lako: E mintu’ siulu’, lu umbarokomi nii te? Mebalimi nakua: Lu diokan mai Haran.

5Nakuami lako tau iato mai: Mitandairaka tu Laban, ampona Nahor? Mebalimi tu tau iato nakua: Kitandai.

6Nakuami lako: Malaga’-laga’ siaraka? Mebalimi tu tau iato mai nakua: Malaga’-laga’ sia; tiromi, iamo Rahel to dio, anakna baine, sae ussolan bembe’na sia dombana.

7Ma’kadami tu Yakub nakua: Tiroi, kulla’pa tu allo, tae’pa naattunna la dipebala tu patuoan; pairu’mi tu bembe’ sola domba ammi pakandei sule!

8Mebalimi tu tau iato mai nakua: Tae’ nama’din, ke tae’pi anna ma’misa nasang tu bembe’ sola domba, nalolinni tau tu batu dao mai baba bubun, kimane umpairu’ nasangi tu domba sola bembe’.

9Marassanpa sipa’kada-kada tau iato mai, saemi tu Rahel urramba bembe’na sia dombana ambe’na, belanna to manglaa duka ia.

10Iatonna tiroi Yakub tu Rahel, anakna Laban, anak muanena indo’na, sia iatu bembe’na sia dombana Laban, anak muanena indo’na, saemi tu Yakub urreke’i anna lolinni tu batu dao mai baba bubun, napairu’i tu bembe’na sia dombana Laban, anak muanena indo’na.

11Sia naudung Yakub tu Rahel, anna ma’urrukan tumangi’.

12Belanna napokada Yakub lako Rahel kumua sangdadianna ambe’na, iamo anakna Ribka, ma’dondo-dondomi tu Rahel male umpokadanni ambe’na.

13Iatonna rangii Laban, kumua sae tu Yakub, anakna anak daranna, ma’dondo-dondomi umpessitammui, anna raka’i sia naudung nasolanni tama banuanna. Naulelean nasangmi Yakub lako Laban mintu’ apa dadi lako kalena.

14Nakuami tu Laban lako: Manassa ikomo tu sangrara sangbukungku! Torromi tu Yakub sola, ganna’ bang sangbulan.

15Mangkato nakuami tu Laban lako Yakub: Belanna sangdadiangkuko, la sipaturokoka mengkarang punala bang dio kaleku? Pokadanna’ umbara nakua tu saromu?

16Iatu Laban den da’dua baine tu anakna, iatu kakanna disanga Lea, na iatu adinna disanga Rahel.

17Iatu Lea ma’mata mallun, apa iatu Rahel makari’dik tu kalena sia melo tu pantarisanna.

18Iatu Yakub Rahel tu nakasinnai, iamoto anna kuai: Da’ito angku mengkarang bangmo lako kalemi pitung taun diona Rahel, anakmi, tu bongsunna.

19Ma’kadami tu Laban nakua: La’bi’ ke iko kuben, ke la tau senga’mora la kuben; tatorromo sola.

20Mengkarangmi tu Yakub pitung taun tu belanna Rahel, na iato pitung taun sangattu’ bangri nasa’ding, belanna kamasinnanna lako Rahel.

21Ma’kadami tu Yakub lako Laban kumua: Benmo’ tu baineku, angku sangampa’ belanna ganna’mo tu attungku.

22Narampunmi Laban tu mintu’ to ma’tondok, anna pogau’ pa’maruasan.

23Iato bongi iato, nasolammi Laban tu Lea, anakna, lako Yakub anna sangampa’ Yakub.

24Iatu Lea naben Laban misa’ baine sabua’na disanga Zilpa la napopa’dua’.

25Iatonna melambi’ dio mai, natiromi, Lea ia; iamoto anna ma’kada tu Yakub lako Laban nakua: Ma’apai ammi pasusina’ to? Tang dionaraka Rahel angku mengkarang dio kalemi? Ma’apai ammi pakenana’?

26Mebali tu Laban nakua: Tae’ ia biasanna lan te tondokki tu la umpa’benganni dolo tu adinna, ke tae’pi tu kakanna.

27Paganna’i pitung allo lako te anakku, angku ben dukako tu pia iato belanna pengkarangan la mukarang polepa dio kaleku pitung taun.

28Napogau’mi Yakub susito, napaganna’i pitung allo lako baine iato, namane umbenni Laban lako tu Rahel, anakna la napobaine.

29Iatu Rahel naben Laban misa’ baine sabua’na, disanga Bilha la napopa’dua’.

30Sipatonangan polemi kurin Yakub tu Rahel sia mandu napakaboro’ na iatu Lea. Mengkarangmi tu Yakub lako Laban pitung taun polepa.

Diona anakna Yakub

31Iatonna tiroi PUANG kumua iatu Lea naerean penaa, Nabungka’mi tu inan taunna, apa iatu Rahel tamanang.

32Ma’tambukmi tu Lea, anna dadian misa’ pia muane, nasangai Ruben nakua: Natiro PUANG tu kamasussangku, iamoto totemo la napakaboro’na’ muaneku.

33Ma’tambuk poleomi, anna dadian misa’ pia muane, nakuami: Belanna Narangi PUANG kumua diereanna’ penaa, Nakamasei poleomo’ te totemo. Nasangaimi Simeon tu pia iato.

34Ma’tambuk poleomi, anna dadian misa’ pia muane, nakuami: Totemo, pissanna te, la la’ka’mo tu muaneku lako kaleku, belanna tallumo tu muane kupadadianni. Iamoto anna sangai Lewi tu pia iato.

35Ma’tambuk poleomi, anna dadian misa’ pia muane, na ma’kada nakua: Pissanna te la umpudina’ PUANG. Iamoto anna sangai Yehuda tu pia iato. Radanmi ma’dadian tau.


  Share Facebook  |  Share Twitter

 <<  Kejadian 29 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2018
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran