Dual Panel1Aku tu misa’ bunga rosi dio mai Saron, sia danga-danga diong mai lombok.
2– Susito danga-danga lan lu alla’ a’da’ susi dukamoto tu rindungku dio lu mintu’na anak dara.
3– Susi garonto’ lemo datu dio lu mintu’ garonto’ kayu pangala’, susi dukamoto tu andi’ pa’kaboro’ku dio lu mintu’na pia muane. Iatu unno’ko’ lan pentiongananna iamo pa’poraiangku, sia matanning tu buanna lan lingaroku.
4Nasolanna’ lako bilik nanii mangiru’ uai anggoro’, anna iatu mali’na butung bate-bate lako kaleku.
5Tangka’na’ deppa bua anggoro’, papayana’ bua lemo datu, belanna ma’ipuna’ napobua’ kamamaliran.
6Lima kairinna ussare ulungku na lima kananna urraka’na’.
7Umpalaona’ sumpa ussa’bu’ sanganna kijang sia donga birang dio lu padang unnada’ikomi, e mintu’ anak dara Yerusalem, kumua da mipopengkilalai sia da mitundanni tu kamamaliran ke tae’pi nasae kamoraianna.
Pa’tendeng umpabu’tu kamamaliranna baine ma’tumaian
8Perangiimi tu oni tengkana andi’ pa’kaboro’ku! Tiromi anna sae, mekkondong-kondong dao buntu sia mellatta’-latta’ dao tanete.
9Iatu andi’ pa’kaboro’ku susito kijang ba’tu anak donga. Tiromi, bendanmo dio boko’ rinding tembo’ mentiro tama pentiroan sia ma’penunu tama to’ tarali.
10Ma’kadami tu andi’ pa’kaboro’ku lako kaleku, nakua: Ke’de’ko, e rindungku, e simbolong manikku, ammu male mai!
11Belanna manassa lendu’mo tu attu kamadinginan, upu’mo sia tae’mo napalauran.
12Mintu’ bunga-bunga kaananmo dio lu padang, nalambi’mo tu attu kasumengo-mengoan, sia dirangimo lan tondokta tu bu’ku’ ma’sepukku.
13Iatu ara sitasakammo bua dolona, sia iatu anggoro’ menta’bimo, busarungngu’ baunna. Ke’de’ko ammu male mai, e rindungku, e simbolong manikku, ammu male mai!
14E dangan-danganku lan lu kasapak buntu batu, membuni lan lu pentirerungan dio lu se’pon buntu batu, melo, ke kutiroi tu kanna pati’mu, melo, ke kuperangii tu gamarammu, belanna la’te lambunna tu gamarammu, sia maballo tu pati’mu.
15Tingkanangkanni tu mintu’ sindallung, tu mintu’ sindallung bitti’, tu ussanggang pa’lak anggoro’, belanna iatu anggoro’ki tarri’ ta’binna.
16Iatu andi’ pa’kaboro’ku aku puangna na iatu aku ia puangna, tu mangkambi’ lan lu to’ danga-danga,
17sae lako mangiri’na angin makaroen sia pa’dena mintu’ ongan-ongan. Ma’palumaikomi, sia malinta’komi susi kijang, e andi’ pa’kaboro’ku, ba’tu susi anak donga dao lu buntu batu ma’kasapak.