Dual PanelSiumpu’na Pa’pudian
1O PUANG, apara bannangna amMi toyangra bendan, sia apara bannangna amMi membunira tonna attu kapussakan?
2Tu belanna kamatampoanna to tang mekaaluk anna pandasai tu to makario-rio, melo ke didammakki tu tau iato mai lan pakira-kiranna tu napana’ta’.
3Belanna iatu to tang mekaaluk ussattuan kalena unturu’ lalan penaanna, sia iatu to mesaro bu’tu kadake untendeng kalena sia umpa’kada solangi PUANG.
4Nakua tu to tang mekaaluk naturu’ a’gan matampona, kumua: Tae’ ia Namepapakkanni tu Puang; belanna iatu mai passanganna nakua: Tae’ ia Kapenomban.
5Mintu’ lalanna tontong bang maupa’, iatu pa’paolaimMi salu tang nalambi’ tangnga’na langngan, sia mintu’ balinna natuai.
6Ma’kadami lan penaanna, nakua: Tae’ angku la tibendon len, sia tae’ anna rua lenna’ kasanggangan lako osso’ sipapa’ku.
7Iatu sadangna ponno tampak ropu sia lando pa’du sia pa’pakario-rio, sia dio tampak lilana den kakelokan sia kakadakean.
8Ma’pakappa dio to’ pangaungan dio lu randan tondok, dio to’ kabunianna nanii umpatei to tang sala. Sia matanna ussinding to makario-rio.
9Mangaung dio to’ kabunianna butung to singa lan to’ kakayuanna; sia mangaung la undammak to dipandasa. Nadammakmi tu to dipandasa, nariu’i tama bundena.
10Kumuku umbukku kalena anna tobang tama kanuku matoto’na tu to mase-mase.
11Ma’kadami lan penaanna nakua: Tang Nakilalaimo Puang Matua, Nabuni tu lindoNa, tarru’ tae’mo Natiroi.
12Ke’de’Komi, PUANG! O Puang Matua, angka’i tu limamMi, da Mitananni boko’ tu to dipandasa.
13Matumbai anna tontong bang tu to tang mekaaluk umbelle’ Puang Matua, sia nakua lan penaanna: Tae’ amMi la mepapakkanni?
14Manassa Mitiro tu iannato, belanna Mitiro tu kamaparrisan sia Karossoinaan. La Mipapakkanni lan lisu pala’Mi, lako duka Kalemi nanii umpasande’ kalena tu to mase-mase; belanna inang Kamu tu patunduanna pia biung.
15Rebongi tu takia’na to tang mekaaluk sia to kadake; papakkanni tu katangmekaalukanna satae’na Miappa’i.
16PUANGmo tu Datu tontong sae lakona. Mintu’ bangsa maipi’mo lan mai padangNa.
17O PUANG, Miperangiimo tu pa’poraianna to umpamadiongan penaanna; Kamu umpabatta’i tu penaanna sia Kamu untananni talinga,
18la umpasalunna pia biung sia to dipakario-rio, kumua iatu tolino untorroi kuli’na padang da anna ma’patiramban pole.