Dual PanelYeremia unnalli misa’ pa’lak
1Inde sia tu kada sae dio mai PUANG lako Yeremia tonna taun ma’pessangpulona kadatuanna Zedekia, datu Yehuda; iamotu taun ma’pessangpulo karuanna kadatuanna Nebukadnezar.
2Attu iato iatu surodadunna datu Babel umpatama limbu Yerusalem na iatu nabi Yeremia dipattang lan tarampak pa’kampan, tu sikande tongkonan layukna datu.
3Indeto dio nanii Zedekia, datu Yehuda umpattangi, nakua: Ma’apai ammi ma’nubua’ kumua: Nakua kadanNa PUANG: Tonganna la Kusorong te kota iate tama limanna datu Babel, tu la untaloi.
4Sia iatu Zedekia, datu Yehuda tae’ nala tilendok dio mai limanna to Kasdim, sangadinna inang la disorong tama limanna datu Babel sia la sipuduk sipa’kada sia la sitiro lindo.
5Nabaami lako Babel tu Zedekia, anna torro dio sae lako Kuto’longinna, kadanNa PUANG, belanna moi sirarikomi tu to Kasdim, tae’ duka mila patalo.
6Nakuami Yeremia: Saemo tu kadanNa PUANG lako kaleku, nakua:
7Iatu Hanameel, anakna Salum, pa’amberammu la sae ussitammuangko anna ma’kada nakua: Allii tu pa’lakku tu dio Anatot, belanna iatu kuasa pangla’bak dio kalemu la unnallii.
8Saemi tu Hanameel, anakna pa’amberangku, susitu kadanNa PUANG, ussitammuanna’ tama tarampak pa’kampan anna ma’kada lako kaleku nakua: Allii tu pa’lakku dio Anatot dio tana Benyamin, belanna den kuasa mana’ dio kalemu sia den duka kuasa pangla’bak dio kalemu, iko unallii. Attu iato kuissanmo kumua iate kada iate kadanNa PUANG.
9Iamoto angku allii tu pa’lak dio Anatot dio mai Hanameel, anakna pa’amberangku, angku timbanganni lako tu allinna, sangpulo pitu sikele’ salaka.
10Kusura’mi lan misa’ sura’ kasiallian, anna dica’ daona lu sia kualampa sa’bi la ussa’bii, angku timbangi tu sikele’ iato.
11Kualami tu sura’ pangalli tu mangka dica’ situru’ ada’ sia atoran, sia misa’pa sura’ tibungka’.
12Sia iatu sura’ iato kuben Barukh, anakna Neria, anakna Mahseya dio tingayona Hanameel, anakna pa’amberangku sia to sa’bi, tu mangka untekenni tu sura’ kasiallian iato sia mintu’ to Yehuda tu lan lu ba’ba pa’kampan.
13Dio tingayona mintu’ tau iato mai kupasanmi tu Barukh, kukua:
14Nakua kadanNa PUANGna mintu’ ma’dandan maritik, Kapenombanna to Israel: Alai tu sura’ kasiallian iate, la iatu dica’na la iatu tibungka’na, patamai busso litak, kumua anna masai dinanna melo.
15Belanna, nakua kadanNa PUANGna mintu’ ma’dandan maritik, Kapenombanna to Israel: Iatu banua sia pa’lak sia pa’lak anggoro’ la dialli pole’omo lan tondok iate.
16Iatongku mangkamo umbenni Barukh, anakna Neria, tu sura’ kasiallian, massambayangmo’ lako PUANG, kukua:
17O Puangta PUANG, tonganna Kamumo umpadii tu langi’ sola lino tete dio kamatotoran kalle-kalleamMi sia tete dio takia’ tie’te’Mi; moi misa’ tae’ tu tang dadi dio Kalemi.
18Sia Kamu umpa’pekitanan kamasokanan lako massa’bu-sa’bu tau sia tu umpapakkanni kakadakeanna mintu’ ambe’ rokko rianna mintu’ anakna undinna dio mai tau iato mai, o Kapenomban pasareongan sia matoto’, tu diganti sanganNa: PUANGna mintu’ ma’dandan maritik.
19Tarompo’ tu pa’pana’ta’Mi sia kalle-kallean tu penggauramMi, sia natiro matamMi tu lalanna mintu’ ma’rupa tau la umpapakkanni simisa’-misa’i sitinaya kedona sia sitinaya bunga rangka’na.
20Sia Kamu umpogau’ ba’tu pira-pira tanda kalle-kallean sia tanda mangnga dio tondok Mesir sae lako allo iate la dio lu to Israel la dio lu bangsa senga’, sia umpadenangKomi misa’ sanga, susitu payan allo iate.
21Sia Kamumo tu ussolan taumMi, to Israel, tassu’ lan mai tondok Mesir tete dio ba’tu pira-pira tanda kalle-kallean sia tanda mangnga sia tete dio lima matoto’ sia takia’ tie’te’ sia tete dio apa mandu metakuran.
22Sia Kamumo tu ungkamaseanni lako te padang iate, tu Minii umpalao sumpa unnallu’i lako nene’ to dolona la ungkamaseanni, iamotu misa’ padang sebo pangandu’ sia tani’ enoan.
23Apa iatonna tamamo tu tau iato mai sia untarimai la napomana’, tae’ naperangii tu gamaramMi sia tae’ naturu’i tu Sukaran alukMi; moi misa’ tu mintu’ pepasanMi lako kalena tae’ napogau’i; iamoto Miparampoi kamandasan tu tau iato mai.
24Iatu mintu’ pambo’bok digaragaimo rampo lako biring kota la untaloi, anna disorong tama limanna to Kasdim tu kota iato, tu urrarii, tete dio kandean pa’dang sia karorian sia ra’ba biang; na iatu mintu’ apa Mipokada dadimo sia manassa Mitiromo.
25Moi susito ma’kada dukaKomi lako kaleku, o Puangta PUANG, kumua allianni kalemu pa’lak iato, mubenni allinna, sia alanni sa’bi la ussa’bii, – anna iate kota iate disorongmo tama limanna to Kasdim!
26Attu iato saemi kadanNa PUANG lako Yeremia, Nakua:
27Tonganna Akumo, PUANG, Kapenombanna angge kepenaa; umbani apa nala den apa tang dadi dio Kaleku?
28Iamoto nakua kadanNa PUANG: Tonganna la Kusorong te kota iate tama limanna to Kasdim sia tama limanna Nebukadnezar, datu Babel, tu la untaloi.
29Iatu mintu’ to Kasdim, tu urrarii te kota iate la male tama anna padukkui api sia naballa sola tu mai banua, tu dao bubunganna nanii tau iato mai untunu pemala’ lako Baal sia umpemalaran pemala’ pantedok lako Kapenomban senga’, tu napobannang tau iato mai umpa’dikki penaangKu.
30Belanna randuk dio mai manguranna iatu to Israel sia to Yehuda apa kadake manna tu napogau’ dio pentiroKu, ondongpi tu to Israel tontong bang umpa’dikki penaangKu tete dio penggauran limanna, kadanNa PUANG.
31Belanna randuk dio mai allo dibangunna tu kota iate sae lako allo iate napare’dek tu ara’Ku sia kamagi’girangKu Kuurunganni la ussabu’i tu kota iate dio mai oloKu,
32napobua’ mintu’ kakadakeanna to Israel, sia to Yehuda tu mangka napogau’ sia tu umpa’dikki penaangKu, la tau iato mai, la mintu’ datunna sia mintu’ arungna sia mintu’ to minaanna sia mintu’ nabinna sia mintu’ to Yehuda sia mintu’ to lan Yerusalem.
33Iatu tau iato mai untananniNa’ boko’, tangia lindona; moi Kuada’i ke makale’ sia kekaroen, tae’ naperangii sia tae’ duka namorai untarima peada’.
34Sangadinna napalan banua, dinii ussa’bu’ sangangKu tu kamagallianna la urruttakki.
35Sia mangkamo napabendan tu inan madaona Baal, tu diong lombok Ben-Hinom, la nanii umpemalaran anakna muane sia anakna baine lako Molokh, iamotu apa inang tae’ len Kupepasananni sia inang tae’ len bu’tu lan penaangKu, kumua la napogau’ tau iato mai tu apa megallian iate sia la nanaran tu to Yehuda umpogau’ kasalan.
36Apa totemo kadanNa PUANG, Kapenombanna to Israel, tu diona kota iate tu mipokada kumua: mangkamo disorong tama limanna datu Babel tete dio kandean pa’dang sia karorian sia ra’ba biang.
37Manassa la Kupulung tu tau iato mai lan mai mintu’ tondok, tu Kunii urrambai male tete dio kasengkeangKu sia kare’dekangKu sia kamagi’giran kapuaKu, sia Aku la umpasulei lako inan iate sia la umpatorro marampa’i.
38Iatu tau iato mai la dadi taungKu na Aku dadi Kapenombanna.
39Sia la Kuben kasangpenaan sia misa’ lalan, naurungan umpengkaolaiNa’ lan mintu’ allo, tu la napomelona sia la napomelona anakna tau iato mai.
40Sia la untananNa’ basse matontongan sola tau iato mai, kumua tae’ Kula toyang dio mai kalena umpogauranni melo sia la Kupalan penaanna tu kamengkaolan lako Kaleku, kumua damo natoyang tu tau iato dio mai Kaleku.
41Sia la parannuNa’ diona tau iato mai sia la umpogau’Na’ melona lako sia la Kupatorro tontong lan tondok iate situang kaponnoan penaangKu sia deatangKu.
42Belanna nakua kadanNa PUANG: Susitu kamandasan kapua mangka Kuparampoan bangsa iate, susi dukamoto tu mintu’ kameloan la Kuparampoanni, tu Kuallu’ lako tau iato mai.
43Sia denpa tau la unnalli pa’lak lan tondok iate, tu mipokada a’ganna, kumua padang talo ia, naurungan moi misa’ tau ba’tu misa’ patuoan tae’mo lan, tonna disorongmo tama limanna to Kasdim.
44Iatu pa’lak la naalli tau doi’ sia unggaraga sura’ kasiallian, anna ca’i sia naalan sa’bi la ussa’bii dio tana Benyamin sia lili’na Yerusalem sia lan mintu’ kota Yehuda, sia lan mintu’ tondok dao Ma’buntunna sia lan mintu’ tondok dio Padang Merrantena sia lan mintu’ tondok lo’ Pollo’na uai; belanna la Kupopembali tu toto’na tau iato mai, kadanNa PUANG.