Dual PanelKota dipamanassan to Lewi
1Saemi tu pangulu rapu to Lewi umpennoloi to minaa Eleazar sia Yosua, anakna muane Nun, sia pangulu rapu suku to Israel,
2anna ma’kada lako tau iato mai dio Silo dio tondok Kanaan, nakua: Mangkamo mepasan tu PUANG nalopian Musa la umbenkan kota la kinii ma’tondok sia padang kariuan tu untikui la nanii sapingki sia dombaki sia bembe’ki.
3Napa’benganmi to Israel unturu’ parentaNa PUANG dio mai taa mana’na te mai kota sola padang kariuanna lako to Lewi.
4Napamanassami loterei tu pa’rapuanna to Kehat. Iatu bati’na to minaa Harun, dio lu to Lewi unnappa’ sangpulo tallu kota tonna diloterei, iamotu dio mai pa’rapuanna suku Yehuda sia dio mai suku Simeon sia dio mai suku Benyamin.
5Iatu to Kehat torronapa, unnappa’ sangpulo kota tonna diloterei, dio mai pa’rapuanna suku Efraim sia dio mai suku Dan sia dio mai sesena suku Manasye.
6Iatu to Gerson unnappa’ sangpulo tallu kota tonna diloterei, dio mai pa’rapuan suku Isakhar sia dio mai suku Asyer sia dio mai suku Naftali sia dio mai sesena suku Manasye dio Basan.
7Iatu to Merari unnappa’ sangpulo dua kota tonna diloterei unturu’ pa’rapuanna, dio mai suku Ruben sia dio mai suku Gad sia dio mai suku Zebulon.
8Iate mai kota sola padang kariuanna napa’bengan to Israel lako Lewi tonna diloterei susitu mangka Napasan PUANG nalopian Musa.
9Napa’benganmi dio mai suku to Yehuda sia dio mai suku to Simeon te kota iate, tu nasa’bu’ tau:
10lako to Harun, dio mai pa’rapuanna to Kehat sangbilangan to Lewi, belanna napamanassa bunga’ pa’loterei,
11iamoto napa’benganmi tu Kiryat-Arba, – Arba iate iamo ambe’na Enak –, iamotu Hebron, dao buntunna Yehuda, sia padang kariuan tiku lao.
12Apa iatu pa’pa’lakanna kota iato sia iato mai kampongna mangkamo napa’bengan lako Kaleb, anakna muane Yefune, anna pomana’i.
13Susito napa’benganmi tau iato mai lako bati’na to minaa Harun tu Hebron, kota pentilindunganna to papatean sola padang kariuanna sia Libna sola padang kariuanna,
14Yatir sola padang kariuanna, Estemoa sola padang kariuanna,
15Holon sola padang kariuanna, Debir sola padang kariuanna,
16Ain sola padang kariuanna, Yuta sola padang kariuanna, na Bet-Semes sola padang kariuanna: kasera tu kota dio mai te da’dua suku.
17Sia dio mai suku Benyamin iamotu Gibeon sola padang kariuanna, Geba sola padang kariuanna,
18Anatot sola padang kariuanna na Almon sola padang kariuanna: a’pa’ kota.
19Iatu mintu’ kotana to Harun, iamotu mai to minaa, den sangpulo tallu sola padang kariuanna.
20Na iatu pa’rapuanna to Kehat, iamotu to Lewi tu torronapa dio lu to Kehat, naappa’mo tu mai kota dio mai suku Efraim tonna diloterei.
21Napa’benganmi tu Sikhem, kota pentilindunganna to papatean sola padang kariuanna dao lu buntu Efraim, Gezer sola padang kariuanna.
22Kibzaim sola padang kariuanna na Bet-Horon sola padang kariuanna: a’pa’ kota;
23dio mai suku Dan, iamotu Elteke sola padang kariuanna, Gibeton sola padang kariuanna;
24Ayalon sola padang kariuanna, na Gat-Rimon sola padang kariuanna: a’pa’ kota.
25Sia dio mai sesena suku Manasye iamotu Taanakh sola padang kariuanna na Gat-Rimon sola padang kariuanna: da’dua kota.
26Iatu mintu’ kota pa’rapuanna to Kehat torronapa, den sangpulo sola padang kariuanna: a’pa’ kota.
27To Gerson, iamotu pa’rapuanna to Lewi, unnappa’ dio mai sesena suku Manasye, iamotu Golan, kota pentilindunganna to papatean dio Basan sola padang kariuanna na Beestera sola padang kariuanna: da’dua kota;
28sia dio mai suku Isakhar, iamotu Kisyon sola padang kariuanna, Dobrat sola padang kariuanna,
29Yarmut sola padang kariuanna, na En-Ganim sola padang kariuanna: a’pa’ kota;
30sia dio mai suku Asyer, iamotu Misal sola padang kariuanna, Abdon sola padang kariuanna,
31Helkat sola padang kariuanna na Rehob sola padang kariuanna: a’pa’ kota.
32Sia dio mai suku Naftali, iamotu Kedesh, kota pentilindunganna to papatean, dio Galilea sola padang kariuanna, Hamot-Dor sola padang kariuanna na Kartan sola padang kariuanna: tallu kota.
33Iatu mintu’ kotana to Gerson unturu’ pa’rapuanna den sangpulo tallu sola padang kariuanna.
34Na iatu pa’rapuanna to Merari, iamotu to Lewi torronapa, naappa’mo dio mai suku Zebulon tu Yokneam sola padang kariuanna, Karta sola padang kariuanna,
35Dimna sola padang kariuanna na Nahalal sola padang kariuanna: a’pa’ kota.
36Sia dio mai suku Ruben, iamotu Bezer sola padang kariuanna, Yahas sola padang kariuanna,
37Kedemot sola padang kariuanna na Mefaat sola padang kariuanna: a’pa’ kota.
38Sia dio mai suku Gad, iamotu Ramot, kota pentilindunganna to papatean, dio Gilead sola padang kariuanna, Mahanaim sola padang kariuanna,
39Hesbon sola padang kariuanna na Yaezer sola padang kariuanna. Mintu’na to a’pa’ kota.
40Iatu mintu’ kota iato tu naappa’ to Merari unturu’ pa’rapuanna, iamotu to tang ketaapa dio pa’rapuanna to Lewi. Dipamanassammi tonna diloterei tu kota sangpulo dua.
41Iatu mintu’ kotana to Lewi dio lu taa mana’na to Israel den patangpulo ngkarua sola padang kariuanna.
42Mintu’ tu tondok iato pantan unnampui kota sola padang kariuanna. Susimoto tu a’ganna mintu’ kota iato.
43Susimoto tu PUANG ungkamasean to Israel mintu’ padang, tu umpalao sumpa unnallu’i lako nene’ to dolona; naalami napomana’ tau iato mai sia nanii ma’tondok.
44Nakamaseimi PUANG karapasan tiku lao tu tau iato mai, susitu mintu’na mangka Naallu’ Napalaoi sumpa lako nene’ to dolona; moi misa’ ualinna tae’ unnattai bendan, dio tingayona; iatu mintu’ ualinna Nasorong PUANG tama kuasanna.
45Tae’ misa’ tang dadi tu mintu’ kada melo tu Naallu’ PUANG lako to Israel, sangadinna dadi nasang.