Alkitab Mobile SABDA
[VER] : [GULLAH]     [PL]  [PB] 
 <<  1 Tesalonika 5 >> 

Be Ready fa de Day Wen de Lawd Gwine Come Back

1Now den, we bredren, dey ain no need fa we fa write oona bout wen, wa time o wa day, dem ting gwine happen.

2Cause oona know fa true dat de Lawd gwine come back wen people ain da look fa um. Dat Day ob de Lawd gwine come sudden, jes like tief kin come een de night.

3Wiles people say, “All ting gwine fine an peaceable. Dey ain nottin fa be scaid ob,” jes den, all ob a sudden, bad bad trouble gwine come down pon um. Ebrybody gwine suffa. Nobody ain gwine know fohan. E gwine be like wen bad pain come sudden pon a ooman wen e bon e chile.

4Cep oona, me Christian bredren, oona ain een de daak. So den, dat Day ob de Lawd ain oughta sprise oona, like a tief.

5Oona all people wa blongst ta de light an ta de day. We ain blongst ta de night time. We ain like dem wa da lib een de daak.

6So den, we mus dohn sleep, da lib a life ob sin like de odares wa da sleep. Leh we be wide wake an tink scraight.

7Cause een de night time people sleep, an een de night time people git dronk.

8Bot we blongst ta de day, an so we mus tink scraight bout how we da lib. We mus trus een God an lob um. Den e gwine protec we, jes like a breastplate protec a poson body. We mus keep on da look fa God fa sabe we. Den e gwine protec we, jes like a helmet protec a poson head.

9God ain pick we fa mek we suffa e jedgiment. E pick we fa gii we sabation shru we Lawd Jedus Christ.

10Cause Jedus done de fa we sake, so dat we kin go lib togeda wid um. Ain mek no nebamind weda we done dead, needaso we ain dead yet, wen e come back.

11So cause ob dat, oona mus keep on courage one noda an hep one noda fa be mo scronga een de Lawd, jes like fa true oona da do.

Paul Tell Um How fa Lib fa God

12We bredren, we beg oona fa spec oona leada dem, wa da wok haad dey mongst oona. Dey de one dem dat God done pick fa tell oona wa fa do an fa laan oona how oona oughta lib.

13Oona mus preciate um fa true an lob um cause ob de wok dey da do. An oona mus lib peaceable wid one noda.

14We bredren, we beg oona fa waan de people wa ain wahn fa do no wok. Courage dem wa scaid. Hep dem wa ain scrong een de fait, an oona fa beah wid ebrybody.

15Mek sho dat nobody ain payback ebil wid ebil. Ooona mus try all de time fa do good ta one noda an ta all people.

16Rejaice all de time.

17Neba stop da pray.

18Ain mek no nebamind wa happen, oona mus tell God tankya fa ebryting. Cause dat how God wahn oona wa come fa be one een Christ Jedus fa lib.

19Mus dohn stop de Holy Sperit fom do e wok eenside oona.

20Wen people da taak wod wa God pit een dey haat, oona mus dohn hole um cheap. Oona mus listen ta um.

21Mus look at ebryting good fashion fa mek sho weda e fom God fa true. Den ef e good, oona mus hole fast ta um.

22Mus stay way fom ebry kind ob ebil.

23We da pray dat de God wa da gii we peace mek oona like esef, holy an good een ebry way. An we pray dat e gwine keep oona sperit, soul an body clean fom sin so dat wen we Lawd Jedus Christ come back, e ain gwine find no fault een oona.

24God wa call oona fa be e own, gwine do dat fa oona, cause e da do all dat e promise.

25We bredren, oona mus pray fa we too.

26Tell all de Christian dem hey een Christian lob.

27A da tell oona, by de tority ob de Lawd, fa read dis letta ta all de Christian dem.

28We pray dat we Lawd Jedus Christ gwine bless all ob oona.



 <<  1 Tesalonika 5 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel