1Bangsa Isra’il mangkat pole, pas akemah e tana lapang Mo’ab, e temorra Songay Yordan, e seddi’anna kottha Yerikho.
2E bakto Rato Mo’ab se asmana Balak, pottrana Zipor, meyarsa kabadha’anna bangsa Amori se epakala bangsa Isra’il, sarta kabar ja’ bangsa Isra’il jareya talebat bannya’na,
3rato jareya ban ra’yadda kabbi padha katako’en.
4Ca’na oreng Mo’ab ka para pamimpinna oreng Midian, "Tanto saos sadaja se badha e nagara paneka epatompes epatadha’ karena sareng bangsa Isra’il, epakadi rebba se eamba sape e teggal." Daddi Rato Balak
5ngotos oreng nembali Bileyam, pottrana Beor, se alenggi e Petor e seddi’na Songay Efrat e dhaera Amau. Otosan jareya epakon mator kantha reya, "Areya’ badha settong bangsa dhateng dhari Messer; mencar balattra man-dha’emman, olle daddi to-sabakto nyerrang tang nagara.
6Bangsa jareya akowadan dhari tang bangsa. Daddi mara ba’na dha’ enna’, bastowagi bangsa jareya. Pola tang bangsa me’ mennang sarta ngenneng ngojuk bangsa jareya dhari tang nagara. Sabab sengko’ yakin, oreng se eberkadi ba’na tanto narema berkat, dineng oreng se ebasto ba’na tanto ekenneng babaston."
7Daddi para pamimpinna oreng Mo’ab ban Midian mangkat ngeba opa se ebagiya ka Bileyam sopaja kasokana abasto bangsa Isra’il. Sanapa’na ka kennengnganna Bileyam, reng-oreng jareya manapa’ dhabuna Rato Balak.
8Dhabuna Bileyam ka reng-oreng jareya, "Sampeyan asaren e ka’iya saos. Lagguna kaula aparengana kabar kadi ponapa dhabuna PANGERAN ka kaula." Daddi para pamimpinna bangsa Mo’ab jareya laju ngenep e kalenggiyanna Bileyam.
9Allah rabu ka Bileyam, laju mareksane, "Sapa reng-oreng se badha e bengkona ba’na jareya, Bileyam?"
10Atorra Bileyam, "Otosannepon Rato Balak dhari Mo’ab, ngatore oneng
11ca’epon badha settong bangsa dhateng dhari Messer, ampon mencar balattra ka man-ka’dhimman. Sareng Rato Balak abdidalem epakon abastowagi bangsa gapaneka sopaja bangsa Mo’ab kengenga makala sareng ngojuk bangsa gapaneka."
12Dhabuna Allah ka Bileyam, "Ba’na ja’ noro’ reng-oreng otosan jareya, ban ta’ olle abasto bangsa jareya, sabab bangsa jareya la eberkadi bi’ Sengko’."
13Kalagguwanna Bileyam adhabu ka reng-oreng otosanna Balak, "Samangken sampeyan gubar, kaula ta’ eparengngagi noro’ sampeyan sareng PANGERAN."
14Daddi reng-oreng jareya abali, laju mator ka Balak, "Bileyam ta’ kasokan rabu ka ka’dhinto."
15Balak pas makon reng-oreng laenna se abannya’an ban atenggiyan pangkadda dhari otosan se dha’-adha’.
16Reng-oreng jareya manapa’ dhabuna Balak ka Bileyam, atorra, "Badha dhabuna Rato Balak sapaneka, ‘Sengko’ menta’a onggu, mara ba’na dha’ essa’, ja’ nolak, ya.
17Bi’ sengko’ ba’na eberri’ana opa se ce’ rajana, ban apa’a bai se epenta ba’na bi’ sengko’ etorodana. Mara dha’ essa’, bastowagi bangsa rowa.’"
18Saodda Bileyam, "Sanajjan salaka sareng emmas se badha e karatonna Balak eparengngagiya kabbi ka kaula, kaula ta’ poron nyempang dhari dhabuna PANGERAN, Allah se esemba kaula. Sanare e dhalem parkara se kene’ sakale kaula ta’ bisa alaban.
19Namong, sae jugan sampeyan kelem e ka’iya, akadi otosan se jang adha’an. Kaula gi’ terro onenga ponapa se edhabuwagiya PANGERAN pole ka kaula."
20E malem jareya Allah rabu ka kalenggiyanna Bileyam, laju adhabu, "Reng-oreng jareya dha’ enna’ ngajaga ba’na. Daddi la kassa’ ba’na noro’. Tape ba’na kodu ajalannagi coma se eparenta’agi bi’ Sengko’."
21Daddi kalagguwanna Bileyam masang pa-kapana hemarra, pas mangkat ban para pamimpinna bangsa Mo’ab jareya.
22Tape Allah duka polana Bileyam meyos abareng para otosanna Balak. Teppa’na Bileyam netene hemarra, eerengngagi sarengnga se kadhuwa, pas badha malaekadda PANGERAN ngadek e tengnga lorong, ngaddhang Bileyam.
23E bakto nangale’e badha malaekat ngadek e lorong sambi ngastane peddhang se eonos, hemar jareya abiluk dhari lorong ka teggal. Bi’ Bileyam epokol, epabaliya ka lorong.
24Malaekat gella’ laju ngadek e bagiyanna lorong se cope’, se e kangan kacerra eapet kebbun anggur se ngangguy pagar bato.
25E bakto nangale’e malaekat jareya, hemar buru laju menggir, sampe’ sokona Bileyam tagipe’ ka geddhung pagarra kebbun anggur gella’. Bi’ Bileyam hemar jareya epokol pole.
26Malaekadda PANGERAN gella’ laju ngalle pole ajangadha’i Bileyam, pas ngadek e kennengngan se acope’an pole, se e kangan kacerra malaekat jareya ta’ ekenneng lebadi.
27E bakto nangale’e malaekat jareya, hemar gella’ laju arendhu. Bileyam laju peggel, hemarra epokol bi’ tekkenna.
28Bi’ PANGERAN hemar gella’ laju epatao acaca. Ca’na hemar jareya ka Bileyam, "Kaula sala ponapa me’ epokol kantos tello kale?"
29Dhabuna Bileyam, "Sengko’ egabay en-maenan bi’ ba’na! Ja’ sakenga sengko’ ngeba peddhang, tanto ba’na la epate’e bi’ sengko’!"
30Saodda hemar jareya, "Kaula paneka gu ta’ hemar se etetene sampeyan molae lamba’, ta’ enggi? Ponapa kaula oneng ta’ atoro’ ka papakonna sampeyan?" "Enja’," saodda Bileyam.
31Saellana jareya bi’ PANGERAN Bileyam epangoladi ka malaekadda se ngadek e jadhiya sambi ngastane peddhang se eonos. Bileyam laju asojud ka tana.
32Dhabuna malaekat jareya, "Arapa hemarra ba’na me’ epokol sampe’ tello kale? Sengko’ dha’ enna’ ngaddhanga ba’na, sabab masthena ba’na ta’ noro’ otosanna Rato Balak reya.
33E bakto hemarra ba’na nangale’e sengko’, pas menggir sampe’ tello kale. Ja’ sakenga hemar jareya ta’ menggir, tanto ba’na la epate’e bi’ sengko’, tape hemarra epasalamet."
34Saodda Bileyam, "Abdina dusa. Abdina ta’ oneng panjennengngan ngadek e tengnga lorong ngaddhanga abdina. Samangken, manabi menorot panjennengngan abdina ka’dhinto sala, ngereng abdina abaliya."
35Tape malaekat jareya adhabu, "Dina kassa’ la terros noro’ reng-oreng jareya. Tape ba’na coma olle ngoca’agi pa-apa se esoro koca’agi bi’ sengko’." Daddi Bileyam nerrossagi parjalananna bi’ reng-oreng otosanna Balak jareya.
36E bakto meyarsa ja’ Bileyam rabuwa, Balak laju ngamba’ ka kottha Mo’ab e penggirra Songay Arnon e batessa baba Mo’ab.
37Dhabuna Balak, "Arapa ba’na me’ ta’ endha’ dhateng bakto ekone’e dha’-adha’na? Apa sengko’ esanggu ta’ kellar majar opa ka ba’na?"
38Saodda Bileyam, "Ka’dhinto abdidalem ampon dhateng. Namong abdidalem ta’ kobasa ngoca’agi pa-ponapa kajabana se epakon koca’agi ka abdidalem sareng Allah."
39Bileyam ban Balak pas meyos ka kottha Huzot.
40E jadhiya Balak ngatorragi kurban sape ban dumba. Dagingnga sabagiyan eparengngagi ka Bileyam ban ka para pamimpin se ekabareng ka jadhiya.
41Kalagguwanna Balak abakta Bileyam ongga ka gumo’ Bamot Ba’al. Dhari jadhiya Bileyam bisa ngoladi sabagiyan dhari bangsa Isra’il.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel