1Saellana jareya lalake’ buru nonton sengko’ pole ka labang saketheng lowar e bagiyan temorra Padalemman Socce. Labang saketheng jareya atotop,
2PANGERAN adhabu ka sengko’, "Labang saketheng reya kodu etotop terros, ta’ olle bukka’. Tadha’ oreng se olle maso’ lebat dhinna’, sabab Sengko’, PANGERAN Allahna Isra’il, la maso’ ka Tang Padalemman lebat labang saketheng reya. Daddi, labang saketheng reya kodu atotop terros.
3Tape pangobasa se marenta olle entar ka labang saketheng jareya kaangguy ngakan kakanan se socce e adha’anna Sengko’. Pangobasa jareya kodu maso’ lebat e kamar se raja ban abali lebat jalan jareya keya."
4Saellana jareya lalake’ buru abakta sengko’ ka labang saketheng dhaja se dhep-adhebban ban Padalemman Socce. Sengko’ ngabassagi, ban sengko’ nangale’e Padalemman Socce jareya katotoban sonar se agalirap, se nandha’agi kahadiranna PANGERAN. Sengko’ laju asojud,
5ban Pangeran laju adhabu ka sengko’, "He, manossa se ta’ langgeng, tetene pateppa’ apa se etangale’e ban se ekaedhing ba’na. Sengko’ mala’ana ba’na parkara sakabbinna atoran ban hokom parkara Tang Padalemman reya. Cathet pateppa’ pa-sapa se eedine maso’ ka Tang Padalemman reya ban pa-sapa se elarang.
6Kabala ka ommat Isra’il se dujan aberonta’ rowa ja’ reng-oreng jareya bi’ Sengko’, PANGERAN Se Mahatenggi ta’ epannengnga pole alako najjis.
7Reng-oreng jareya la manajjis Tang Padalemman, sabab sabatara gaji ban dharana kurban eatorragi ka Sengko’, reng-oreng jareya ngedine reng-oreng manca se ta’ asonnat ban se ta’ atoro’ ka Tang parenta maso’ ka jadhiya. Kalaban lalakon se majitjit jareya ommat Isra’il ta’ neptebbi parjanjiyanna Sengko’ ban reng-oreng jareya.
8Se mabadha opacara-opacara socce e Tang Padalemman jareya banne reng-oreng Isra’il dibi’, tape reng-oreng manca se esoro bi’ reng-oreng Isra’il jareya.
9Sengko’, GUSTE Allah Se Mahatenggi ngomommagi ja’ oreng manca se ta’ asonnat ban oreng se ta’ atoro’ ka Tang parenta, ta’ olle maso’ ka Tang Padalemman jareya. Atoran reya kaangguy keya ka oreng manca se neptep apolong e nga’-tengnga’anna bangsa Isra’il."
10PANGERAN adhabu ka sengko’, "Sengko’ ngokoma reng-oreng Lewi se abareng ban reng-oreng Isra’il laenna mongkore Sengko’ ban nyemba brahala.
11E Tang Padalemman, reng-oreng Lewi jareya, coma olle aladine Sengko’ menangka panglako ban panjagana labang saketheng. Reng-oreng jareya olle nyambelli ban-keban kaangguy kurban obbaran ban kurban sambelliyan kaangguy bangsa jareya, sarta wajib ros-terrosan aladine ommat jareya.
12Tape sarrena reng-oreng jareya ngalakone kabakteyan ka brahala kaangguy ommat Isra’il, sarta ngeret bangsa jareya ka dhalem dusa, daddi Sengko’, GUSTE Allah Se Mahatenggi, asompa’a ja’ reng-oreng jareya kodu eokom.
13Reng-oreng jareya ta’ olle daddi imam se aladine Sengko’ pole, ban ta’ olle nyedding apa’a bai se la esocceyagi ka Sengko’, otabana maso’ ka Kennengngan Se Mahasocce. Jareya okomanna sabarang lalakon se najjis se elakone reng-oreng jareya.
14Sateya reng-oreng jareya bi’ Sengko’ esoro ngalakone lalakon se kasar se parlo elakone e Tang Padalemman.
15GUSTE Allah Se Mahatenggi adhabu, "E bakto bangsa Isra’il ngonduri Sengko’, mam-imam Lewi dhari toronanna Zadok paggun esto aladine Sengko’ e Tang Padalemman. Daddi mam-imam jareya se sateya kodu aladine Sengko’ ban entar ka adha’anna Sengko’ kaangguy ngeba tor-ator gaji ban dharana ban-kurban.
16Pera’ mam-imam jareya malolo se olle maso’ ka Tang Padalemman.
17E bakto maso’ e labang saketheng entara ka taneyan dhalem, mam-imam jareya kodu ngangguy kalambi linen. Ta’ olle ngangguy kalambi ewwol mon teppa’na ajalannagi lalakonna e taneyan dhalem otaba e dhalem Tang Padalemman.
18Sopaja ta’ kapanasan ban ta’ apello, mam-imam jareya kodu ngangguy calana linen se ta’ esabbu’i, ban surban dhari linen.
19Mon entara ka taneyan lowar, e kennengnganna ommat akompol, mam-imam jareya kodu mokka’ kalambi dhinassa e mar-kamar socce e Tang Padalemman, pas ngangguy kalambi laen sopaja kalambi se malolo eangguy e bakto ajalannagi lalakonna jareya ta’ macalaka’ ommat.
20Para imam ta’ olle agundhul, bariya keya ta’ olle gondrong. Obu’na kodu ecokor epapandha’ menorot atoran se la eteptebbagi.
21Mon maso’a ka taneyan dhalem ta’ olle ngenom anggur.
22Para imam pera’ olle abine babine’an Isra’il se gi’ paraban, otabana randhana imam; ta’ olle abine babine’ se etellak lakena.
23Para imam kodu ngajarragi ka Tang ommat sopaja bisa’a malaen se kemma se la etantowagi kaangguy Sengko’ malolo ban se kemma se enja’, se kemma se berse ban se kemma se najjis.
24Mon badha se atokar parkara hokom, para imam jareya se kodu motose menorot Tang kom-hokom. Para imam jareya kodu araya’agi ta-pestana agama menorot atoranna Tang kom-hokom, sarta ahormadi are Sabat menangka are se etantowagi kaangguy Sengko’ malolo.
25Imam ta’ olle manajjis aba’na kalaban nyedding mayyit, kajabana jinazana oreng towana, ana’na, taretan lake’na otaba taretan bine’na se gi’ ta’ abine otaba alake.
26Saellana berse pole, imam jareya kodu anante’ pettong are aggi’,
27pas entar ka taneyan dhalemma Tang Padalemman, e jadhiya kodu ngatorragi kurban kaangguy maberse aba’na sopaja olleya ajalannagi pole lalakonna e Tang Padalemman. Sengko’, GUSTE Allah Se Mahatenggi la ngoca’.
28Para imam narema pangkat imam jareya menangka bagiyanna dhari apa se ebagi Sengko’ ka Isra’il ron-temoron. Para imam jareya ta’ olle dhi’-andhi’ pa-apa e Isra’il: Sengko’ artana para imam jareya.
29Odhi’na dhari tor-ator se aropa gandum, kurban palebbaranna dusa, ban kurban tebbusanna kasala’an; sabarang se etantowagi kaangguy Sengko’ malolo daddi bagiyanna para imam jareya.
30Para imam kodu eberri’i bagiyan se paleng bagus dhari hasella panen se dha’-adha’na, ban dhari apa’a bai se ebagi ka Sengko’. Sabban oreng Isra’il agabay roti, rotina se massa’ dha’-adha’ kodu ebagi ka para imam. Ko-bengkona oreng Isra’il bi’ Sengko’ pas eberkadana.
31Para imam ta’ olle ngakan mano’ otabana keban se mate dibi’ otabana se eceppa’ burun alas."
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel