1PANGERAN adhabu, "Ommat Isra’il, mon ba’na abaliya, mara abali ka Sengko’. Buwang gallu la-brahala se ekabaji’i Sengko’ jareya, pas paesto ka Sengko’.
2Mon ba’na asompa bit Tang nyama ban ba’na odhi’ jujur, adil ban teppa’, sa-bangsa tanto padha menta ka Sengko’ sopaja bi’ Sengko’ eberkadi ban sa-bangsa jareya bakal amolja’agiya Sengko’."
3PANGERAN adhabu ka pandhudhu’ Yehuda ban Yerusalim, "Garap tanana ba’na se gi’ ta’ elakone jareya; ja’ nabur ne-bine e kennengngan se etombuwi ombut se adhuri.
4Teptebbi janjina ba’na ban Sengko’, PANGERANna ba’na, ban ba’na padaddi Tang andhi’ malolo, he, reng-oreng Yehuda ban Yerusalim. Mon enja’, peggella Tang ate bakal rabbanga ban ngello’ akantha apoy se ta’ ekenneng pate’e sapa’a bai. Jareya kabbi bakal etarema’a ba’na lantaran lalakonna ba’na se jahat."
5Pamonye tarompet pabalattra sanagara Aera’ paterrang ban pakaja. Soro reng-oreng Yehuda ban Yerusalim buru ka tha-kottha se abinteng.
6Duduwagi jalan ka Siyon, gumo’na Pangeran, duliyan ngongse, ja’ neng-enneng malolo. PANGERAN madhateng balai raja ban maancor sabarang se badha dhari dhaja.
7Akantha macan se kalowar dhari pangetegganna, kantha jareya keya la mangkat sateya se mamosna sa-bangsa se rabu mamosna’a Yehuda. Tha-kottha Yehuda bakal daddiya jur-gujuran, kennengngan se ta’ ekennengnge oreng.
8Daddi mara nanges pakaja sateya, angguy kalambina se dhari karong menangka tandhana sossa. Sabab babendunna PANGERAN se rabbang bang-garabangan gi’ ta’ terep dhari Yehuda.
9PANGERAN adhabu, "E are jareya to-rato ban ja-pangraja bakal kaelangana samangat; mam-imam katako’an ban bi-nabbi padha takerjat."
10Sengko’ pas mator, "Guste Allah Se Mahatenggi, Junandalem co-ngoco oreng Yehuda sareng Yerusalim! Junandalem adhabu madhatengnga kataremtemman, neng-oneng samangken nyaba abdidalem sadaja padha ngadhebbi babaja e konco’na peddhang."
11Bakal dhapa’a baktona reng-oreng Yehuda ban Yerusalim ngedhinga kabar ja’ angen panas dhari ra-ara beddhi bakal dhatengnga ka kennengnganna reng-oreng jareya. Angen jareya banne angen biyasa se pera’ mangabber sekkem,
12tape angen se santa’ se dhateng kalaban dhabuna PANGERAN dibi’ kaangguy ngokom ommadda.
13Abassagi, moso dhateng akantha ondhem. Ta-kareta perrangnga akantha kaleng busbus, ran-jaranna aceppeddan dhari mano’ rajabali. Palang! Mate sengko’ ban ba’na!
14Yerusalim, buwang kajahadan dhari atena ba’na sopaja ba’na epasalamedda. Sampe’ bila pekkeran se jahat jareya esempenna e dhalem atena ba’na?
15Dhari kottha Dan, ban dhari pagunongan Efraim dhateng para otosan se ngeba kabar juba’.
16Para otosan jareya maenga’ sa-bangsa ban malae reng-oreng Yerusalim ja’ badha moso dhateng dhari nagara se jau. Moso jareya bakal aera’a ngoca’agiya cerrengnga paperrangan ka tha-kottha Yehuda
17ban ngepponga Yerusalim akantha oreng ajaga teggal. Kadaddiyan se kantha jareya esababbagi lantaran bangsa Yehuda aberonta’ ka PANGERAN. PANGERAN la adhabu.
18Yehuda, ba’na dibi’ se madhateng balai reya ka aba’na dibi’. Cara odhi’na ba’na ban tengkana ba’na se daddi sababba sakabbinna kasangsara’an se nyake’e atena ba’na reya.
19Adhu, sangsara onggu tang ate reya, sengko’ nanggung ta’ kellar rassana. Sengko’ ta’ sanggup maayem tang ate, dhadha dheg-gadheggan ce’ kajana, sabab sengko’ ngedhing monyena tarompet ban cerrengnga paperrangan.
20Balai dhateng tadha’ ambuna, maancor nagara tadha’ karena. O-tao tang kemah eparosak, bir-tabirra ebit-sebbit kabbi.
21Sampe’ bila sengko’ kodu nyaksene oreng aperrang amba’ pate? Sampe’ bila sengko’ kodu ngedhing monyena tarompet se makopok kopeng?
22PANGERAN adhabu, "Budhu onggu Tang ommat jareya, padha ta’ kennal ka Sengko’. Reng-oreng jareya akantha na’-kana’ se ce’ gendhengnga, ta’ andhi’ pangarteyan sakone’a balakka’; cakep e dhalem kajahadan, ta’ ahasel e dhalem kabecce’an."
23Sengko’ ngabas ka bume, katonna kosong ban kerreng; sengko’ adhanga ngabas ka langnge’, tadha’ sonarra sakale.
24Sengko’ ngabas ka gunong ban ka mo’-gumo’ se tenggi se padha agundhek kabbi.
25Sengko’ ta’ nangale’e manossa settonga, mano’ balakka’ la ngabber kabbi tadha’ karena.
26Tana landhu daddi ra-ara se kerreng, tha-kottha ancor daddi tompo’anna jur-gujuran, sabab PANGERAN ce’ dukana ka ommadda.
27(PANGERAN adhabu dunnya reya daddiya ra-ara kabbi, tape bi’PANGERAN ta’ epamosna’a.)
28Bume bakal sossa’a, langnge’ bakal pettengnga. PANGERAN la mare adhabu ban ta’ kera ngoba kasokanna. PANGERAN la neptebbagi potosanna maske satendak ta’ kera nyorot.
29Badha sowarana pasukan jaran ban kang-tokang pana, baridhu talebat rammena, sampe’ oreng padha buru nga’-engnga’an. Las-alas emaso’e, mo’-gumo’ eonggai. Tha-kottha daddi seppe kabbi, tadha’ se endha’ neng e jadhiya pole.
30He, Yerusalim, ba’na la edina’agi ban ta’ bisa apa-rapa pole! Arapa’a ba’na me’ akalambi mera towa ban aeyas ngangguy emmas ban salaka, sarta ngangguy cella’ e matana? Tadha’ gunana ba’na din-maraddin kantha jareya, sabab para kakasena ba’na la tadha’ se endha’ pole ka ba’na, la’-mala’ kabbi mateyana ba’na.
31Sengko’ ngedhing sowarana oreng aserrowan, akantha babine’ se sake’ tabu’ rembi’a; akantha babine’ ngodha se rembi’ sareyang, kantha jareya tangessa Yerusalim se seksek nyabana. Tanangnga gay-ragayan ban aserro, "Palang sengko’, sengko’ epateyana moso!"
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel