Alkitab Mobile SABDA
[VER] : [NIAS]     [PL]  [PB] 
 <<  1 Tesalonika 5 >> 

1Ya'ami ira talifusõ, lõ moguna masura khõmi hawa'ara ginõtõ alua dania da'e fefu.

2Me ya'ami sa'ae zangila sibai, wa luo we'aso Zo'aya andrõ dania hulõ we'aso zanagõ ba zi bongi.

3Na law̃a'õ niha dania, "No atulõ fefu ba ahono," ba hiza ba ginõtõ da'õ i'anemai'õ gõna ira fa'atekiko! Ba tebai aefa ira. Alua da'õ fefu dania ba zi lõ mudõnadõna, hulõ si mane fa'afõkhõ ba zanabina na inõtõ tumbu nono.

4Ba ya'ami ira talifusõ, tenga si so ba zogõmigõmi ami, irege luo da'õ tokea ami wa'atohare ngaluo da'õ me hulõ we'aso zanagõ.

5Ba ya'ami fefu ba no si so ba haga; no niha zi ma'õkhõ ami. Tenga niha zi bongi ita, ba ma niha zogõmigõmi.

6Bõrõ da'õ bõi mõrõmõrõ manõ ita si mane niha bõ'õ andrõ. Ena'õ mangenanõ ita, ba ena'õ mohaga wangerangerada.

7Niha si mõrõ, ba ba zi bongi mõrõ ia. Niha si mabu, ba ba zi bongi mabu ia.

8Ba ya'ita andre no niha zi ma'õkhõ, andrõ bõrõ da'õ era'erada lõ tola lõ muhaga. Lõ tola lõ faduhu manõ dõdõda khõ Zo'aya ba ta'omasi'õ niha bõ'õ, awõ wa manõtõna ita wa I'orifi ita Lowalangi. Da'õ wangõna khõda sombalugõ ya'ita ba wasõndrata wolaw̃a sogõmigõmi.

9No Ituyu ita Lowalangi tenga ena'õ Ihuku, no ena'õ I'orifi ita ba khõ Zo'aya ya'ita, Yesu Keriso.

10No mate Yesu salahida, ena'õ na so Ia dania -- he na sauri ita ba ginõtõ da'õ, ba ma no mate -- auri ita fao awõ-Nia.

11Bõrõ da'õ ya faoma mifarou dõdõ nawõmi ba faoma mi'a'aro'õ wamati nawõmi, si mane folaumi sa'ae iada'e.

12Ya'ami ira talifusõ, ma'andrõ sibai khõmi, ena'õ mifosumange niha sohalõw̃õ ba khõmi; ya'ira si no Ituyu So'aya ba wondrõnia'õ, ba ba wo'amenesi ya'ami.

13Mifosumange ira, mi'omasi'õ ira, bõrõ halõw̃õra andrõ si no lafalua. Ena'õ atulõ zamõsana khõ nawõnia.

14Ba ma'andrõ gõi, ya'ami ira talifusõ, ena'õ mitegu niha si lõ molo'õ huku. Mifarou dõdõ niha sabu tõdõ, mitolo niha sambõ fa'abõlõ, ba mibologõ dõdõmi ba niha fefu.

15Mifaigi, ena'õ bõi so zanulõni si lõ sõkhi awõnia si lõ sõkhi. Bõi mifamalõmalõ wolau si sõkhi khõ nawõmi, ba he ba niha fefu.

16Ya lõ mamalõmalõ wa'omuso dõdõmi,

17ba bõi mibatobato wangandrõ.

18Ba fefu hadia ia, ba mi'andrõ saohagõlõ, me da'õ zomasi Lowalangi ba khõmi, si no ha sambua ba khõ Yesu Keriso.

19Bõi mibunu Geheha Lowalangi andrõ.

20Bõi mi'aohasi duria ni'ombakha'õ Geheha Lowalangi andrõ.

21Fefu hadia ia ba mifareso, ba si sõkhi mihalõ khõmi.

22Ba mi'arõu'õ fefu ngawalõ zi lõ sõkhi.

23Ya Lowalangi samõsa zame'e khõda fa'ohahau dõdõ andrõ, ba samaulugõ fangehao ya'ami, ena'õ ha khõ-Nia manõ auri ami. Ba ena'õ Lowalangi zondrorogõ ya'ami ma'afefu, he ehehami, nosomi awõ mbotomi, irege lõ hadõi sinegu irugi we'aso Zo'aya ya'ita Yesu Keriso.

24Lõ farõi Lowalangi si no mogaoni ya'ami andrõ, ba Ya'ia gõi zamalua dania da'õ fefu.

25Mi'angandrõ salahima, ya'ami ira talifusõ!

26Mifa'ema wangowaima ba dalifusõ fefu, samati ba khõ Keriso.

27Ba dõi Zo'aya Yesu, u'andrõ sibai khõmi, ena'õ mibaso zura andre ba dalifusõ fefu, samati khõ Keriso.

28Ya falukha ami wa'ebua dõdõ Zo'aya ya'ita Yesu Keriso.



Download Audio MP3 (1 Tesalonika 5):
Mobile (Low Quality) - CD (High Quality)

 <<  1 Tesalonika 5 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel