Si Nabal pakon si Abigail
1Matei ma si Samuel, jadi martumpu ma ganup halak Israel, itangisi sidea ma ia, anjaha itanom ma ia dohorhon rumahni i Rama. Tapi misir ma anggo si Daud, tuad hu halimisan Paran.
2Adong ma sada halak Maon, na marparusahaan i Karmel. Halak na bayak tumang do ia; adong do tolu ribu biri-biri anjaha saribu hambingni. Sanggah manrasip biri-biri do ia i Karmel.
3Ia goran ni dalahi ai si Nabal do, anjaha goran ni parinangonni si Abigail. Na pentar do naboru ai anjaha jenges; tapi anggo dalahi ai na jungkat anjaha na jahat do paruhuranni; ginompar ni si Kaleb do ia.
4Ibogei si Daud ma i halimisan, na manrasip biri-biri do si Nabal ai.
5Jadi isuruh si Daud ma sapuluh anak garama, nini ma dompak anak garama ai, “Tangkog ma hanima hu Karmel marayak si Nabal, padas hanima ma tabingku bani.
6Sonon ma hatahon hanima bani, ʻDamei ma bamu, damei ma bani rumahmu anjaha damei ma bani ganup na dong bamu.
7Hubogei do na manrasip biri-biri do ham; na rap pakon hanami do parmahanmu, seng ongga isunsahi hanami sidea, anjaha seng ongga magouan atap aha pe sidea, sadokah sidea i Karmel.
8Sungkun ham ge parhorjamu, patugahon ni sidea do pasal ai bamu. On pe holong ma uhurmu mangidah anak garama on, ai tudu sanggah ari na madear do hanami roh. Mahua bere ham ma hu bani jabolonmu on pakon hu bani anakmu si Daud na adong tudu ibagas tanganmu.ʼ”
9Dob das hasoman ni si Daud ai hujai, ipatugah sidea ma ganupan ai hu bani si Nabal marhitei goran ni si Daud; jadi ipaima sidea ma.
10Nini si Nabal ma mambalosi hasoman ni si Daud ai, “Ise do si Daud? Ise do anak ni si Isai? Buei do sonari jabolon na lintun hun bani tuanni.
11Mintor buatonku ma rutingku pakon bahku ampa pinahanku na dob husayat bani panrasipanku laho mamberehon ai bani halak na so hubotoh hunja rohni?”
12Dob ai marhusor ma hasoman ni si Daud sihol mulak, anjaha dob das sidea, ipatugah ma ganupan hata ai hu bani si Daud.
13Nini si Daud ma dompak hasomanni ai, “Ganup ma marsigonditkon podangni bei!” Jadi ganup ma sidea marsigonditkon gonditni; si Daud pe igonditkon ma podangni; dob ai iirikkon sidea ma si Daud, ompat ratus halak bueini, tapi tading do dua ratus halak manjaga ugas-ugas.
14Tapi ipatugah sahalak siparhorjani ma hu bani si Abigail, parinangon ni si Nabal ai, nini ma, “Isuruh si Daud do suruhanni hun halimisan, laho padaskon hata harosuhni hu bani tuanta, tapi isorgangi do sidea.
15Na dear tumang do pambahenan ni halak ai bennami, seng ongga ikahua hanami, anjaha seng ongga magouan atap aha pe hanami sadokah rap hanami pakon sidea marmahan i sampalan.
16Songon tembok do sidea bennami borngin pakon arian sadokah hanami marmahan i lambung ni sidea.
17Halani ai paruhurhon ham anjaha timbang ham ma, barang aha sibahenonmu; ai domma iputuskon uhum hamagouan dompak tuanta pakon ganup isi ni rumahni ganupan; paruhur na jahat do tuanta, seng tarparsahapkon age ise ia.”
18Dob ai tarolos ma si Abigail, ibuat ma dua ratus ruti pakon dua gusi hulingkuling anggur, lima biri-biri na dob pinamasak, lima tumba gandum na dob pinahpah, saratus kue na maragu buah kurma; inahkon ma ganupan ai hu atas ni halode.
19Dob ai ihatahon ma hu bani jabolonni, “Parlobei ma hanima laho, mintor roh pe ahu hun pudinima.” Tapi seng ipatugah ai hu bani paramangonni si Nabal.
20Jadi sanggah na mangajak halode ai ia tuad, lingod ibahen dolog-dolog ai, sompong tuad ma si Daud pakon hasomanni mandompakkonsi; jadi pajumpah ma ia pakon sidea.
21Tapi domma ihatahon si Daud hinan, “Soya-soya do hape na hujaga ganup na dong bani ai i halimisan gabe seng magouan atap aha ia; tapi ibalaskon do na jahat bangku balos ni na madear.
22Sonai ma ibahen Naibata hu bani si Daud, lobihni ai ope, anggo adong na manggoluh tading palopasonku hun bani ganup na adong bani paima siang ari, sahalak dalahi pe lang.”
23Tapi dob iidah si Abigail si Daud ai, tarolos ma ia turun hun datas halode ai, anjaha manrogop ma ia i lobei ni si Daud anjaha isombah ma ia.
24Idabuhkon ma dirini i lobei ni nahei ni si Daud anjaha nini ma, “Ahu do tuannami, na marsalah ai; lopas ham ma jabolonmu naboru on mangkatahon hata i lobeimu, anjaha tangar ham ma hata ni jabolonmu naboru on.
25Ulang ma iparuhurhon tuanku parlahou ni si Nabal na jahat ai, ai songon goranni ai do ia; si Nabal do goranni, anjaha gok haotoon do ia. Tapi anggo ahu, jabolonmu naboru on, seng dong huidah hasoman ni tuanku na sinuruhmu ai.
26On pe, tuannami, songon sintongni manggoluh Jahowa, anjaha manggoluh homa pakon ham, na dob niolatan ni Jahowa madabuh hubagas utang daroh, anjaha mangurupi dirimu marhitei tanganmu sandiri: Sai songon si Nabal ma munsuhmu pakon halak na mansura-surahon hamagouan hu bani tuannami.
27On pe, sibere-bere na binoan ni jabolonmu naboru hu bani tuannami, mahua nabere ma in bani halak na saodoran pakon tuannami.
28Sai marpangulaki ma uhurmu mangidah salah ni jabolonmu naboru on; ai sai na pajonamon ni Jahowa do bani tuannami rumah na totap, halani parporangan ni Jahowa na nidalankonmu, anjaha sadokah ham manggoluh, seng dong jumpah na masambor ibagas ham.
29Anggo adong halak na jongjong marburu ham barang mantahihon hosahmu, sai simpan ma namin hosah ni tuannami ibagas balut-balutan ni halak, na manggoluh i lambung ni Jahowa, Naibatamu.
30Anjaha anggo domma ibahen Jahowa hu bani tuannami haganup na madear na hinatahon-Ni hu bamu, anjaha ipabangkit ham gabe pambobai ni halak Israel,
31sai ulang ma gabe urat ni pusok ni uhur barang panosalan ni uhur ai bamu, halani na manduruskon daroh ham seng pala marhala, anjaha na niurupanmu dirimu marhitei tanganku sandiri. Anjaha anggo domma ibahen Jahowa na madear hu bani tuannami, sai ingat ham ma jabolonmu naboru on.”
32Dob ai nini si Daud ma dompak si Abigail, “Pinuji ma Jahowa, Naibata ni Israel, na marsuruh ham sadari on manjumpahkon ahu.
33Pinuji ma homa hapantasonmu, sonai homa ham, halani na niolatmu ai ahu sadari on madabuh hubagas utang daroh pakon mangurupi diringku marhitei tanganku sandiri.
34Tapi songon sintongni manggoluh Jahowa, Naibata ni Israel, na mangolat ahu mambahen na masambor bamu; ai ambit lang podas ham roh manjumpahkon ahu, seng dong be dalahi na tading bani si Nabal paima siang ari.”
35Jadi ijalo si Daud ma siluah na binoanni ai, anjaha nini ma hu bani, “Mulak ma ham ibagas damei hu rumahmu. Tonggor ma, domma hubalosi pangindoanmu, anjaha domma marpangulaki uhurhu mangidah ham.”
36Jadi dob das si Abigail hu bani si Nabal, mangan minum do ia i rumahni songon sada raja, marmalas ni uhur do ia anjaha mabuk tumang. Halani ai aha pe lang ipadas hu bani, age hata sangkababah, paima siang ari.
37Patarni dobkonsi malum mabuk ni si Nabal ai, ipatugah parinangonni ai ma bani ganup hata ai. Jadi mintor soh ma mardalan pusu-pusuni ibagas angkulani, gabe songon batu ma ia.
38Anjaha pala ope sapuluh ari nari ase itompas Jahowa si Nabal, jadi matei ma ia.
39Jadi dob ibogei si Daud na dob matei si Nabal, nini ma, “Pinuji ma Jahowa na mambalaskon hu bani si Nabal pangapasion na bangku anjaha na mangolat ahu hun bani na mangkorjahon hajahaton. Domma ibalikkon Jahowa hu bani uluni hajahaton ni si Nabal.” Dob ai isuruh si Daud ma suruhanni mangkatahon hatani hu bani si Abigail, sihol mambuatsi bahen parinangonni.
40Dob das suruhan ni si Daud ai hu bani si Abigail i Karmel, marsahap ma sidea pakonsi, nini ma, “Isuruh si Daud do hanami bamu, laho mangalopi ham bahen parinangonni.”
41Dob ai jongjong ma ia, manrogop ma ia, bohini das hu tanoh, anjaha nini ma, “Tonggor ma, ra do ahu jabolonmu naboru on gabe jabolon, laho mamurihi nahei ni juakjuak ni tuannami.”
42Dob ai mangolos ma si Abigail marugas, iajak ma halodeni, anjaha naboru suruh-suruhanni na lima ai do mangkasomanisi; iirikkon sidea ma suruhan ni si Daud ai, jadi gabe parinangonni ma ia.
43Tapi domma ibuat si Daud homa si Ahinoam na hun Jesreel, jadi duasi ma sidea gabe parinangonni.
44Tapi domma iberehon si Saul si Mikal, boruni ai, parinangon ni si Daud ai, hu bani si Paltiel, anak ni si Lais na hun Gallim.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel